സീരീസ് ഇ റൗണ്ട് ഫണ്ടിംഗിലൂടെ 200 ദശലക്ഷം ഡോളർ സമാഹരിച്ചതായി ഓൺലൈൻ പലചരക്ക് കമ്പനിയായ സെപ്റ്റോ വെള്ളിയാഴ്ച അറിയിച്ചു, കമ്പനിക്ക് 140 കോടി ഡോളര്‍ അഥവാ 1.4 ബില്യണ്‍ ഡോളറിന്‍റെ മൂല്യനിർണ്ണയത്തിലാണ് ഫണ്ടിംഗ് നടന്നത്. ഇതോടെ 2023ലെ ഇന്ത്യയുടെ ആദ്യത്തെ യൂണികോൺ ആയി സെപ്റ്റോ മാറിയിരിക്കുകയാണ്. ഇന്ത്യയുടെ സ്‍റ്റാര്‍പ്പ് മേഖല അല്‍പ്പകാലമായി നേരിടുന്ന ഫണ്ടിംഗ് വരള്‍ച്ചയുടെ പശ്ചാത്തലത്തില്‍ പ്രതീക്ഷകള്‍ ഉണര്‍ത്തുന്ന വാര്‍ത്തയായാണ് ഇത് വീക്ഷിക്കപ്പെടുന്നത്.
യുഎസ് പ്രൈവറ്റ് മാർക്കറ്റ് നിക്ഷേപകരായ സ്‍റ്റെപ്പ്സ്‍റ്റോണ്‍ ഗ്രൂപ്പാണ് ഫണ്ട് ശേഖരണത്തിന് നേതൃത്വം നൽകിയത്, ഇത് ഒരു ഇന്ത്യൻ കമ്പനിയിൽ ഗ്രൂപ്പിന്‍റെ നേരിട്ടുള്ള ആദ്യ നിക്ഷേപമാണ് ഇത്. 75 ദശലക്ഷം ഡോളറിന്‍റെ നിക്ഷേപമാണ് ഗ്രൂപ്പ് നടത്തിയതെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. കാലിഫോർണിയ ആസ്ഥാനമായുള്ള ഉപഭോക്തൃ കേന്ദ്രീകൃത വെഞ്ച്വർ ക്യാപിറ്റൽ സ്ഥാപനമായ ഗുഡ്‌വാട്ടർ ക്യാപിറ്റൽ പുതിയ നിക്ഷേപകരായി എത്തി. നെക്സസ് വെഞ്ച്വർ പാർട്ണേഴ്സ്, ഗ്ലേഡ് ബ്രൂക്ക് ക്യാപിറ്റൽ, ലാച്ചി ഗ്രൂം തുടങ്ങിയ നിലവിലുള്ള നിക്ഷേപകരും റൗണ്ടിൽ പങ്കെടുത്തു.
സ്റ്റാൻഫോർഡ് യൂണിവേഴ്‌സിറ്റി ഡ്രോപ്പ്ഔട്ടായ ആദിത് പാലിച്ചയും കൈവല്യ വോഹ്‌റയും ചേർന്ന് 2021-ൽ സ്ഥാപിച്ച സെപ്റ്റോ, അടുത്ത രണ്ടോ മൂന്നോ വർഷത്തിനുള്ളിൽ ഐപിഒ-യിലേക്ക് നീങ്ങുന്നത് പരിഗണിക്കുന്നു. ഏഴ് നഗരങ്ങളിൽ ചിപ്‌സ്, ഡയപ്പറുകൾ, നോട്ട്ബുക്കുകൾ, പാചക എണ്ണ, സിഗരറ്റ് തുടങ്ങിയ നിരവധി ഉല്‍പ്പന്നങ്ങള്‍ 7 നഗരങ്ങളിലേക്ക് കമ്പനി എത്തിക്കുന്നു.
2022ല്‍ സീരീസ് ഡി ഫണ്ടിംഗ് റൗണ്ടിൽ സെപ്റ്റോ 200 മില്യൺ ഡോളർ സമാഹരിച്ചിരുന്നു. യുഎസ് ടെക്‌നോളജി സ്റ്റാർട്ടപ്പ് ആക്‌സിലറേറ്ററായ വൈ കോമ്പിനേറ്റേഴ്‌സ് കണ്ടിന്യുറ്റി ഫണ്ടിന്റെ നേതൃത്വത്തിലായിരുന്നു ഈ റൗണ്ട് നടന്നത്. അന്ന് 900 ദശലക്ഷം ഡോളറാണ് കമ്പനിയുടെ മൂല്യം കണക്കാക്കിയത്.