ബഹിരാകാശ മേഖല പിഎല്‍ഐ സ്‌കീമുകള്‍ തേടുന്നു

ബഹിരാകാശ അധിഷ്ഠിത സേവനങ്ങള്‍ക്കായി കൂടുതല്‍ തുക വകയിരുത്തണമെന്നും സ്റ്റാര്‍ട്ടപ്പുകളുടെ വളര്‍ച്ചയെ ഉത്തേജിപ്പിക്കുന്നതിന് നികുതി വെട്ടിക്കുറയ്ക്കണമെന്നും ആവശ്യം. ബജറ്റില്‍ മേഖലയിലെ ഉല്‍പ്പാദനവുമായി ബന്ധപ്പെട്ട പ്രോത്സാഹന പദ്ധതി അവതരിപ്പിക്കണമെന്നും ഇന്ത്യയുടെ ബഹിരാകാശ മേഖല ആഗ്രഹിക്കുന്നു. കേന്ദ്ര ബജറ്റിന് മുന്നോടിയായാണ് സ്‌പേസ് സെക്ടര്‍ തങ്ങളുടെ ആവശ്യം മുന്നോട്ട് വച്ചത്.

ഇന്ത്യന്‍ ബഹിരാകാശ സമ്പദ്വ്യവസ്ഥയുടെ മൂല്യം 8.4 ബില്യണ്‍ ഡോളറാണ്. അടുത്ത ദശകത്തില്‍ ഉപഗ്രഹങ്ങളും വിക്ഷേപണ സംവിധാനങ്ങളും നിര്‍മ്മിച്ച് സ്വകാര്യമേഖലയും ഈ രംഗത്ത് മികവുപുലര്‍ത്തും.

'ഒരുപക്ഷേ ബഹിരാകാശ മേഖലയ്ക്കായി പിഎല്‍ഐ സ്‌കീം പോലെയുള്ള ഒന്ന് ബജറ്റ് കാഴ്ചപ്പാടില്‍ സഹായകമാകും. ബഹിരാകാശ മേഖലയിലും ധാരാളം അടിസ്ഥാന സൗകര്യ വികസനം നടത്തേണ്ടതുണ്ട്. അതിനാല്‍, പ്രാദേശിക ഉല്‍പ്പാദനം സ്ഥാപിക്കുന്നതിന് കമ്പനികളെ പ്രോത്സാഹിപ്പിക്കാന്‍ കഴിയുമെങ്കില്‍, അത് മഹത്തരമായിരിക്കും,'' പിക്സല്‍ സ്പേസ് സഹസ്ഥാപകനും ചീഫ് എക്സിക്യൂട്ടീവ് ഓഫീസറുമായ അവായിസ് അഹമ്മദ് പിടിഐയോട് പറഞ്ഞു.

ഇന്ത്യന്‍ സ്‌പേസ് അസോസിയേഷന്‍ (ഐഎസ്പിഎ) ഡയറക്ടര്‍ ജനറല്‍ ലഫ്റ്റനന്റ് ജനറല്‍ എ കെ ഭട്ട് (റിട്ട) ഇറക്കുമതി ഇളവുകള്‍, കുറഞ്ഞ ജിഎസ്ടി, ഒരു നിശ്ചിത സമയത്തേക്ക് വ്യവസായത്തിന് നികുതി അവധി എന്നിവയും ആവശ്യപ്പെട്ടു.

ബഹിരാകാശ അധിഷ്ഠിത ആപ്ലിക്കേഷനുകള്‍ക്കായി വിവിധ വകുപ്പുകള്‍ക്കായി സര്‍ക്കാര്‍ കൂടുതല്‍ ബജറ്റ് നീക്കിവെക്കുമെന്ന് ഐഎസ്പിഎ പ്രതീക്ഷിക്കുന്നതായി അദ്ദേഹം പറഞ്ഞു. ഹൈവേകളില്‍ ടോള്‍ പിരിക്കുന്നതിന് ഉപഗ്രഹ ഡാറ്റ ഉപയോഗിക്കാന്‍ പദ്ധതിയിടുന്ന റോഡ് ഗതാഗത മന്ത്രാലയത്തിന്റെ ഉദാഹരണം അദ്ദേഹം ഉദ്ധരിച്ചു.

