ട്രംപിന്റെ നികുതി ഭീഷണികള്‍ക്കെതിരെ കാനഡ
- നികുതി ചുമത്തിയാല്‍ യുഎസ് ഉല്‍പ്പന്നങ്ങള്‍ക്ക് ഉയര്‍ന്ന താരിഫ് കാനഡ ഏര്‍പ്പെടുത്തും
- 2023-ല്‍ കാനഡയും യുഎസും തമ്മിലുള്ള വ്യാപാരം 1.3 ട്രില്യണ്‍ ഡോളറായിരുന്നു
- വ്യാപാരയുദ്ധമുണ്ടായാല്‍ മൂന്നു ദശലക്ഷത്തിലധികം തൊഴിലുകള്‍ പ്രതിസന്ധിയിലാകും
നിയുക്ത യുഎസ് പ്രസിഡന്റ് ഡൊണാള്‍ഡ് ട്രംപിന്റെ നികുതി ഭീഷണിക്കെതിരെ കാനഡ. കനേഡിയന്‍ ഇറക്കുമതിക്ക് 25 ശതമാനം ചുങ്കം ഏര്‍പ്പെടുത്തുമെന്നാണ് ട്രംപ് പ്രഖ്യാപിച്ചിട്ടുള്ളത്. നികുതിയുമായി മുന്നോട്ടുപോയാല്‍ യുഎസ് ഉല്‍പ്പന്നങ്ങള്‍ക്ക് 'ട്രംപ് താരിഫ് നികുതി' ചുമത്തിയേക്കുമെന്ന് കനേഡിയന്‍ വിദേശകാര്യ മന്ത്രി മെലാനി ജോളി മുന്നറിയിപ്പു നല്‍കി.
ജോളിയുടെ വാഷിംഗ്ടണ്‍ സന്ദര്‍ശനത്തിന് ശേഷമാണ് ഈ മുന്നറിയിപ്പ് വന്നത്. സന്ദര്‍ശനത്തില്‍ യുഎസ് നേതാക്കളുമായി കൂടിക്കാഴ്ച നടത്തി വ്യാപാരവും അതിര്‍ത്തി സുരക്ഷയും ഉള്‍പ്പെടെയുള്ള നിര്‍ണായക വിഷയങ്ങള്‍ ചര്‍ച്ച ചെയ്തിരുന്നു.
മെക്‌സിക്കോയും ചൈനയും പോലുള്ള മറ്റ് പ്രധാന വ്യാപാര പങ്കാളികളെയും ലക്ഷ്യമിടുന്ന ട്രംപിന്റെ നിര്‍ദ്ദിഷ്ട താരിഫുകള്‍, പതിറ്റാണ്ടുകളായി കാനഡയും യുഎസും തമ്മിലുള്ള ഏറ്റവും പ്രധാനപ്പെട്ട വ്യാപാര സംഘര്‍ഷത്തിന് കളമൊരുക്കുകയാണ്.
ട്രംപിന്റെ താരിഫ് പ്ലാനുകള്‍ നടപ്പിലാക്കുകയാണെങ്കില്‍ ഘട്ടം ഘട്ടമായുള്ള പ്രതികരണത്തിന്റെ ഭാഗമായി വിവിധ യുഎസ് ഉല്‍പ്പന്നങ്ങള്‍ക്ക് ഉയര്‍ന്ന തീരുവ ചുമത്താന്‍ ഒട്ടാവ തയ്യാറാകുമെന്ന് യൂറോപ്യന്‍ വാര്‍ത്താ ഏജന്‍സിയായ എഎഫ്പി റിപ്പോര്‍ട്ടു ചെയ്തു. സ്ഥാനമൊഴിയുന്ന പ്രധാനമന്ത്രി ജസ്റ്റിന്‍ ട്രൂഡോ, കാനഡയുടെ സാമ്പത്തിക താല്‍പ്പര്യങ്ങള്‍ സംരക്ഷിക്കുന്നതിനുള്ള പ്രതിജ്ഞാബദ്ധത ആവര്‍ത്തിച്ചു.
