ദേശീയ പാതയോരങ്ങളില്‍ ഹെലിപാഡുകള്‍ നിര്‍മിക്കുമെന്ന് ഗഡ്‍കരി

ദേശീയ പാതയോരത്തെ 600ലധികം ലൊക്കേഷനുകളില്‍ ഹെലിപാഡുകളും ഡ്രോൺ ലാൻഡിംഗ് സൗകര്യങ്ങളും ഉള്‍പ്പടെയുള്ള ലോകോത്തര പാതയോര സൗകര്യങ്ങൾ (ഡബ്ല്യുഎസ്എ) എൻഎച്ച്എഐ വികസിപ്പിക്കുന്നു. റോഡപകടങ്ങൾ, അവയവം മാറ്റിവയ്ക്കൽ തുടങ്ങിയ മെഡിക്കൽ അത്യാഹിതങ്ങൾ കൈകാര്യം ചെയ്യാൻ ഈ സൗകര്യങ്ങൾ സഹായിക്കുമെന്ന് കേന്ദ്ര റോഡ് ഗതാഗത മന്ത്രി നിതിന്‍ ഗഡ്‍കരി പ്രസ്താവനയില്‍ പറഞ്ഞു

നല്ല ടോയ്‌ലറ്റുകൾ, പാർക്കിംഗ്, റെസ്റ്റോറന്റുകൾ തുടങ്ങിയ അടിസ്ഥാന സൗകര്യങ്ങൾക്ക് പുറമെ; ട്രക്ക് ഡ്രൈവർമാർക്കുള്ള ഡോർമിറ്ററികൾ, ഇലക്ട്രിക് വാഹനങ്ങൾ ചാർജിംഗ്, ട്രോമ സെന്ററുകൾ എന്നിവയും ദേശീയ പാതകള്‍ക്ക് സമീപം സ്ഥാപിക്കും.

കരകൗശല വസ്തുക്കളും പ്രാദേശികമായി നിർമ്മിക്കുന്ന ഉൽപ്പന്നങ്ങളും പ്രോത്സാഹിപ്പിക്കുന്നതിന് റീട്ടെയിൽ ഔട്ട്‌ലെറ്റുകളും ഉണ്ടാകും, പിഎം ഗതി ശക്തി നാഷണൽ മാസ്റ്റർ പ്ലാൻ (എൻഎംപി) ബൃഹത്തായ ഉദ്യമമാണെന്നും ലോജിസ്റ്റിക് ചെലവ് കുറയ്ക്കാൻ ഇത് സഹായിക്കുമെന്നും ഗഡ്കരി പറഞ്ഞു. യുഎസ് പോലുള്ള മറ്റ് വികസിത സമ്പദ്‌വ്യവസ്ഥകളിലെ 8-9 ശതമാനവുമായി താരതമ്യം ചെയ്യുമ്പോൾ ഇന്ത്യയിൽ ലോജിസ്റ്റിക്‌സ് ചെലവ് ജിഡിപിയുടെ 13-14 ശതമാനം എന്ന കൂടിയ നിലയിലാണെന്നും അദ്ദേഹം ചൂണ്ടിക്കാട്ടി.

ഉയർന്ന ലോജിസ്റ്റിക്സ് ചെലവ് ആഗോള വിപണിയിൽ 'ഇന്ത്യയിൽ നിർമ്മിച്ച' ഉൽപ്പന്നങ്ങളുടെ മത്സരക്ഷമത കുറയ്ക്കുന്നു. ലോജിസ്റ്റിക്‌സ് ചെലവ് ജിഡിപിയുടെ 9 ശതമാനമായി കുറയ്ക്കാനാണ് സർക്കാർ നിലവില്‍ ലക്ഷ്യംവെക്കുന്നതെന്നും ഗഡ്‍കരി കൂട്ടിച്ചേർത്തു.