നോണ്‍ കോമ്പീറ്റ് കരാറില്‍ ഒപ്പുവെച്ച് ടിവിഎസ് ചെയര്‍മാന്റെ കുടുംബം
- ടിവിഎസ് മോട്ടോര്‍ കമ്പനി ചെയര്‍മാന്‍ എമറിറ്റസ് വേണു ശ്രീനിവാസന്റെ കുടുംബാംഗങ്ങള്‍ ധാരണയില്‍ ഒപ്പു വച്ചതായി കമ്പനി അറിയിച്ചു.
- ഈ ധാരണാപത്രത്തില്‍ കമ്പനി ഒരു കക്ഷിയല്ലെന്ന് ടിവിഎസ് മോട്ടോര്‍ കമ്പനി റെഗുലേറ്ററി ഫയലിംഗില്‍ പറഞ്ഞു
- ഈ ധാരണാപത്രം കമ്പനിയുടെ ബിസിനസിനെ ഒരു തരത്തിലും പ്രതികൂലമായി ബാധിക്കുന്നില്ലെന്നാണ് ടിവിഎസ് അറിയിച്ചിരിക്കുന്നത്
ബിസിനസ് മേഖലകളിലെ മത്സരവും ടിവിഎസ് ഉള്‍പ്പെടെയുള്ള ചില വ്യാപാരമുദ്രകളുടെ ഉപയോഗവും ഒഴിവാക്കുന്നതിനായി ടിവിഎസ് മോട്ടോര്‍ കമ്പനി ചെയര്‍മാന്‍ എമറിറ്റസ് വേണു ശ്രീനിവാസന്റെ കുടുംബാംഗങ്ങള്‍ ധാരണയില്‍ ഒപ്പു വച്ചതായി കമ്പനി അറിയിച്ചു.
ട്രാക്ടര്‍സ് ആന്‍ഡ് ഫാം എക്യുപ്മെന്റ് ലിമിറ്റഡിന്റെ ചെയര്‍മാനും മാനേജിംഗ് ഡയറക്ടറുമായ വേണു ശ്രീനിവാസന്‍, TVS മോട്ടോര്‍ കമ്പനിയുടെ ഡയറക്ടറും TAFE മോട്ടോഴ്സ് ആന്‍ഡ് ട്രാക്ടേഴ്സ് ലിമിറ്റഡിന്റെ ഡെപ്യൂട്ടി മാനേജിംഗ് ഡയറക്ടറുമായ മല്ലിക ശ്രീനിവാസന്‍, ടിവിഎസ് മോട്ടോര്‍ കമ്പനി മാനേജിംഗ് ഡയറക്ടര്‍മാരായ, ലക്ഷ്മി വേണു, സുദര്‍ശന്‍ വേണു എന്നിവര്‍ 2024 മാര്‍ച്ച് 21-ന് ഒരു ധാരണാപത്രത്തില്‍ ഒപ്പുവച്ചു.
ഈ ധാരണാപത്രത്തില്‍ കമ്പനി ഒരു കക്ഷിയല്ലെന്ന് ടിവിഎസ് മോട്ടോര്‍ കമ്പനി റെഗുലേറ്ററി ഫയലിംഗില്‍ പറഞ്ഞു.
വേണുവിന്റെയും മല്ലിക ശ്രീനിവാസന്റെയും മക്കളാണ് ലക്ഷ്മി വേണുവും സുദര്‍ശന്‍ വേണുവും.
ധാരണാപത്രത്തിന് കീഴില്‍, സുദര്‍ശന്‍ വേണുവും തന്റെ നിയന്ത്രണത്തിലുള്ള വ്യക്തികളും, അലുമിനിയം, മഗ്‌നീഷ്യം ഡൈ കാസ്റ്റിംഗുകള്‍ അല്ലെങ്കില്‍ ഒഇഎമ്മുകള്‍ക്കായുള്ള മെഷീന്‍ ചെയ്ത കാസ്റ്റിംഗുകള്‍ അല്ലെങ്കില്‍ അതിനുശേഷമുള്ള രൂപകല്‍പ്പന, നിര്‍മ്മാണം, വിതരണം എന്നിവ ഉള്‍പ്പെടെയുള്ള ചില ബിസിനസ്സുകളുമായി ബന്ധപ്പെട്ട് ടിവിഎസ് ഉള്‍പ്പെടെയുള്ള ചില വ്യാപാരമുദ്രകള്‍ ഉപയോഗിക്കില്ലെന്ന് സമ്മതിച്ചിട്ടുണ്ട്.
കൂടാതെ, ട്രാക്ടറുകള്‍ ഉള്‍പ്പെടെയുള്ള കാര്‍ഷിക യന്ത്രങ്ങള്‍, സ്വയം പ്രവര്‍ത്തിപ്പിക്കുന്ന കാര്‍ഷിക ഉപകരണങ്ങള്‍ എന്നിവയുടെ ബിസിനസ്സ് ഉള്‍പ്പെടെ, ഒരു നിശ്ചിത കാലയളവിലേക്ക് മത്സര രംഗത്തേക്കില്ലെന്നും അദ്ദേഹം സമ്മതിച്ചിട്ടുണ്ട്.
മറുവശത്ത്, മല്ലിക ശ്രീനിവാസനും ഡോ. ലക്ഷ്മി വേണുവും 'ഇരുചക്ര, മുച്ചക്ര വാഹനങ്ങള്‍, സാമ്പത്തിക സേവനങ്ങള്‍ എന്നിവയുള്‍പ്പെടെയുള്ള ചില ബിസിനസ്സുകളുമായി ബന്ധപ്പെട്ട് തങ്ങളും അവരുടെ നിയന്ത്രണത്തിലുള്ള വ്യക്തികളും ചില വ്യാപാരമുദ്രകള്‍ (ടിവിഎസ് ഉള്‍പ്പെടെ) ഉപയോഗിക്കില്ലെന്ന് സമ്മതിച്ചിട്ടുണ്ട്.
ഈ ധാരണാപത്രം കമ്പനിയുടെ ബിസിനസിനെ ഒരു തരത്തിലും പ്രതികൂലമായി ബാധിക്കുന്നില്ലെന്നാണ് ടിവിഎസ് അറിയിച്ചിരിക്കുന്നത്.