താങ്ങാനാവുന്ന ഭവനങ്ങളുടെ വിപണിയില്‍ ഇടിവ്

പ്രോപ് ഇക്വിറ്റിയുടെ കണക്കനുസരിച്ച്, താങ്ങാനാവുന്നതും ഇടത്തരം വരുമാനമുള്ളവരുടെയും വീടുകളുടെ വിതരണം കഴിഞ്ഞ വര്‍ഷം 30 ശതമാനം ഇടിഞ്ഞ് 1.99 ലക്ഷം യൂണിറ്റായി. ഒമ്പത് പ്രധാന നഗരങ്ങളിലെ കണക്കാണിത്.

ഭൂരിഭാഗം ഇന്ത്യക്കാരും ജോലിക്കായി കുടിയേറുന്ന ഇന്ത്യയിലെ മികച്ച ഒമ്പത് നഗരങ്ങള്‍ 'ഭവന പ്രതിസന്ധിയിലേക്ക് ഉറ്റുനോക്കുകയാണെന്ന്' റിയല്‍ എസ്റ്റേറ്റ് ഡാറ്റാ അനലിറ്റിക്‌സ് സ്ഥാപനമായ പ്രോപ്ഇക്വിറ്റി ചൂണ്ടിക്കാട്ടി.

ആഡംബര ഭവനങ്ങളിലേക്ക് ഡെവലപ്പര്‍മാരുടെ ശ്രദ്ധ മാറിയതാണ് താങ്ങാനാവുന്നതും ഇടത്തരം വരുമാനമുള്ളതുമായ വീടുകളുടെ പുതിയ വിതരണത്തിലെ ഈ ഇടിവിന് കാരണം.

ഒമ്പത് നഗരങ്ങളിലുടനീളം താങ്ങാനാവുന്നതും ഇടത്തരം വരുമാനമുള്ളതുമായ വിഭാഗത്തിലുള്ള (ഒരു കോടി രൂപയോ അതില്‍ താഴെയോ ഉള്ള) വീടുകളുടെ വിതരണം മുന്‍വര്‍ഷത്തെ 2,83,323 യൂണിറ്റുകളില്‍ നിന്ന് 2024ല്‍ 1,98,926 യൂണിറ്റുകളായി കുറഞ്ഞു. 2022ല്‍ 3,10,216 യൂണിറ്റായിരുന്നു വിതരണം ചെയ്തത്.

'ഇന്ന്, ഇന്ത്യയിലെ ജനസംഖ്യയുടെ 8 ശതമാനവും ടയര്‍-1 നഗരങ്ങളിലാണ് താമസിക്കുന്നത്. അടുത്ത അഞ്ച് വര്‍ഷത്തിനുള്ളില്‍ ഈ എണ്ണം ഗണ്യമായി വര്‍ദ്ധിക്കുമെന്ന് പ്രതീക്ഷിക്കുന്നു. കൂടുതല്‍ ആളുകള്‍ ഈ നഗരങ്ങളിലേക്ക് തൊഴിലവസരങ്ങള്‍ക്കായി മാറുന്നതിനാലാണിത്,' പ്രോപ്ഇക്വിറ്റിയുടെ സ്ഥാപകനും സിഇഒയുമായ സമീര്‍ ജസുജ പറഞ്ഞു.

ഈ വിഭാഗത്തിലെ വിതരണത്തിന്റെ അഭാവം, സര്‍ക്കാര്‍ കൃത്യസമയത്ത് ശ്രദ്ധിച്ചില്ലെങ്കില്‍, ഓസ്ട്രേലിയയ്ക്കും കാനഡയ്ക്കും സമാനമായ ഭവന പ്രതിസന്ധിയിലേക്ക് രാജ്യത്തെ നയിക്കുമെന്നും അദ്ദേഹം കൂട്ടിച്ചേര്‍ത്തു.

വര്‍ധിച്ചുവരുന്ന കുടിയേറ്റവും വര്‍ധിച്ചുവരുന്ന അണുകുടുംബങ്ങളുടെ എണ്ണവും കണക്കിലെടുത്ത്, അടുത്ത 5 വര്‍ഷത്തിനുള്ളില്‍ ഈ നഗരങ്ങളില്‍ 1.5 കോടി വീടുകള്‍ ആവശ്യമായി വരുമെന്ന് കണക്കാക്കപ്പെടുന്നു,'' ജസുജ പറഞ്ഞു.

ചെന്നൈയില്‍ പുതിയ വിതരണം 13,852 യൂണിറ്റില്‍ നിന്ന് 12,743 യൂണിറ്റായി കുറഞ്ഞു. ഹൈദരാബാദ് 31,645 യൂണിറ്റില്‍ നിന്ന് 58 ശതമാനം ഇടിഞ്ഞ് 13,238 യൂണിറ്റിലെത്തി, കൊല്‍ക്കത്തയില്‍ 18,406 യൂണിറ്റുമായി താരതമ്യം ചെയ്യുമ്പോള്‍ 41 ശതമാനം കുറഞ്ഞ് 10,785 യൂണിറ്റായി.

ഒരു കോടി രൂപ വരെയുള്ള വീടുകളുടെ ലോഞ്ച് മുംബൈയില്‍ 31 ശതമാനം കുറഞ്ഞ് 8,763 യൂണിറ്റില്‍ നിന്ന് 6,062 യൂണിറ്റായി. നവി മുംബൈയില്‍, 23,584 യൂണിറ്റുകളേക്കാള്‍ പുതിയ വീടുകളുടെ വിതരണം 10 ശതമാനം ഇടിഞ്ഞ് 21,290 യൂണിറ്റിലെത്തി. താനെ 78,885 യൂണിറ്റില്‍ നിന്ന് 28 ശതമാനം ഇടിഞ്ഞ് 57,029 യൂണിറ്റിലെത്തി.

പൂനെ 75,256 യൂണിറ്റില്‍ നിന്ന് 33 ശതമാനം ഇടിഞ്ഞ് 50,095 യൂണിറ്റായി. ഡെല്‍ഹി-എന്‍സിആറിലെ പുതിയ ഭവന വിതരണം മുന്‍വര്‍ഷത്തെ 4,726 യൂണിറ്റുകളില്‍ നിന്ന് 2024 ല്‍ 43 ശതമാനം ഇടിഞ്ഞ് 2,672 യൂണിറ്റായി.