നിര്‍ദ്ദിഷ്ട താരിഫുകള്‍ അമേരിക്കന്‍ ജോലികളെ അപകടത്തിലാക്കുമെന്നും ഉപഭോക്തൃ വില വര്‍ധിപ്പിക്കുമെന്നും വടക്കേ അമേരിക്കന്‍ വിതരണ ശൃംഖലയെ തടസ്സപ്പെടുത്തുമെന്നും അദ്ദേഹം മുന്നറിയിപ്പ് നല്‍കി.
കനേഡിയന്‍ സര്‍ക്കാര്‍ കണക്കുകള്‍ പ്രകാരം 2023-ല്‍ കാനഡയും യുഎസും തമ്മിലുള്ള വ്യാപാരം 1.3 ട്രില്യണ്‍ ഡോളര്‍ എന്ന റെക്കോര്‍ഡിലെത്തി. വ്യാപാരത്തില്‍ ഇരു രാജ്യങ്ങളുടെയും ഓഹരികള്‍ ഉയര്‍ന്നതാണ്. കാനഡയില്‍ നിന്നുള്ള യുഎസ് ഇറക്കുമതിയുടെ 70 ശതമാനവും അമേരിക്കന്‍ വിതരണ ശൃംഖലയുടെ അവശ്യ ഘടകങ്ങളാണ്.
വ്യാപാര പങ്കാളിത്തം അതിര്‍ത്തിയുടെ ഇരുവശത്തും ഗണ്യമായ തൊഴിലവസരങ്ങളെ പിന്തുണയ്ക്കുന്നു. കാനഡയില്‍, 2.4 ദശലക്ഷത്തിലധികം ജോലികള്‍ അമേരിക്കയിലേക്കുള്ള കയറ്റുമതിയെ ആശ്രയിച്ചിരിക്കുന്നു. അതേസമയം, കനേഡിയന്‍ കമ്പനികള്‍ 2023-ല്‍ 850,000-ലധികം അമേരിക്കന്‍ തൊഴിലാളികളെ നിയമിച്ചു. ഏകദേശം എട്ട് ദശലക്ഷം യുഎസ് ജോലികള്‍ കാനഡയുമായുള്ള വ്യാപാരവുമായി ബന്ധപ്പെട്ടിരിക്കുന്നു.
ന്യൂയോര്‍ക്ക് സ്റ്റേറ്റിലും ന്യൂജേഴ്സിയിലും മാത്രം, 1,138 കനേഡിയന്‍ ഉടമസ്ഥതയിലുള്ള കമ്പനികള്‍ ഏകദേശം 100,000 തൊഴിലാളികള്‍ക്ക് തൊഴില്‍ നല്‍കുന്നു.
സ്‌കോട്ടിയാബാങ്കിന്റെ വിശകലനം സൂചിപ്പിക്കുന്നത്, ഒരു വ്യാപാരയുദ്ധം കാനഡയ്ക്ക് കാര്യമായ സാമ്പത്തിക മാന്ദ്യത്തിന് കാരണമായേക്കാം, ജിഡിപി 5 ശതമാനത്തിലധികം കുറയാന്‍ സാധ്യതയുണ്ട്. വര്‍ദ്ധിച്ചുവരുന്ന തൊഴിലില്ലായ്മ, പണപ്പെരുപ്പ സമ്മര്‍ദങ്ങള്‍. വ്യാപാര പിരിമുറുക്കം എന്നിവ രൂക്ഷമായാല്‍ ഇരു രാജ്യങ്ങളിലും കാര്യമായ സാമ്പത്തിക തകര്‍ച്ചയ്ക്ക് സാധ്യതയുണ്ട്. അതിനാല്‍ വളരെ കരുതലോടെ മാത്രമാകും ഈ വിഷയത്തെ ഇരു രാജ്യങ്ങളും സമീപിക്കുക.