അദാനി ഗ്രൂപ്പിനെ വിടാതെ ഹിന്‍ഡന്‍ബര്‍ഗ് റിസര്‍ച്ച്
- സ്വിസ് മീഡിയ ഔട്ട്ലെറ്റ് റിപ്പോര്‍ട്ട് ഉദ്ധരിച്ചാണ് ഹിന്‍ഡന്‍ബര്‍ഗ് ആരോപണം ഉന്നയിച്ചത്
- കമ്പനി അക്കൗണ്ടുകളൊന്നും ഏതെങ്കിലും അധികാരികളുടെ പിടിച്ചെടുക്കലിന് വിധേയമായിട്ടില്ലെന്ന് അദാനി ഗ്രൂപ്പ്
- സ്വിസ് കോടതി തങ്ങളുടെ കമ്പനികളെ പരാമര്‍ശിച്ചിട്ടില്ലെന്നും അദാനി ഗ്രൂപ്പ്
അദാനി ഗ്രൂപ്പിനെതിരായ കള്ളപ്പണം വെളുപ്പിക്കല്‍ ആരോപണങ്ങളുടെ ഭാഗമായി സ്വിസ് അധികൃതര്‍ ഒന്നിലധികം സ്വിസ് ബാങ്ക് അക്കൗണ്ടുകളിലായി 310 മില്യണ്‍ ഡോളറിലധികം മരവിപ്പിച്ചതായി യുഎസ് ആസ്ഥാനമായുള്ള ഷോര്‍ട്ട് സെല്ലര്‍ ഹിന്‍ഡന്‍ബര്‍ഗ് റിസര്‍ച്ച്. എന്നാല്‍ ഈ ആരോപണം കമ്പനി ശക്തമായി നിഷേധിച്ചിട്ടുണ്ട്.
അദാനി ഗ്രൂപ്പിന്റെ മുന്‍നിരക്കാരനുമായി ബന്ധമുണ്ടെന്ന് ആരോപിച്ചാണ് ഫണ്ടുകള്‍ മരവിപ്പിച്ചതെന്ന് സ്വിസ് മീഡിയ ഔട്ട്ലെറ്റ് റിപ്പോര്‍ട്ട് ചെയ്ത വാര്‍ത്ത ഉദ്ധരിച്ചാണ് ഹിന്‍ഡന്‍ബര്‍ഗ് ഇക്കാര്യം അറിയിച്ചത്.
സ്വിസ് കോടതി നടപടികളില്‍ തങ്ങള്‍ക്ക് പങ്കില്ലെന്ന് പറഞ്ഞാണ് അടിസ്ഥാനരഹിതമായ ആരോപണങ്ങള്‍ അദാനി ഗ്രൂപ്പ് തള്ളിയത്. 'ഉന്നയിക്കപ്പെട്ട അടിസ്ഥാനരഹിതമായ ആരോപണങ്ങള്‍ ഞങ്ങള്‍ അസന്ദിഗ്ധമായി തള്ളിക്കളയുകയും നിഷേധിക്കുകയും ചെയ്യുന്നു. സ്വിസ് കോടതി നടപടികളില്‍ അദാനി ഗ്രൂപ്പിന് യാതൊരു പങ്കുമില്ല. ഞങ്ങളുടെ കമ്പനി അക്കൗണ്ടുകളൊന്നും ഏതെങ്കിലും അധികാരികളുടെ പിടിച്ചെടുക്കലിന് വിധേയമായിട്ടില്ല,' പ്രസ്താവനയില്‍ പറയുന്നു.
ആരോപണവിധേയമായ ഉത്തരവില്‍ പോലും, സ്വിസ് കോടതി ഞങ്ങളുടെ ഗ്രൂപ്പ് കമ്പനികളെ പരാമര്‍ശിച്ചിട്ടില്ല, അല്ലെങ്കില്‍ അത്തരം ഏതെങ്കിലും അതോറിറ്റിയില്‍ നിന്നോ റെഗുലേറ്ററി ബോഡിയില്‍ നിന്നോ വ്യക്തതയോ വിവരങ്ങളോ ഞങ്ങള്‍ക്ക് ലഭിച്ചിട്ടില്ല. ഞങ്ങളുടെ വിദേശ ഹോള്‍ഡിംഗ് ഘടന സുതാര്യമാണെന്ന് ഞങ്ങള്‍ ആവര്‍ത്തിക്കുന്നു- കമ്പനി അറിയിച്ചു.
ഹിന്‍ഡന്‍ബര്‍ഗ് റിസര്‍ച്ചിലെ ആക്ടിവിസ്റ്റ് നിക്ഷേപകര്‍ ആദ്യ ആരോപണങ്ങള്‍ ഉന്നയിക്കുന്നതിന് മുമ്പുതന്നെ ജനീവ പബ്ലിക് പ്രോസിക്യൂട്ടര്‍ ഓഫീസ് ഇന്ത്യന്‍ കമ്പനിയായ അദാനിയുടെ തെറ്റായ നടപടികളെക്കുറിച്ച് അന്വേഷിച്ചിരുന്നുവെന്ന് ഫെഡറല്‍ ക്രിമിനല്‍ കോടതിയുടെ (എഫ്‌സിസി) ഒരു വിധി വെളിപ്പെടുത്തുന്നതായി സ്വിസ് മാധ്യമമായ ഗോതം സിറ്റി അതിന്റെ റിപ്പോര്‍ട്ടില്‍ പറയുന്നു.