പ്രതിരോധ മേഖലയ്ക്കായി 52 സാറ്റലൈറ്റ് കോണ്‍സ്റ്റലേഷനു സര്‍ക്കാര്‍ അംഗീകാരം നല്‍കിയിട്ടുണ്ടെന്നും അതില്‍ 31 ഉപഗ്രഹങ്ങള്‍ സ്വകാര്യമേഖല നിര്‍മ്മിക്കുമെന്നും ഭട്ട് പറഞ്ഞു.

ജപ്പാന്‍, ചൈന തുടങ്ങിയ രാജ്യങ്ങളുമായുള്ള ഫണ്ടിംഗ് വിടവ് നികത്താന്‍ സഹായിക്കുന്നതിന് 40,000-50,000 കോടി രൂപ വരെ ബഹിരാകാശ ബജറ്റില്‍ ഗണ്യമായ വര്‍ദ്ധനവ് സാറ്റ്കോം ഇന്‍ഡസ്ട്രി അസോസിയേഷന്‍ (എസ്‌ഐഎ-ഇന്ത്യ) ആവശ്യപ്പെട്ടിട്ടുണ്ട്.

നൂതന സാറ്റലൈറ്റ് സാങ്കേതികവിദ്യകള്‍, ബഹിരാകാശ ഖനനം, നൂതന ബഹിരാകാശ സുരക്ഷാ സാങ്കേതികവിദ്യകള്‍, ബഹിരാകാശ സുരക്ഷയ്ക്കുള്ള മെച്ചപ്പെടുത്തിയ സൈബര്‍ കഴിവുകള്‍, ഗ്രീന്‍ പ്രൊപ്പല്‍ഷന്‍ സംവിധാനങ്ങള്‍, പുനരുപയോഗിക്കാവുന്ന വിക്ഷേപണ സാങ്കേതികവിദ്യകള്‍, ക്വാണ്ടം സാറ്റലൈറ്റ് സാങ്കേതിക വിദ്യകള്‍ തുടങ്ങിയ പ്രധാന മേഖലകള്‍ക്ക് ഈ ബജറ്റ് വര്‍ധന മുന്‍ഗണന നല്‍കണമെന്നും ആവശ്യമുയര്‍ന്നു.

വളര്‍ച്ച വര്‍ധിപ്പിക്കുന്നതിന് നികുതി അവധികളും ഗവേഷണ-വികസന സബ്സിഡികളും ഉള്‍പ്പെടെയുള്ള സാമ്പത്തിക ആനുകൂല്യങ്ങള്‍ സൃഷ്ടിക്കാനും ധനമന്ത്രാലയത്തിനുള്ളില്‍ ഒരു ബഹിരാകാശ സാമ്പത്തിക ടാസ്‌ക് ഫോഴ്സ് രൂപീകരിക്കുന്നതിനും എസ്‌ഐഎ-ഇന്ത്യ ശക്തമായി രംഗത്തുണ്ട്.

'ഇന്ത്യന്‍ ഉപഗ്രഹങ്ങളുടെ കയറ്റുമതിയും വിക്ഷേപണ സേവനങ്ങളും തന്ത്രപരമായ ഉഭയകക്ഷി കരാറുകളും നികുതി ക്രെഡിറ്റുകളും ഉപയോഗിച്ച് പ്രോത്സാഹിപ്പിക്കണം,' എസ്‌ഐഎ-ഇന്ത്യ ഡയറക്ടര്‍ ജനറല്‍ അനില്‍ പ്രകാശ് പറഞ്ഞു.