മാരുതി സുസുക്കിയുടെ ബ്രെസ്സ ഈ മാസം അവസാനം എത്തുന്നു

ഡെല്‍ഹി: രാജ്യത്തെ ഏറ്റവും വലിയ കാര്‍ നിര്‍മ്മാതാക്കളായ മാരുതി സുസുക്കി ഇന്ത്യ, തങ്ങളുടെ കോംപാക്റ്റ് എസ്യുവി ബ്രെസ്സയുടെ വരാനിരിക്കുന്ന പുതിയ പതിപ്പിനായുള്ള ബുക്കിംഗ് ആരംഭിച്ചു.

ഈ മാസാവസാനം പുറത്തിറങ്ങുന്ന പുതിയ ബ്രെസ്സ, ഇലക്ട്രിക് സണ്‍റൂഫ് പോലുള്ള ഫീച്ചറുകള്‍ക്കൊപ്പം അത്യാധുനിക ന്യൂജെന്‍ ടെക്നോളജി, സുഖസൗകര്യങ്ങള്‍, കണക്റ്റുചെയ്ത സവിശേഷതകള്‍ എന്നിവയ്ക്കൊപ്പം എത്തുമെന്ന് കമ്പനി ഒരു പ്രസ്താവനയില്‍ പറഞ്ഞു.

ഇതിന് 6-സ്പീഡ് ഓട്ടോമാറ്റിക് ട്രാന്‍സ്മിഷന്‍ ഓപ്ഷനുള്ള നെക്‌സ്റ്റ് ജനറേഷന്‍ പവര്‍ട്രെയിന്‍ ഉണ്ടായിരിക്കും. അടുത്തുള്ള കമ്പനിയുടെ ഏതെങ്കിലും ഷോറൂമില്‍ നിന്നോ വെബ്സൈറ്റില്‍ നിന്നോ 11,000 രൂപ പ്രാരംഭ പണമടച്ച് ഉപഭോക്താക്കള്‍ക്ക് പുതിയ ബ്രെസ്സ മുന്‍കൂട്ടി ബുക്ക് ചെയ്യാം.

മെച്ചപ്പെടുത്തിയ ഡിസൈന്‍, പെര്‍ഫോമന്‍സ്, ടെക്നോളജി, സുരക്ഷാ ഫീച്ചറുകള്‍ എന്നിവയോടെയാണ് പുതിയ ബ്രെസ്സ വരുന്നതെന്ന് എംഎസ്ഐഎല്‍ ചീഫ് ടെക്നിക്കല്‍ ഓഫീസര്‍ (എന്‍ജിനീയറിങ്) സിവി രാമന്‍ പറഞ്ഞു. 2016-ല്‍ പുറത്തിറക്കിയതിനുശേഷം, ബ്രെസ്സ രാജ്യത്ത് കോംപാക്റ്റ് എസ്യുവികളുടെ ഒരു പുതിയ ട്രെന്‍ഡ് ആരംഭിച്ചതായി മാരുതി സുസുക്കി ഇന്ത്യ ലിമിറ്റഡ് (എംഎസ്‌ഐഎല്‍) സീനിയര്‍ എക്സിക്യൂട്ടീവ് ഡയറക്ടര്‍ ശശാങ്ക് ശ്രീവാസ്തവ പറഞ്ഞു.

വെറും 6 വര്‍ഷത്തിനുള്ളില്‍ ഇതിന്റെ 7.5 ലക്ഷം യൂണിറ്റുകള്‍ വിറ്റഴിച്ചുവെന്നും അദ്ദേഹം കൂട്ടിച്ചേര്‍ത്തു.