കോള്‍ കണക്ഷന്‍ പ്രശ്നങ്ങളുമായി സോഫ്റ്റ് വെയര്‍ അപ്‌ഡേറ്റുകള്‍

ഏറ്റവും പുതിയ സോഫ്റ്റ്വെയര്‍ അപ്ഗ്രേഡിന് ശേഷം കോള്‍ കണക്ഷന്‍ പ്രശ്നങ്ങള്‍ നേരിട്ടതായി രാജ്യത്തെ ഐഫോണ്‍, ആന്‍ഡ്രോയിഡ് ഉപയോക്താക്കള്‍. ഓണ്‍ലൈന്‍ പ്ലാറ്റ്ഫോമായ ലോക്കല്‍ സര്‍ക്കിള്‍സ് അതിന്റെ ഏറ്റവും പുതിയ റിപ്പോര്‍ട്ടിലാണ് ഇക്കാര്യം വ്യക്തമാക്കിയത്.

ഏറ്റവും പുതിയ സോഫ്റ്റ്വെയര്‍ നവീകരണത്തിന് ശേഷം തങ്ങളുടെ സേവനങ്ങളില്‍ പ്രശ്നങ്ങള്‍ നേരിടുന്നതായി രാജ്യത്തെ 60 ശതമാനം ഐഫോണ്‍ ഉപയോക്താക്കളും ഒരു സര്‍വേയില്‍ അറിയിച്ചു. ആന്‍ഡ്രോയിഡില്‍ ഇത് 40 ശതമാനമാണ്.

ഐഫോണ്‍ ഉപയോക്താക്കള്‍ നേരിടുന്ന ഏറ്റവും വലിയ പ്രശ്നമാണ് കോള്‍ പരാജയം. അതേസമയം ആപ്പുകള്‍ ഫ്രീസുചെയ്യുന്നതാണ് ആന്‍ഡ്രോയിഡ് ഉപയോക്താക്കളുടെ ഏറ്റവും വലിയ പ്രശ്നം.

ഐഒഎസ് 18-ലേക്കോ അതിന് ശേഷമോ അപ്ഗ്രേഡ് ചെയ്ത ആപ്പിള്‍ ഐഫോണ്‍ ഉപയോക്താക്കളില്‍ 10ല്‍ 6 പേരും ബുദ്ധിമുട്ടുകള്‍ നേരിടുന്നുണ്ടെന്ന് റിപ്പോര്‍ട്ട് ചൂണ്ടിക്കാണിക്കുന്നു. മിക്ക/ചില വോയ്സ് കോളുകളും ഒടിടി കോളുകളും കണക്റ്റുചെയ്യുകയോ ഡ്രോപ്പ് ചെയ്യുകയോ ചെയ്യുന്നില്ലെന്ന് പ്രതികരിച്ചവരില്‍ 28 ശതമാനം പേര്‍ അറിയിച്ചു. 12 ശതമാനം ഫോണിന്റെ സ്‌ക്രീന്‍ ഇരുണ്ടുപോകുന്നതായും സര്‍വേയില്‍ പറയുന്നു.

നവംബര്‍ 12 മുതല്‍ ഡിസംബര്‍ 26 വരെ നടത്തിയ സര്‍വേയില്‍, ഇന്ത്യയിലെ 322 ജില്ലകളിലായി 47,000 പ്രതികരണങ്ങള്‍ (ആപ്പിള്‍ ഐഫോണ്‍ ഉപകരണങ്ങളുടെ ഉപയോക്താക്കളില്‍ നിന്ന് 31,000 ഉം ആന്‍ഡ്രോയിഡ് ഉപകരണങ്ങളുടെ ഉപയോക്താക്കളില്‍ നിന്ന് 16,000 ഉം) ലഭിച്ചതായി ലോക്കല്‍ സര്‍ക്കിള്‍സ് അവകാശപ്പെടുന്നു.

ഐഫോണ്‍ 16ന്റെ തിരഞ്ഞെടുത്ത മോഡലുകളിലെ സ്‌ക്രീന്‍, ക്യാമറ ഫ്രീസിങ് പ്രശ്നങ്ങള്‍ പരിഹരിക്കുന്നതിനായി ഒക്ടോബറില്‍ കമ്പനി ഐഒഎസ് 18.0.1 അപ്ഡേറ്റ് പുറത്തിറക്കിയിരുന്നു. കമ്പനിയുടെ ഏറ്റവും പുതിയ അപ്ഡേറ്റ് 18.2.1 പ്രധാനപ്പെട്ട ബഗ് പരിഹാരങ്ങള്‍ നല്‍കുന്നു.

ആന്‍ഡ്രോയിഡ് 15-ലേക്ക് അപ്ഗ്രേഡ് ചെയ്ത 10-ല്‍ 4 ആന്‍ഡ്രോയിഡ് ഉപയോക്താക്കളും ബുദ്ധിമുട്ടുകള്‍ നേരിടുന്നുണ്ടെന്നും സര്‍വേ ചൂണ്ടിക്കാട്ടുന്നു.

ആന്‍ഡ്രോയിഡ് ഉപയോക്താക്കളില്‍ നിന്ന് ലഭിച്ച മൊത്തം 15,731 പ്രതികരണങ്ങളില്‍, 33 ശതമാനം ആപ്പുകള്‍ ഹാംഗ് ചെയ്യുന്നത് അവരുടെ ഏറ്റവും വലിയ പ്രശ്നമാണെന്ന് പറയുന്നു. 12 ശതമാനം പേര്‍ മറ്റ് പ്രശ്നങ്ങള്‍ നേരിടുന്നു. 44 ശതമാനം പേര്‍ ആന്‍ഡ്രോയിഡ് 15-ലേക്ക് അപ്ഗ്രേഡ് ചെയ്തതിന് ശേഷം തങ്ങള്‍ക്ക് ഒരു പ്രശ്നവും നേരിടുന്നില്ലെന്ന് പങ്കിട്ടു. പ്രതികരിച്ചവരില്‍ 11 ശതമാനം പേരും വ്യക്തമായ ഉത്തരം നല്‍കിയില്ല. 

ആപ്പിളിനും ഗൂഗിളിനും അയച്ച ഇമെയില്‍ ചോദ്യങ്ങള്‍ക്ക് സര്‍വേ റിപ്പോര്‍ട്ടിന് മറുപടിയൊന്നും ലഭിച്ചില്ലെന്നും റിപ്പോര്‍ട്ട് പറയുന്നു.