കുടുംബശ്രീ ഹരിതകര്‍മ സേനാംഗങ്ങള്ക്ക് 1000 രൂപ ഓണം ഉത്സവബത്ത അനുവദിച്ചു
സംസ്ഥാനത്ത് കുടുംബശ്രീയുടെ കീഴിലുള്ള ഹരിതകര്‍മ സേനാംഗങ്ങള്ക്ക് ഓണത്തിന് ഉത്സവ ബത്തയായി 1000 രൂപ പ്രഖ്യാപിച്ച് സർക്കാർ. തദ്ദേശസ്ഥാപനങ്ങളുടെ തനത് ഫണ്ടില്‍ നിന്നും ആയിരം രൂപ വീതം അനുവദിക്കുന്നതിന് കോര്‍പ്പറേഷനുകള്‍, മുനിസിപ്പാലിറ്റികള്‍, ഗ്രാമപഞ്ചായത്തുകള്‍ എന്നിവയ്ക്ക് അനുമതി നൽകി സര്‍ക്കാര്‍ ഉത്തരവായി.
2023-ലും ഹരിതകര്‍മ സേനാംഗങ്ങള്ക്ക് ഉത്സവബത്ത അനുവദിച്ചിരുന്നു. ഈ വര്‍ഷവും ഉത്സവബത്ത അനുവദിക്കണമെന്ന് അഭ്യര്‍ഥിച്ചു കൊണ്ട് കുടുംബശ്രീ എക്സിക്യൂട്ടീവ് ഡയറക്ടര്‍ സര്‍ക്കാരിന് കത്തു നല്‍കിയിരുന്നു. ഇത് പരിഗണിച്ചാണ് നടപടി. സംസ്ഥാനത്തെ 34,627 ഹരിതകര്‍മ സേനാംഗങ്ങള്‍ക്കും ആയിരം രൂപ വീതം ലഭിക്കും.
ഓണം പ്രമാണിച്ച് സംസ്ഥാനത്തെ പൊതുമേഖല ജീവനക്കാര്‍ക്കും 4000 രൂപ ബോണസ് നല്‍കും. ബോണസിന് അര്‍ഹത ഇല്ലാത്തവര്‍ക്ക് പ്രത്യേക ഉത്സവബത്തയായി 2750 രൂപയായി നല്‍കും.