പണം ചെലവഴിക്കാന്‍ പ്രേരിപ്പിക്കൂ; ബാങ്കുകളോട് ചൈന
- മികച്ച സമ്പദ് വ്യവസ്ഥക്കായി ജനങ്ങളെ കൂടുതല്‍ ചെലവഴിക്കാന്‍ പ്രേരിപ്പിക്കണം
- ഉപഭോക്താക്കളില്‍ കൂടുതല്‍ ആത്മവിശ്വാസം വളര്‍ത്തേണ്ടത് അനിവാര്യം
- ബുദ്ധിമുട്ടുകള്‍ നേരിടുന്ന വായ്പക്കാരെ സഹായിക്കാനുള്ള വഴികള്‍ കണ്ടെത്തണം
;
ജനങ്ങളെ കൂടുതല്‍ ചെലവഴിക്കാന്‍ പ്രേരിപ്പിക്കുന്നതിനുള്ള നടപടികള്‍ സ്വീകരിക്കാന്‍ ചൈന ബാങ്കുകളോട് ആവശ്യപ്പെട്ടു. വായ്പകള്‍ വര്‍ധിപ്പിക്കുന്നതും ക്രെഡിറ്റ് കാര്‍ഡുകളുടെ ഉപയോഗവും പ്രോത്സാഹിപ്പിക്കുന്നതും ഇതില്‍പെടുന്നു.
ചെലവഴിക്കുന്നതിനുപകരം സമ്പാദ്യം മാത്രം തിരഞ്ഞെടുക്കുന്ന ഉപഭോക്താക്കളില്‍ കൂടുതല്‍ ആത്മവിശ്വാസം വളര്‍ത്തുന്നതിനുള്ള പുതിയ നീക്കത്തിന്റെ ഭാഗമാണ് ഈ നടപടി. തൊഴിലവസരങ്ങളെയും സമ്പദ് വ്യവസ്ഥയുടെ ഭാവിയെയും കുറിച്ച് ആശങ്കാകുലരാണ് ഉപഭോക്താക്കള്‍.
ബാങ്കുകള്‍ കൂടുതല്‍ വായ്പ നല്‍കണമെന്നും ബുദ്ധിമുട്ടുകള്‍ നേരിടുന്ന വായ്പക്കാരെ സഹായിക്കാനുള്ള വഴികള്‍ കണ്ടെത്തണമെന്നും ഉത്തരവില്‍ പറയുന്നു. നാഷണല്‍ ഫിനാന്‍ഷ്യല്‍ റെഗുലേറ്ററി കമ്മീഷന്റെ അറിയിപ്പിനെത്തുടര്‍ന്ന് ചൈനയിലെ ഓഹരി വിലകള്‍ ഉയര്‍ന്നു.
കോവിഡ്-19 മഹാമാരിയുടെ തിരിച്ചടികളെത്തുടര്‍ന്ന് ദശലക്ഷക്കണക്കിന് ആളുകള്‍ക്ക് തൊഴില്‍ നഷ്ടപ്പെട്ടിരുന്നു. കൂടാതെ നിരവധികമ്പനികള്‍ ബിസിനസില്‍നിന്ന് പിന്മാറുകയും ചെയ്തിരുന്നു. ഈ സാഹചര്യത്തില്‍ ചെലവുകളും നിക്ഷേപവും വര്‍ധിപ്പിക്കുന്നതിനുള്ള ശ്രമങ്ങളെക്കുറിച്ച് തിങ്കളാഴ്ച ഉദ്യോഗസ്ഥര്‍ ഒരു ബ്രീഫിംഗ് നടത്തും.
ചൈനീസ് സമ്പദ്വ്യവസ്ഥ അടുത്തിടെ ഏകദേശം 5 ശതമാനം വേഗതയില്‍ വളര്‍ന്നു. എന്നാല്‍ ജോലികളെക്കുറിച്ചുള്ള ആശങ്കകളും ആരോഗ്യ സംരക്ഷണത്തിന്റെയും വിദ്യാഭ്യാസത്തിന്റെയും കനത്ത ബാധ്യതകളും മൂലം പല ചൈനക്കാരും കൂടുതല്‍ ചെലവഴിക്കാന്‍ വിസമ്മതിക്കുന്നു.
പ്രോപ്പര്‍ട്ടി വിപണിയിലെ ദീര്‍ഘകാല മാന്ദ്യവും ഉപഭോക്തൃ വികാരത്തെ ബാധിച്ചു. ഇത് പല കുടുംബങ്ങളെയും മുന്‍കാലങ്ങളെ അപേക്ഷിച്ച് കൂടുതല്‍ മോശമാക്കി.
കഴിഞ്ഞ വര്‍ഷം കയറ്റുമതിയിലുണ്ടായ കുതിച്ചുചാട്ടം, ആഭ്യന്തര ഡിമാന്‍ഡില്‍ നിലനില്‍ക്കുന്ന ബലഹീനത നികത്താന്‍ സഹായിച്ചു.
ഇത് ചെലവും നിക്ഷേപവും മൂലമാണ്. എന്നാല്‍ ചൈനീസ് ഉല്‍പ്പന്നങ്ങളുടെ ഇറക്കുമതിക്ക് തീരുവ കുത്തനെ ഉയര്‍ത്താനുള്ള യുഎസ് പ്രസിഡന്റ് ഡൊണാള്‍ഡ് ട്രംപിന്റെ ഉത്തരവുകള്‍ വരും മാസങ്ങളില്‍ കയറ്റുമതിയെ ബാധിച്ചേക്കാം. ഇത് പലതരം ബിസിനസുകള്‍ക്കും അപകടസാധ്യതകള്‍ ഉയര്‍ത്തുന്നു.
ചൈനയില്‍ ഉപഭോക്തൃ ധനസഹായത്തിന്റെയും മറ്റ് വ്യക്തിഗത വായ്പകളുടെയും നിലവാരം യുഎസിലെയും മറ്റ് പല രാജ്യങ്ങളിലെയും അപേക്ഷിച്ച് വളരെ കുറവാണ്, എന്നിരുന്നാലും സമീപ വര്‍ഷങ്ങളില്‍ ഇത് വര്‍ധിച്ചിട്ടുണ്ട്. ചൈനീസ് കുടുംബങ്ങളില്‍ പത്തില്‍ ഒമ്പത് കുടുംബങ്ങള്‍ക്കും സ്വന്തമായി വീടുകള്‍ ഉണ്ട്, അതേസമയം പകുതിയില്‍ താഴെ വീട്ടുടമസ്ഥര്‍ക്ക് മാത്രമേ ഈടുവെച്ച വായ്പകള്‍ നിലവിലുള്ളു.
ക്രെഡിറ്റ് കാര്‍ഡുകളുടെ ഉപയോഗത്തേക്കാള്‍ കൂടുതല്‍ സാധാരണമാണ് പണത്തിന്റെയും ഓണ്‍ലൈന്‍ ആപ്പുകളുടെയും ഉപയോഗവും മറ്റ് തരത്തിലുള്ള ഡിജിറ്റല്‍ പേയ്മെന്റുകളും എന്നതും പ്രത്യേകതയാണ്.