മെഡിക്കല്‍ ഉപകരണ വ്യവസായം; കേരളം അനുയോജ്യമെന്ന് വ്യവസായ മന്ത്രി
- മെഡിക്കല്‍ ഉപകരണങ്ങളുടെ വ്യവസായം അഭിവൃദ്ധി പ്രാപിക്കാന്‍ ആവശ്യമായ എല്ലാ മാനദണ്ഡങ്ങളും കേരളം പാലിക്കുന്നു
- കേരള ലൈഫ് സയന്‍സസ് പാര്‍ക്കും വരാനിരിക്കുന്ന കേരള റബ്ബര്‍ പാര്‍ക്കും മെഡിക്കല്‍ ഉപകരണ വ്യവസായത്തിന് പിന്തുണ നല്‍കും
മെഡിക്കല്‍ ഉപകരണ വ്യവസായത്തിന് ഏറെ സഹായകമായ ആവാസവ്യവസ്ഥയാണ് കേരളത്തിലുള്ളതെന്ന് വ്യവസായ മന്ത്രി പി രാജീവ്. ലോകോത്തര ആരോഗ്യ സംരക്ഷണ സംവിധാനങ്ങള്‍ ഇന്ന് കേരളത്തിലുണ്ട്. അറേബ്യന്‍, ആഫ്രിക്കന്‍, കിഴക്കന്‍ യൂറോപ്യന്‍ രാജ്യങ്ങളില്‍ നിന്ന് ചികിത്സയ്ക്കായി സംസ്ഥാനത്തേക്ക് രോഗികള്‍ എത്തുന്നുണ്ടെന്നും അദ്ദേഹം കൂട്ടിച്ചേര്‍ത്തു.
മെഡിക്കല്‍ ഉപകരണങ്ങളുടെ വ്യവസായം അഭിവൃദ്ധി പ്രാപിക്കാന്‍ ആവശ്യമായ എല്ലാ മാനദണ്ഡങ്ങളും കേരളം പാലിക്കുന്നുണ്ടെന്നും ആരോഗ്യ സംരക്ഷണ മേഖലയ്ക്ക് ലോകമെമ്പാടുമുള്ള സംസ്ഥാനത്തിന്റെ അംഗീകാരം ഒരു പ്രധാന സമ്പത്താണെന്നും അദ്ദേഹം പറഞ്ഞു.
കേരള സ്റ്റേറ്റ് ഇന്‍ഡസ്ട്രിയല്‍ ഡെവലപ്മെന്റ് കോര്‍പ്പറേഷന്റെ (കെഎസ്‌ഐഡിസി) കീഴിലുള്ള കേരള ലൈഫ് സയന്‍സസ് ഇന്‍ഡസ്ട്രീസ് പാര്‍ക്ക്സ് കേരള (കെഎല്‍ഐപി) സംഘടിപ്പിച്ച മെഡിക്കല്‍ ഉപകരണങ്ങളുടെയും ബയോടെക്നോളജി മേഖലയിലെയും പ്രതിനിധികളുമായി സംവദിക്കുകയായിരുന്നു അദ്ദേഹം.
തിരുവനന്തപുരത്ത് കേരള ലൈഫ് സയന്‍സസ് പാര്‍ക്കും കോട്ടയം ജില്ലയിലെ വെള്ളൂരില്‍ വരാനിരിക്കുന്ന കേരള റബ്ബര്‍ പാര്‍ക്കും മെഡിക്കല്‍ ഉപകരണ വ്യവസായത്തിന് മികച്ച പിന്തുണ നല്‍കുമെന്നും റബ്ബര്‍ പാര്‍ക്കില്‍ സ്ഥലം പാട്ടത്തിന് നല്‍കുന്നതിനുള്ള നടപടികള്‍ ഉടന്‍ ആരംഭിക്കുമെന്നും വ്യവസായ മന്ത്രി പറഞ്ഞു.
അടുത്ത വര്‍ഷം ആദ്യം നടക്കുന്ന ആഗോള നിക്ഷേപക സംഗമത്തിന്റെ ബില്‍ഡ്-അപ്പായി സര്‍ക്കാര്‍ ആസൂത്രണം ചെയ്തിട്ടുള്ള കോണ്‍ക്ലേവുകളുടെ ഒരു പരമ്പരയ്ക്കൊപ്പമാണ് ഇന്നത്തെ ആശയവിനിമയമെന്ന് കെഎസ്‌ഐഡിസി പ്രസ്താവനയില്‍ പറഞ്ഞു.
ഗവണ്‍മെന്റിന്റെ പുതിയ വ്യാവസായിക നയത്തില്‍ 22 മുന്‍ഗണനാ മേഖലകള്‍ കണ്ടെത്തിയിട്ടുണ്ടെന്നും അവ നിക്ഷേപക സംഗമത്തില്‍ പ്രദര്‍ശിപ്പിക്കുമെന്നും അതില്‍ പറയുന്നു.
ഈസ് ഓഫ് ഡൂയിംഗ് ബിസിനസ് വര്‍ധിപ്പിക്കുന്നതിനുള്ള സൗകര്യങ്ങളായ പരാതി പരിഹാര സംവിധാനം, കേന്ദ്രീകൃത സൂക്ഷ്മപരിശോധന സംവിധാനം, വ്യാവസായിക മേഖലയ്ക്ക് ഇന്‍ഷുറന്‍സ് തുടങ്ങിയ സൗകര്യങ്ങള്‍ ഏര്‍പ്പെടുത്തിയിട്ടുണ്ട്, മലിനീകരണമുണ്ടാക്കുന്ന വന്‍കിട കമ്പനികള്‍ കേരളത്തില്‍ പ്രായോഗികമല്ലെന്ന് മന്ത്രി ചൂണ്ടിക്കാട്ടി.
കെഎസ്‌ഐഡിസി ചെയര്‍മാന്‍ പോള്‍ ആന്റണി, മാനേജിങ് ഡയറക്ടര്‍ എസ് ഹരികിഷോര്‍, എക്‌സിക്യൂട്ടീവ് ഡയറക്ടര്‍ ഹരികൃഷ്ണന്‍ ആര്‍, കേരള ലൈഫ് സയന്‍സ് ഇന്‍ഡസ്ട്രീസ് പാര്‍ക്ക് (കെഎല്‍ഐപി) സിഇഒ ഡോ. പ്രവീണ്‍ കെ.എസ്, സീനിയര്‍ മാനേജര്‍ സുനിത ചന്ദ്രന്‍, അഗപ്പെ ഡയഗ്‌നോസ്റ്റിക്‌സ് എം.ഡി തോമസ് ജോണ്‍ എന്നിവര്‍ ചടങ്ങില്‍ പങ്കെടുത്തു.
അടുത്തിടെ കെഎസ്‌ഐഡിസി നിക്ഷേപകര്‍ക്കായി ചെന്നൈയില്‍ റോഡ്‌ഷോ നടത്തിയിരുന്നു. ബെംഗളൂരു, മുംബൈ, ഡല്‍ഹി, ദുബായ്, ഖത്തര്‍, സൗദി അറേബ്യ എന്നിവിടങ്ങളില്‍ ഇത്തരം കൂടുതല്‍ റോഡ് ഷോകള്‍ നടത്തും. അടുത്ത വര്‍ഷം ഫെബ്രുവരിയില്‍ കൊച്ചിയില്‍ നടക്കുന്ന ആഗോള നിക്ഷേപക സംഗമമാണ് പരമ്പരയുടെ സമാപനം.