ബാള്‍ട്ടിമോര്‍: കപ്പലിലുണ്ടായിരുന്നത് അപകടകരമായ വസ്തുക്കളെന്ന് യുഎസ്
- നിയന്ത്രണം നഷ്ടപ്പെട്ടാണ് കപ്പല്‍ പാലത്തിലിടിച്ചത്
- അന്വേഷണത്തിന് രണ്ടുവര്‍ഷം വരെ എടുത്തേക്കാം
- അപകടത്തില്‍ ആറ്‌പേര്‍ക്ക് ജീവന്‍ നഷ്ടപ്പെട്ടിരുന്നു
ബാള്‍ട്ടിമോര്‍ ഫ്രാന്‍സിസ് സ്‌കോട്ട് പാലത്തില്‍ ഇടിച്ച ചരക്ക് കപ്പലില്‍ വന്‍തോതില്‍ അപകടകരവും തീപിടിക്കുന്നതുമായ വസ്തുക്കള്‍ അടങ്ങിയിട്ടുണ്ടെന്ന് പ്രാഥമിക അന്വേഷണ വിശദാംശങ്ങള്‍ ഉദ്ധരിച്ച് യുഎസ് അന്വേഷണ ഏജന്‍സി മേധാവി പറഞ്ഞു. മൊത്തം 764 ടണ്‍ ഭാരമുള്ള 56 കണ്ടെയ്‌നര്‍ അപകടകരമായ വസ്തുക്കളാണ് കപ്പലിലുണ്ടായിരുന്നത്. ഇക്കാര്യം നാഷണല്‍ ട്രാന്‍സ്പോര്‍ട്ടേഷന്‍ സേഫ്റ്റി ബോര്‍ഡ് മേധാവി ജെന്നിഫര്‍ ഹോമെന്‍ഡി സ്ഥിരീകരിച്ചു.
അന്വേഷണത്തില്‍ അപകടകരമായ വസ്തുക്കളുള്ള 56 കണ്ടെയ്‌നറുകള്‍ തിരിച്ചറിയാന്‍ കഴിഞ്ഞു. അതായത് 764 ടണ്‍ അപകടകരമായ വസ്തുക്കള്‍, കൂടുതലും നശിപ്പിക്കുന്നവ, തീപിടിക്കുന്നവ, കൂടാതെ മറ്റ് ചില അപകടകരമായ വസ്തുക്കള്‍, ക്ലാസ് ഒമ്പത് അപകടകരമായ വസ്തുക്കള്‍, അതില്‍ ലിഥിയം-അയണ്‍ ബാറ്ററികളും ഉള്‍പ്പെടുന്നു.
ചരക്ക് കപ്പല്‍ എംവി ഡാലി വൈദ്യുതി നഷ്ടപ്പെട്ടതിനെത്തുടര്‍ന്ന് നിയന്ത്രണാതീതമാവുകയും പാലത്തില്‍ ഇടിക്കുകയുമായിരുന്നു. കപ്പലില്‍ 22 ഇന്ത്യന്‍ ജീവനക്കാരാണ് ഉണ്ടായിരുന്നത്. സംഭവത്തില്‍ ആറ് പേര്‍ക്കാണ് ജീവന്‍ നഷ്ടപ്പെട്ടത്. നാല് മൃതദേഹങ്ങള്‍ ഇതുവരെ കണ്ടെത്തിയിട്ടില്ല.
സിവില്‍ ട്രാന്‍സ്പോര്‍ട്ട് ആക്സിഡന്റ് അന്വേഷണത്തിന്റെ ഉത്തരവാദിത്തമുള്ള എന്‍ടിഎസ്ബി സംഭവത്തെക്കുറിച്ച് അന്വേഷണം ആരംഭിച്ചതായി അറിയിച്ചു. പല വ്യത്യസ്ത ഘടകങ്ങള്‍ അതില്‍ ഉള്‍പ്പെടും. അന്വേഷണത്തിന് രണ്ട് വര്‍ഷം വരെ എടുത്തേക്കാമെന്ന് ഹോമന്‍ഡി പറഞ്ഞു.
ഇന്നത്തെ പാലങ്ങള്‍ നിര്‍മ്മിക്കുന്നതിനുള്ള മുന്‍ഗണനാ രീതിയില്‍ നിന്ന് വ്യത്യസ്തമായാണ് ബാള്‍ട്ടിമോര്‍ പാലം നിര്‍മ്മിച്ചിരുന്നത്.
പാലം തകര്‍ന്നത് ഗുരുതരമായ സംഭവമാണ്. പാലത്തിന്റെ ഒരു ഭാഗം തകര്‍ന്നാല്‍ എല്ലാം നിലംപതിക്കുന്ന രീതിയിലാണ് അത് നിര്‍മ്മിച്ചിരുന്നത്. എന്നാല്‍ ഇന്ന് ഘടകങ്ങളായാണ് വലിയ പാലങ്ങള്‍ കൂട്ടിച്ചേര്‍ക്കപ്പെടുന്നത്. തകര്‍ന്നാലും ഒരു ഭാഗം മാത്രമെ അപകടത്തില്‍ പെടുകയുള്ളു.
ഫ്രാന്‍സിസ് സ്‌കോട്ട് കീ ബ്രിഡ്ജിന്റെ അവശിഷ്ടങ്ങള്‍ നീക്കം ചെയ്യാന്‍ വന്‍ ക്രെയിന്‍ വിന്യസിച്ചിട്ടുണ്ട്. നാശനഷ്ടങ്ങളുടെ കണക്കെടുപ്പ് ഉദ്യോഗസ്ഥര്‍ തുടരുകയാണ്.