അന്താരാഷ്ട്ര ബഹിരാകാശ ദൗത്യം: ഇന്ത്യൻ ബഹിരാകാശയാത്രികരെ പരിശീലിപ്പിക്കാൻ നാസ

അന്താരാഷ്ട്ര ബഹിരാകാശ നിലയത്തിലേക്കുള്ള സംയുക്ത ദൗത്യത്തിനായി ഇന്ത്യൻ ബഹിരാകാശ സഞ്ചാരികൾക്ക് നാസ ഉടൻ തന്നെ വിപുലമായ പരിശീലനം നൽകുമെന്ന് ഇന്ത്യയിലെ യുഎസ് പ്രതിനിധി എറിക് ഗാർസെറ്റി അറിയിച്ചു. ബെംഗളൂരുവിൽ നടന്ന 'യുഎസ്-ഇന്ത്യ കൊമേഴ്‌സ്യൽ സ്‌പേസ് കോൺഫറൻസ് 'അൺലോക്കിംഗ് ഓപ്പർച്യുനിറ്റീസ് ഫോർ യുഎസ് ആൻഡ് ഇന്ത്യൻ സ്‌പേസ് സ്റ്റാർട്ടപ്പുകൾ' എന്ന പരിപാടിയിൽ സംസാരിക്കവെ ഗാർസെറ്റി ഈ ദൗത്യം ഈ വർഷമോ അതിനുശേഷമോ സംഭവിക്കുമെന്ന് സൂചിപ്പിച്ചു. യുഎസ്-ഇന്ത്യ ബഹിരാകാശ സഹകരണത്തിലെ സുപ്രധാന ചുവടുവയ്പ്പായിരിക്കും ഈ സഹകരണം.

ഭൂമിയുടെ വിഭവങ്ങൾ നിരീക്ഷിക്കുന്നതിനായി ഐഎസ്ആർഒയുടെ സതീഷ് ധവാൻ ബഹിരാകാശ കേന്ദ്രത്തിൽ നിന്ന് നാസയുടെയും ഐഎസ്ആർഒയുടെയും സംയുക്ത ദൗത്യമായ നിസാർ ഉപഗ്രഹത്തിൻ്റെ വരാനിരിക്കുന്ന വിക്ഷേപണവും ഗാർസെറ്റി പ്രഖ്യാപിച്ചു.

ബഹിരാകാശ പര്യവേഷണത്തിലും ഈ മേഖലയിൽ തൊഴിലവസരങ്ങൾ സൃഷ്ടിക്കുന്നതിലും രാജ്യങ്ങൾ തമ്മിലുള്ള സഹകരണത്തിൻ്റെ പ്രാധാന്യം അദ്ദേഹം ഊന്നിപറഞ്ഞു. സമ്മേളനത്തിൽ മുതിർന്ന സർക്കാർ ഉദ്യോഗസ്ഥരും വാണിജ്യ ബഹിരാകാശ വ്യവസായത്തിലെ നേതാക്കളും പങ്കെടുത്തു.

അതെസമയം, ബഹിരാകാശ സഹകരണം ശക്തിപ്പെടുത്തുന്നതിനെക്കുറിച്ചും യുഎസ് വ്യവസായവുമായി സാധ്യതയുള്ള സഹകരണത്തെക്കുറിച്ചും ചർച്ച ചെയ്യുന്നതിനായി ഇന്ത്യയിലെയും യുഎസിലെയും മുതിർന്ന പ്രതിരോധ ഉദ്യോഗസ്ഥർ രണ്ടാം വാർഷിക യുഎസ്-ഇന്ത്യ അഡ്വാൻസ്ഡ് ഡൊമെയ്ൻസ് ഡിഫൻസ് ഡയലോഗിനായി (എഡി3) വാഷിംഗ്ടണിൽ യോഗം ചേർന്നു.