ദീപാവലി: മുംബൈയില്‍ പ്രോപ്പര്‍ട്ടി രജിസ്‌ട്രേഷന്‍ കുതിച്ചു
- കഴിഞ്ഞ വര്‍ഷം ദീപാവലി സീസണില്‍ മുംബൈയില്‍ രജിസ്റ്റര്‍ ചെയ്തത് 9,736 പ്രോപ്പര്‍ട്ടികള്‍
- മന്ദഗതിയിലായിരുന്ന ഭവന വില്‍പ്പന ഉത്സവ സീസണില്‍ കുതിച്ചു
- ദീപാവലിയും ദസറയും പ്രോപ്പര്‍ട്ടി വാങ്ങുന്നതിന് ഏറ്റവും ശുഭകരമായി കണക്കാക്കപ്പെടുന്നു
ദസറ, ദീപാവലി ഉത്സവങ്ങള്‍ കാരണം ഈ മാസം ഇതുവരെ മുംബൈയിലെ പ്രോപ്പര്‍ട്ടികളുടെ രജിസ്‌ട്രേഷന്‍ 12,500 യൂണിറ്റുകള്‍ കടന്നതായി റിയല്‍ എസ്റ്റേറ്റ് കണ്‍സള്‍ട്ടന്റ് അനറോക്ക്. ഒക്ടോബര്‍ 30 വരെയുള്ള കണക്കാണ് അനറോക്ക് പുറത്തുവിട്ടത്.
കഴിഞ്ഞ വര്‍ഷത്തെ അപേക്ഷിച്ച് ഈ ദീപാവലിക്ക് 29 ശതമാനം വര്‍ധനവാണ് ഉണ്ടായിരിക്കുന്നത്. കഴിഞ്ഞ വര്‍ഷം ദീപാവലി ആഘോഷിച്ച നവംബറില്‍ 9,736 പ്രോപ്പര്‍ട്ടികളായിരുന്നു മുംബൈയില്‍ രജിസ്റ്റര്‍ ചെയ്തിരുന്നത്.
'മുംബൈ ഉള്‍പ്പെടെയുള്ള മുംബൈ മെട്രോപൊളിറ്റന്‍ റീജിയണിലുടനീളം (എംഎംആര്‍) 2024-ന്റെ മൂന്നാം പാദത്തില്‍ ഭവന വില്‍പ്പന മന്ദഗതിയിലായിരുന്നു, എന്നാല്‍ ഉത്സവ പാദത്തിന്റെ ആദ്യ മാസത്തെ നഗരത്തിന്റെ വില്‍പ്പന ശ്രദ്ധേയമാണ്,' അനാറോക്ക് ചെയര്‍മാന്‍ അനുജ് പുരി പറഞ്ഞു.
ഈ ഒക്ടോബറില്‍ പ്രോപ്പര്‍ട്ടി രജിസ്‌ട്രേഷന്‍ വര്‍ദ്ധിക്കുന്നതിനുള്ള ഒരു പ്രധാന കാരണം ദസറയും ദീപാവലിയും ഒരേ മാസത്തില്‍ ആഘോഷിക്കപ്പെടുന്നു എന്നതാണെന്നും പുരി കൂട്ടിച്ചേര്‍ത്തു. കഴിഞ്ഞ വര്‍ഷം ദസറ ഒക്ടോബറിലും ദീപാവലി നവംബറിലും ആയിരുന്നു.
'ഈ രണ്ട് ഉത്സവങ്ങളും പ്രോപ്പര്‍ട്ടി വാങ്ങുന്നതിന് ഏറ്റവും ശുഭകരമായി കണക്കാക്കപ്പെടുന്നു, നിരവധി വാങ്ങുന്നവര്‍ അതിനനുസരിച്ച് അവരുടെ വാങ്ങലുകള്‍ക്ക് സമയം നല്‍കുന്നു,' പുരി പറഞ്ഞു.