'വൈഫൈ, മ്യൂസിക്, പുഷ് ബാക്ക് സീറ്റ്' ലക്ഷ്വറി ബസുമായി കെഎസ്ആർടിസി
അത്യാധുനിക സൗകര്യങ്ങളുള്ള കെഎസ്ആര്‍ടിസി എസി സൂപ്പര്‍ഫാസ്റ്റ് പ്രീമിയം ബസുകള്‍ ഇന്ന് സര്‍വീസ് ആരംഭിക്കും. പ്രീമിയം ബസിന്‍റെ ഉദ്ഘാടനം ഇന്ന് വൈകിട്ട് 3:30 ന് മുഖ്യമന്ത്രി പിണറായി വിജയന്‍ നിര്‍വഹിക്കും. ചടങ്ങില്‍ ഗതാഗത വകുപ്പ് മന്ത്രി കെ.ബി. ഗണേഷ് കുമാര്‍ അധ്യക്ഷനാകും.
വൈഫൈ കണക്ഷന്‍, മ്യൂസിക് സിസ്റ്റം, പുഷ് ബാക്ക് സീറ്റ് തുടങ്ങി നിരവധി സൗകര്യങ്ങള്‍ ഈ ബസിലുണ്ട്. 40 സീറ്റുകളാണ് ബസില്‍ ഉണ്ടാകുക. തിരുവനന്തപുരം – കോഴിക്കോട്, കോഴിക്കോട് – തിരുവനന്തപുരം, തിരുവനന്തപുരം – പാലക്കാട്, പാലക്കാട് – തൃശൂര്‍ റൂട്ടുകളിലാണ് ബസ് പരിഗണിക്കുന്നത്. ആദ്യഘട്ടത്തില്‍ 10 ബസുകളാണ് സര്‍വീസ് നടത്തുക.
കുറഞ്ഞ ചെലവില്‍ അത്യാധുനിക സൗകര്യങ്ങളോടെയുള്ള സൗകര്യപ്രദമായ യാത്ര ഒരുക്കുക എന്നതാണ് എസി സൂപ്പര്‍ഫാസ്റ്റ് പ്രീമിയം സര്‍വീസിലൂടെ കെഎസ്ആര്‍ടിസി ലക്ഷ്യം വയ്ക്കുന്നത്. സൂപ്പര്‍ ഫാസ്റ്റിനും എക്സ്പ്രസിനും ഇടയിലായിരിക്കും ടിക്കറ്റ് നിരക്ക്. യാത്രക്കാര്‍ക്ക് ടിക്കറ്റ് മുന്‍കൂട്ടി ബുക്ക് ചെയ്യാം.