സ്വര്‍ണം റെക്കോഡ് വിലക്കരികെ

സംസ്ഥാനത്തെ സ്വര്‍ണവില ഇന്ന് വീണ്ടും മുകളിലേക്ക് കയറി. ഇന്ന് 22 കാരറ്റ് സ്വര്‍ണം ഗ്രാമിന് 20 രൂപയുടെ വര്‍ധനയോടെ 5840 രൂപയാണ് വില. പവന്‍റെ വില 160 രൂപയുടെ വര്‍ധനയോടെ 46720 രൂപയിലെത്തി. ഈ മാസം തന്നെ രേഖപ്പെടുത്തിയ, ഗ്രാമിന് 5885 രൂപ എന്നതാണ് സ്വര്‍ണത്തിന്‍റെ റെക്കോഡ് വില. ഇതിനും മുകളിലേക്ക് സ്വര്‍ണം സമീപ ദിവസങ്ങളില്‍ പോകുമോയെന്ന ആശങ്കയാണ് ഇപ്പോഴുയരുന്നത്. കഴിഞ്ഞയാഴ്ച മൊത്തമായി 90 രൂപയുടെ വര്‍ധന 22 കാരറ്റ് ഗ്രാമിന് ഉണ്ടായിട്ടുണ്ട്.

ഇന്ന് 24 കാരറ്റ് സ്വര്‍ണം ഗ്രാമിന്‍റെ വില 22 രൂപയുടെ വര്‍ധനയോടെ 6,371 രൂപയിലെത്തി. 24 കാരറ്റ് പവന് 176 രൂപയുടെ വര്‍ധനയോടെ 50,968 രൂപ. 

ആഗോള വിപണിയിലും ഇന്ന് സ്വര്‍ണവില മുന്നേറ്റം പ്രകടമാക്കുകയാണ്. യുഎസിലെ പുതിയ സാമ്പത്തിക ഡാറ്റകളുടെ പശ്ചാത്തലത്തില്‍ 10 വര്‍ഷ യുഎസ് ബോണ്ടുകളിലെ ആദായം ഇടിഞ്ഞത് സ്വര്‍ണത്തിന് കരുത്തായി. ട്രോയ് ഔണ്‍സിന് ഇന്ന് 2,053 ഡോളര്‍ മുതല്‍ 2,066 ഡോളര്‍ വരെ വ്യതിയാനം ഉണ്ടായിട്ടുണ്ട്.

സംസ്ഥാനത്ത് വെള്ളിയുടെ വിലയിലും ഇന്ന് വര്‍ധന പ്രകടമായി. വെള്ളി ഗ്രാമിന്‍റെ സംസ്ഥാനത്തെ വില 30 പൈസ വര്‍ധിച്ച് 81 രൂപയായി.