ബംപറിടിച്ച് എല്‍ഐസി ഏജന്റുമാരും ജീവനക്കാരും; ക്ഷേമ നടപടികള്‍ പ്രഖ്യാപിച്ച് സര്‍ക്കാര്‍
25,000 മുതല്‍ 1,50,000 രൂപ വരെയുള്ള ടേം ഇന്‍ഷുറന്‍സ് പരിരക്ഷയാണ് ഇനി മുതല്‍ ഏജന്റുമാര്‍ക്ക് ലഭിക്കുക
ലൈഫ് ഇന്‍ഷുറന്‍സ് കോര്‍പ്പറേഷന്‍ ഓഫ് ഇന്ത്യയുടെ (എല്‍ഐസി) ഏജന്റുമാര്‍ക്കും ജീവനക്കാര്‍ക്കും ഗ്രാറ്റുവിറ്റി വര്‍ധന, ടേം ഇന്‍ഷുറന്‍സ് പരിരക്ഷ, കുടുംബ പെന്‍ഷന്‍, റീ അപ്പോയ്ന്റ് ചെയ്ത ഏജന്റുമാര്‍ക്ക് റിന്യുവല്‍ കമ്മിഷന്‍ എന്നിവ ഉള്‍പ്പെടുന്ന ക്ഷേമ നടപടികള്‍ക്ക് കേന്ദ്രം തിങ്കളാഴ്ച ( സെപ്റ്റംബര്‍ 18) അംഗീകാരം നല്‍കി.
13 ലക്ഷത്തിലധികം ഏജന്റുമാര്‍ക്കും ഒരു ലക്ഷത്തിലധികം സ്ഥിരം ജീവനക്കാര്‍ക്കും ഈ ക്ഷേമ നടപടികളുടെ പ്രയോജനം ലഭിക്കുമെന്നാണ് കേന്ദ്ര ധനകാര്യമന്ത്രാലയം അറിയിച്ചത്.
രാജ്യത്ത് ഇന്‍ഷുറന്‍സ് പരിരക്ഷ കൂടുതല്‍ പേരിലേക്ക് എത്തിച്ചേരാനുള്ള ശ്രമമാണ് എല്‍ഐസി നടത്തിവരുന്നത്. ഈ സാഹചര്യത്തിലാണു ക്ഷേമ നടപടികള്‍ക്ക് കേന്ദ്ര സര്‍ക്കാര്‍ അംഗീകാരം നല്‍കിയിരിക്കുന്നത്.
എല്‍ഐസി ഏജന്റുമാരുടെ ഗ്രാറ്റുവിറ്റി പരിധി 3 ലക്ഷം രൂപയില്‍ നിന്ന് 5 ലക്ഷം രൂപയായി ഉയര്‍ത്തി.
ഇത് എല്‍ഐസി ഏജന്റുമാര്‍ക്കു ഗണ്യമായ പുരോഗതി കൊണ്ടുവരുമെന്നു ധനകാര്യമന്ത്രാലയം പ്രസ്താവനയില്‍ പറഞ്ഞു.
25,000 മുതല്‍ 1,50,000 രൂപ വരെയുള്ള ടേം ഇന്‍ഷുറന്‍സ് പരിരക്ഷയാണ് ഇനി മുതല്‍ ഏജന്റുമാര്‍ക്ക് ലഭിക്കുക. ഇതുവരെ 3,000-10,000 രൂപയുടെ പരിരക്ഷയായിരുന്നു ലഭിച്ചിരുന്നത്.