മിനറല്‍ വാട്ടറിലും പിടിവീണു; ഇനി അപകടസാധ്യതയുള്ള വിഭാഗം
- പായ്ക്ക് ചെയ്ത കുടിവെള്ളവും മിനറല്‍ വാട്ടറും ഇനി ഉയര്‍ന്ന അപകട സാധ്യതയുള്ള വിഭാഗം
- ഈ ഉല്‍പ്പന്നങ്ങള്‍ നിര്‍ബന്ധിത പരിശോധനകള്‍ക്കും മൂന്നാം കക്ഷി ഓഡിറ്റിനും വിധേയമായിരിക്കും
- ഈ നടപടി ഉയര്‍ന്ന അപകടസാധ്യതയുള്ള വിഭാഗത്തില്‍പ്പെടുന്ന ഉല്‍പ്പന്നങ്ങള്‍ക്ക് സുരക്ഷ ഉറപ്പാക്കുന്നു
ഫുഡ് സേഫ്റ്റി ആന്‍ഡ് സ്റ്റാന്‍ഡേര്‍ഡ് അതോറിറ്റി ഓഫ് ഇന്ത്യ (എഫ്എസ്എസ്എഐ) പായ്ക്ക് ചെയ്ത കുടിവെള്ളവും മിനറല്‍ വാട്ടറും 'ഉയര്‍ന്ന അപകടസാധ്യതയുള്ള ഭക്ഷണ വിഭാഗമായി' തരംതിരിക്കാന്‍ തീരുമാനിച്ചു. ഇനി ഈ ഉല്‍പ്പന്നങ്ങള്‍ നിര്‍ബന്ധിത പരിശോധനകള്‍ക്കും മൂന്നാം കക്ഷി ഓഡിറ്റിനും വിധേയമായിരിക്കും.
ഈ ഉല്‍പ്പന്നങ്ങള്‍ക്കായി ബ്യൂറോ ഓഫ് ഇന്ത്യന്‍ സ്റ്റാന്‍ഡേര്‍ഡ്സില്‍ (ബിഐഎസ്) നിന്ന് സര്‍ട്ടിഫിക്കേഷന്റെ ആവശ്യകത നീക്കം ചെയ്യാനുള്ള സര്‍ക്കാരിന്റെ ഒക്ടോബറിലെ തീരുമാനത്തെ തുടര്‍ന്നാണ് മാറ്റം.
ഈ വിഭാഗത്തില്‍ വരുന്ന ഭക്ഷ്യ ഉല്‍പ്പന്നങ്ങള്‍ നിര്‍ബന്ധിത അപകടസാധ്യത അടിസ്ഥാനമാക്കിയുള്ള പരിശോധനകള്‍ക്ക് വിധേയമാണ്. പാക്കേജ് ചെയ്ത കുടിവെള്ളം, മിനറല്‍ വാട്ടര്‍ വിഭാഗങ്ങള്‍ ഉള്‍പ്പെടുത്തുന്നതിന് അപകടസാധ്യത അടിസ്ഥാനമാക്കിയുള്ള പരിശോധനാ നയത്തില്‍ ഭേദഗതികള്‍ വരുത്തിയതായി റെഗുലേറ്റര്‍ അതിന്റെ ഉത്തരവില്‍ സൂചിപ്പിച്ചു. ഇതോടെ, പാക്കേജ്ഡ് കുടിവെള്ളത്തിന്റെയും മിനറല്‍ വാട്ടറിന്റെയും നിര്‍മ്മാതാക്കള്‍ എല്ലാ വര്‍ഷവും അപകടസാധ്യത അടിസ്ഥാനമാക്കിയുള്ള പരിശോധനയ്ക്ക് വിധേയരാവും. ലൈസന്‍സ് അല്ലെങ്കില്‍ രജിസ്‌ട്രേഷന്‍ അനുവദിക്കുന്നതിന് മുമ്പ് അവര്‍ പരിശോധനയ്ക്ക് വിധേയരാകും.
ഈ നീക്കം ഉയര്‍ന്ന അപകടസാധ്യതയുള്ള വിഭാഗത്തില്‍ പെടുന്ന ഉല്‍പ്പന്നങ്ങള്‍ക്ക് കര്‍ശനമായ സുരക്ഷ ഉറപ്പാക്കുന്നു.
എഫ്എസ്എസ്എഐയുടെ ഉത്തരവ് അനുസരിച്ച്, ഉയര്‍ന്ന അപകടസാധ്യതയുള്ള ഭക്ഷണ വിഭാഗങ്ങളിലെ ബിസിനസുകള്‍, എഫ്എസ്എസ്എഐ അംഗീകരിച്ച മൂന്നാം കക്ഷി ഭക്ഷ്യ സുരക്ഷാ ഏജന്‍സികളുടെ വാര്‍ഷിക ഓഡിറ്റിന് വിധേയമാകേണ്ടതുണ്ട്. ഉപഭോക്താക്കള്‍ക്കായി ഈ ഉല്‍പ്പന്നങ്ങളുടെ സുരക്ഷയും ഗുണനിലവാര നിലവാരവും മെച്ചപ്പെടുകയാണ് ലക്ഷ്യം.
മുമ്പ്, പാക്കേജുചെയ്ത കുടിവെള്ള വ്യവസായം നിയന്ത്രണങ്ങള്‍ ലളിതമാക്കാന്‍ ആവശ്യപ്പെട്ടിരുന്നു. ബിഐഎസില്‍ നിന്നും എഫ്എസ്എസ്എഐയില്‍ നിന്നും ഇരട്ട സര്‍ട്ടിഫിക്കേഷന്‍ ആവശ്യകതകള്‍ നീക്കം ചെയ്യണമെന്നും അവര്‍ അഭ്യര്‍ത്ഥിച്ചിരുന്നു.