ജിയോയുടെ 5ജി ഫോണുകള്‍ ഈവര്‍ഷാവസാനം
- പുതിയ സവിശേഷതകളോടെ ഫോണെത്തും
- എഐ കഴിവുകളും ഫോണിനുണ്ടാകുമെന്ന് സൂചന
- ഡ്യൂവല്‍ ക്യാമറ സംവിധാനവും ഫോണില്‍ ഉണ്ടാകും
റിലയന്‍സ് ജിയോയുടെ 5ജി ഫോണുകള്‍ ഈ വര്‍ഷാവസനം പുറത്തിറക്കിയേക്കുമെന്ന് സൂചന. ഇന്ത്യയില്‍ താങ്ങാനാവുന്ന രണ്ട് സ്മാര്‍ട്ട്‌ഫോണുകള്‍ അവതരിപ്പിച്ചതിന് ശേഷമാണ് ജിയോ ഏറെകാത്തിരിക്കുന്ന 5ജിയിലേക്ക് കടക്കുന്നത്. ഗംഗ എന്നായിരിക്കും ഇതിന്റെ കോഡ് നാമം. ലഭിക്കുന്ന റിപ്പോര്‍ട്ട് അനുസരിച്ച് 5ജി സ്മാര്‍ട്ട്ഫോണിന് അതിന്റെ മുന്‍ഗാമികളെ ക്കാള്‍ ഏറ്റവും പുതിയ സവിശേഷതകളും മെച്ചപ്പെടുത്തിയ ഹാര്‍ഡ്വെയറും ഉണ്ടായിരിക്കും.
റിലയന്‍സ് ജിയോ രാജ്യത്തുടനീളം ഗണ്യമായ ഉപയോക്തൃ അടിത്തറ നേടിയിട്ടുണ്ട്. ജിയോ ഗംഗ 5ജി ഫോണിന്റെ ഔദ്യോഗിക അനാച്ഛാദനം ഈ വര്‍ഷം അവസാനത്തോടെ നടക്കുമെന്നാണ് പ്രതീക്ഷിക്കുന്നത്. ഒരുപക്ഷേ ദീപാവലി ആഘോഷത്തോട് അനുബന്ധിച്ച് കമ്പനി ഈ പ്രഖ്യാപനം നടത്തും.
ജിയോ ഗംഗ 5ജി ഫോണിനെക്കുറിച്ച് കുറച്ച് വിശദാംശങ്ങള്‍ ചോര്‍ന്നിട്ടുണ്ട്. ഫോണില്‍ നിരവധി അപ്‌ഗ്രേഡ് ചെയ്ത സവിശേഷതകള്‍ ഉണ്ടാകുമെന്ന് അവ സൂചിപ്പിക്കുന്നു.
രാജ്യത്ത് ഏറ്റവും താങ്ങാനാവുന്ന വിലയ്ക്ക് വാങ്ങാനാവുന്ന 5ജി സ്മാര്‍ട്ട്‌ഫോണായിരിക്കും ഇത്. ഫോണില്‍ മികച്ച ഹാര്‍ഡ്വെയര്‍ ഗുണനിലവാരവും ക്യാമറയും ഉണ്ടാകും.
സ്മാര്‍ട്ട്ഫോണിന്റെ പിന്‍ഭാഗത്ത് ക്യാപ്സ്യൂള്‍ ഡിസൈനില്‍ ഡ്യുവല്‍ ക്യാമറ സജ്ജീകരണവും 13 മെഗാപിക്സല് പ്രൈമറി ക്യാമറയും ഉണ്ടാകുമെന്നാണ് കരുതപ്പെടുന്നത്. അതിനേക്കാളുപരി എഐ കഴിവുകളും ഉണ്ടായിരിക്കുമെന്ന് സൂചനയുണ്ട്. സെല്‍ഫികള്‍ക്കും വീഡിയോ കോളുകള്‍ക്കുമായി അഞ്ച് മെഗാപിക്സല് മുന്‍ ക്യാമറയും ഫോണില്‍ ഉണ്ടെന്ന് പുറത്തുവന്ന വിവരങ്ങള്‍ സൂചിപ്പിക്കുന്നു. അതിവേഗ ചാര്‍ജിംഗ് പിന്തുണ വാഗ്ദാനം ചെയ്യുന്ന 5000 എംഎഎച്ച്് ബാറ്ററിയാണ് ഫോണിനുണ്ടായിരിക്കുക.
4ജിബി റാമും 32ജിബി ഇന്റേണല്‍ മെമ്മറിയും ഉണ്ടാകാനാണ് സാധ്യതയേറെ. 6.5 ഇഞ്ച് എല്‍സിഡി എച്ച്ഡി ഡിസ്‌പ്ലേയും പ്രതീക്ഷിക്കപ്പെടുന്നു.
ഫോണിന് തീര്‍ച്ചയായും പതിനായിരത്തില്‍ താഴെയാകും വില. ഏകദേശം 6,000 മുതല്‍ 8,000 രൂപ വരെയുള്ള റേഞ്ചില്‍ ഉപകരണം വില്‍ക്കാനാണ് സാധ്യത.
ജിയോ ഫോണ്‍ 5ജി രണ്ട് കളര്‍ ഓപ്ഷനുകളിലാകാം എത്തുക എന്നും പുറത്തുവന്ന വിവരങ്ങള്‍ സൂചിപ്പിക്കുന്നു. നീലയും കറുപ്പും നിറങ്ങളിലാകും ഇവ ലഭ്യമാകുക.
സ്മാര്‍ട്ട്ഫോണിന്റെ ഔദ്യോഗിക ലോഞ്ചിനെക്കുറിച്ചോ അതിന്റെ സവിശേഷതകളെക്കുറിച്ചോ കമ്പനി ഇതുവരെ വെളിപ്പെടുത്തിയിട്ടില്ലെങ്കിലും, ഈ വര്‍ഷം അവസാനം നടക്കുന്ന കമ്പനിയുടെ വാര്‍ഷിക പൊതുയോഗത്തില്‍ മുകേഷ് അംബാനി 5ജി ഫോണ്‍ പുറത്തിറക്കും എന്ന്് പ്രതീക്ഷിക്കുന്നു.