സോഷ്യൽ മീഡിയ പ്ലാറ്റ്‌ഫോമുകളിൽ സാമ്പത്തിക ഉപദേശം നൽകുന്ന രജിസ്റ്റർ ചെയ്യാത്ത 'ഫിൻഫ്ലുവൻസർ'മാരുടെ കുതിപ്പ് സെക്യൂരിറ്റീസ് വിപണിയിൽ കാര്യമായ ആശങ്കകൾ ഉയർത്തിയിട്ടുണ്ട്. ഇവരുടെ തെറ്റായ ഉപദേശങ്ങൾക്ക് നിക്ഷേപകർ ഇരയാകുന്നു. സെക്യൂരിറ്റീസ് ആൻഡ് എക്‌സ്‌ചേഞ്ച് ബോർഡ് ഓഫ് ഇന്ത്യ (സെബി) വളർന്നുവരുന്ന ഈ മേഖലയെ നിയന്ത്രിക്കുന്നതിനുള്ള സമഗ്രമായ നടപടികളെക്കുറിച്ച് ആലോചിക്കുന്നു.
സെബി, ഫിൻഫ്ലുവൻസേഴ്‌സ് പ്രവർത്തനങ്ങളിൽ നിയന്ത്രണം ഏർപ്പെടുത്തുന്നതിനുള്ള മാർഗ്ഗനിർദ്ദേശങ്ങൾ ആലോചിക്കുന്നുവെന്ന് മുംബൈയിൽ നടന്ന അസോസിയേഷൻ ഓഫ് മ്യൂച്വൽ ഫണ്ട്സ് ഇൻ ഇന്ത്യ (AMFI) പരിപാടിയിൽ സെബി ചെയർപേഴ്‌സൺ മാധബി പുരി ബുച്ച് പറഞ്ഞു. കൂടുതൽ സുതാര്യതയും ഉത്തരവാദിത്തവും ഉറപ്പാക്കിക്കൊണ്ട്, രജിസ്ട്രേഷൻ മാനദണ്ഡങ്ങൾ പുനഃപരിശോധിക്കുക എന്നതാണ് നിർദ്ദിഷ്ട നിയന്ത്രണങ്ങൾ ലക്ഷ്യമിടുന്നത്.
ഫിൻഫ്ലുവൻസർമാർ നൽകുന്ന സാമ്പത്തിക ഉപദേശങ്ങളുടെ കൃത്യതയും വിശ്വാസ്യതയും ഉറപ്പുവരുത്തുന്നതിനുള്ള കർശന നടപടികളുടെ ആവശ്യകത അവർ വിശദ്ദീകരിച്ചു. നിക്ഷേപ മേഖലയിൽ അവരുടെ സ്വാധീനം വികസിച്ചുകൊണ്ടിരിക്കുന്ന സാഹചര്യത്തിൽ, സാമ്പത്തിക മേഖലയിൽ സുതാര്യതയും വിശ്വാസ്യതയും വർദ്ധിപ്പിക്കുന്നതിനുള്ള സെബിയുടെ പ്രതിബദ്ധത ബച്ച് അടിവരയിട്ടു.
പോർട്ട്‌ഫോളിയോ മാനേജ്‌മെൻറ് സർവീസസ് (PMS), മ്യൂച്വൽ ഫണ്ടുകൾ (MFs), ഇൻവെസ്റ്റ്‌മെൻറ് അഡ്വൈസർമാർ എന്നിവയുൾപ്പെടെ മാർക്കറ്റ് പങ്കാളികൾ നടത്തുന്ന പ്രകടന ക്ലെയിമുകൾ പരിശോധിക്കാൻ ചുമതലപ്പെടുത്തിയ ഒരു മൂന്നാം കക്ഷി സ്ഥാപനമായ പെർഫോമൻസ് വാലിഡേഷൻ ഏജൻസി (PVA) സ്ഥാപിക്കുന്നതാണ് സെബിയുടെ നിർദ്ദിഷ്ട നടപടികളിൽ പ്രധാനം. പ്രകടന റിപ്പോർട്ടുകൾ സാധൂകരിക്കുന്നതിലും സാമ്പത്തിക ആവാസവ്യവസ്ഥയ്ക്കുള്ളിലെ വിശ്വാസവും വിശ്വാസ്യതയും ശക്തിപ്പെടുത്തുന്നതിലും നിർണായക പങ്ക് വഹിക്കാൻ പിവിഎ ലക്ഷ്യമിടുന്നു.
സോഷ്യൽ മീഡിയ ചാനലുകൾ വഴി നിയമവിരുദ്ധമായ നിക്ഷേപ ഉപദേശം നൽകുന്ന രജിസ്റ്റർ ചെയ്യാത്ത ഫിനാൻസ് കമ്പനികൾക്കെതിരെയുള്ള സെബിയുടെ നടപടിയെ തുടർന്നാണ് ഈ നീക്കം.
നിക്ഷേപവുമായി ബന്ധപ്പെട്ട ഉപദേശം നൽകുന്നതിന്, ബാങ്കിംഗ്, ഫിനാൻഷ്യൽ സർവീസ്, ഇൻഷുറൻസ് (ബിഎഫ്എസ്ഐ) മേഖലകളിൽ സ്വാധീനം ചെലുത്തുന്നവർക്ക് സെബി രജിസ്ട്രേഷൻ നിർബന്ധമാക്കി, കഴിഞ്ഞ വർഷം, അഡ്വർടൈസിംഗ് സ്റ്റാൻഡേർഡ് കൗൺസിൽ ഓഫ് ഇന്ത്യ (ASCI) അതിൻറെ മാർഗ്ഗനിർദ്ദേശങ്ങൾ പരിഷ്‌ക്കരിച്ചിരുന്നു.
സ്റ്റോക്ക് മാർക്കറ്റ് ട്രേഡിംഗ്, മ്യൂച്വൽ ഫണ്ടുകൾ, ഇൻഷുറൻസ് തുടങ്ങിയ സാമ്പത്തിക വിഷയങ്ങളിൽ സോഷ്യൽ മീഡിയ പ്ലാറ്റ്‌ഫോമുകളിലൂടെയാണ് ഒരു 'ഫിൻഫ്ലുവൻസർ' സാധാരണയായി ഉപദേശം നൽകുന്നത്.