കേരളത്തില്‍ നിക്ഷേപിക്കാന്‍ കമ്പനികള്‍ക്ക് താല്‍പര്യമെന്ന് വ്യവസായമന്ത്രി
- കേരളത്തിന്റെ ഗ്രീന്‍ ഹൈഡ്രജന്‍ ക്ലസ്റ്റര്‍ പദ്ധതിക്ക് വേള്‍ഡ് ഇക്കണോമിക് ഫോറത്തില്‍ അംഗീകാരം
- കാര്‍ബണ്‍ എമിഷന്‍ കുറയ്ക്കുന്നതിന് ഹൈഡ്രജന്‍ ക്ലസ്റ്റര്‍ പ്രോഗ്രാം ലക്ഷ്യമിടുന്നു
ഡീകാര്‍ബണൈസ് ചെയ്യാനുള്ള ശ്രമങ്ങള്‍ക്കുള്ള ആദ്യത്തെ പദ്ധതിയായി കേരളത്തിന്റെ ഗ്രീന്‍ ഹൈഡ്രജന്‍ ക്ലസ്റ്റര്‍ പദ്ധതി വേള്‍ഡ് ഇക്കണോമിക് ഫോറം അംഗീകരിച്ചതായി സംസ്ഥാന വ്യവസായ മന്ത്രി പി രാജീവ്. വേള്‍ഡ് ഇക്കണോമിക് ഫോറം അംഗീകരിച്ചത് 13 പദ്ധതികളാണ്. ദാവോസില്‍ സമാപിച്ച വേള്‍ഡ് ഇക്കണോമിക് ഫോറത്തില്‍ കേരളത്തെ പ്രതിനിധീകരിച്ച മറ്റ് പ്രതിനിധികള്‍ക്കൊപ്പം വിഴിഞ്ഞം കോണ്‍ക്ലേവിനോട് അനുബന്ധിച്ച് മാധ്യമങ്ങളെ അഭിസംബോധന ചെയ്ത് സംസാരിക്കുയായിരുന്നു അദ്ദേഹം.
എല്ലാ മേഖലകളിലും ഹരിതഗൃഹ വാതക ഉദ്വമനം കുറയ്ക്കുന്നതിനാണ് കേരള ഹൈഡ്രജന്‍ ക്ലസ്റ്റര്‍ പ്രോഗ്രാം രൂപകല്‍പ്പന ചെയ്തിരിക്കുന്നതെന്ന് അദ്ദേഹം പറഞ്ഞു. 1.2 ബില്യണ്‍ യുഎസ് ഡോളറിന്റെ നിര്‍ദേശങ്ങളാണ് പദ്ധതി നിര്‍ദ്ദേശിക്കുന്നത്.
ഡബ്ല്യുഇഎഫിന്റെ ആദ്യ പദ്ധതിയായി സംസ്ഥാനത്തിന്റെ പദ്ധതി പട്ടികപ്പെടുത്തിയത് വലിയ നേട്ടമാണെന്നും ഒരുമിച്ച് പ്രവര്‍ത്തിച്ചാല്‍ സംസ്ഥാനത്തേക്ക് മികച്ച നിക്ഷേപം കൊണ്ടുവരാന്‍ കേരളത്തിന് കഴിയുമെന്നാണ് ഇത് കാണിക്കുന്നതെന്നും രാജീവ് പറഞ്ഞു.
കേരള ഗ്രീന്‍ ഹൈഡ്രജന്‍ വാലി പദ്ധതിക്ക് വേള്‍ഡ് ഇക്കണോമിക് ഫോറത്തിന്റെ 55-ാമത് വാര്‍ഷിക യോഗത്തില്‍ അംഗീകാരം ലഭിച്ചതായി കേരള സ്റ്റേറ്റ് ഇന്‍ഡസ്ട്രിയല്‍ ഡെവലപ്മെന്റ് കോര്‍പ്പറേഷന്‍ (കെഎസ്‌ഐഡിസി) പുറത്തിറക്കിയ പ്രസ്താവനയിലും പറയുന്നു.
ഓസ്ട്രേലിയ, ബ്രസീല്‍, കൊളംബിയ, ഇന്ത്യ, നെതര്‍ലാന്‍ഡ്സ്, സൗദി അറേബ്യ, സ്വീഡന്‍, തായ്ലന്‍ഡ്, യുണൈറ്റഡ് കിംഗ്ഡം തുടങ്ങിയ രാജ്യങ്ങളില്‍ ഈ പദ്ധതികള്‍ വ്യാപിച്ചുകിടക്കുന്നു.
സംസ്ഥാനത്തിന്റെ കാര്‍ബണ്‍ എമിഷന്റെ ഏകദേശം 50 ശതമാനം വരുന്ന മേഖലകളില്‍ അത് കുറയ്ക്കുന്നതിനാണ് പദ്ധതി രൂപകല്‍പ്പന ചെയ്തത്.
ചീഫ് സെക്രട്ടറി, വ്യവസായ സെക്രട്ടറി, സര്‍ക്കാര്‍ പ്രിന്‍സിപ്പല്‍ സെക്രട്ടറി എന്നിവര്‍ ഉള്‍പ്പെട്ടതിനാല്‍ ദാവോസിലേക്കുള്ള കേരളത്തിന്റെ പ്രതിനിധി സംഘത്തെ നിക്ഷേപകര്‍ ഗൗരവത്തോടെയാണ് വീക്ഷിച്ചതെന്ന് മന്ത്രി പറഞ്ഞു.
ദാവോസില്‍ വ്യവസായ പ്രമുഖരുമായി 70-ലധികം വണ്‍-ടു-വണ്‍ മീറ്റിംഗുകള്‍ നടത്തിയ രാജീവ്, അവരില്‍ പലരും സംസ്ഥാനത്ത് നിക്ഷേപം നടത്തുന്നതില്‍ അതീവ താല്‍പര്യം പ്രകടിപ്പിച്ചിട്ടുണ്ടെന്നും ഇന്‍വെസ്റ്റ് കേരള ഗ്ലോബല്‍ സമ്മിറ്റ് 2025-ല്‍ (ഐകെജിഎസ് 2025) പങ്കെടുക്കുമെന്നും പ്രതീക്ഷിക്കുന്നു.
നിരവധി ആഗോള കമ്പനികള്‍ തങ്ങളുടെ താല്‍പ്പര്യങ്ങള്‍ പ്രകടിപ്പിച്ചിട്ടുണ്ടെന്നും അവരുടെ നിക്ഷേപത്തിന്റെ ആകെ തുക ഫെബ്രുവരി 21 അല്ലെങ്കില്‍ 22 നകം വെളിപ്പെടുത്തുമെന്നും അദ്ദേഹം പറഞ്ഞു.