ക്രെഡിറ്റ് കാര്‍ഡ് വിഭാഗത്തിലെ 49 % ഓഹരി വിക്കാനൊരുങ്ങി ബിഒബി
- പ്രൈമറി മൂലധനമായും സെക്കണ്ടറി മൂലധനമായും ഫണ്ട് സമാഹരിക്കും
- തന്ത്രപ്രധാനമായ നിക്ഷേപകനെ എത്തിക്കാന്‍ ശ്രമം
- ഒരു വര്‍ഷത്തിനുള്ളില്‍ ഈ പ്രക്രിയ പൂര്‍ത്തിയാക്കും
സർക്കാർ ഉടമസ്ഥതയിലുള്ള ബാങ്ക് ഓഫ് ബറോഡ (ബിഒബി) തങ്ങളുടെ ക്രെഡിറ്റ് കാർഡ് ബിസിനസ് വിഭാഗമായ ബിഒബി ഫിനാൻഷ്യൽ സൊല്യൂഷൻസ് ലിമിറ്റഡിന്റെ 49 ശതമാനം വരെ ഓഹരികൾ വിൽക്കാൻ പദ്ധതിയിടുന്നു. നിലവില്‍ ബിഒബി-യുടെ പൂര്‍ണ ഉടമസ്ഥതയിലുള്ള ഉപകമ്പനിയാണിത്. തന്ത്രപ്രധാനമായ ഒരു നിക്ഷേപകനെ കമ്പനിയില്‍ എത്തിക്കുന്നതിനായി കമ്പനി ശ്രമിക്കുകയാണെന്നും, ഒരു വർഷത്തിനുള്ളിൽ ഈ പ്രക്രിയ പൂർത്തിയാകുമെന്ന് പ്രതീക്ഷിക്കുന്നതായും ബാങ്ക് വൃത്തങ്ങള്‍ പറയുന്നു.
ബിഒബി ഫിനാൻഷ്യൽ സൊല്യൂഷന്‍സിന്‍റെ മൂല്യം ഉയര്‍ത്തുന്നതിനും വളർച്ചയുടെ അടുത്ത ഘട്ടത്തിലേക്ക് കൊണ്ടുപോകുന്നതിനും ഒന്നോ അതിലധികമോ നിക്ഷേപകരിൽ നിന്ന് പ്രൈമറി മൂലധനമായും സെക്കണ്ടറി മൂലധനമായും ഫണ്ട് സമാഹരിക്കാനാണ് പദ്ധതി. മൊത്തം 49 ശതമാനം വരെ ഓഹരികള്‍ വിറ്റഴിക്കും.
കഴിഞ്ഞ സാമ്പത്തിക വര്‍ഷത്തില്‍ ബിഒബി ഫിനാന്‍ഷ്യല്‍ വിതരണം ചെയ്ത പുതിയ ക്രെഡിറ്റ് കാർഡുകളുടെ എണ്ണം ഇരട്ടിയായി. മുന്‍ വര്‍ഷത്തിലെ 0.5 ദശലക്ഷത്തില്‍ നിന്ന് 1.2 ദശലക്ഷം ക്രെഡിറ്റ് കാർഡുകളിലേക്കായിരുന്നു വളര്‍ച്ച. 2021 -22 ലെ 7,000 കോടി രൂപയുമായി താരതമ്യം ചെയ്യുമ്പോൾ ചില്ലറവിൽപ്പന ചെലവുകൾ ഇരട്ടിയിലേറെയായി, ഏകദേശം 17,300 കോടി രൂപയിലെത്തിയെന്ന് ബിഒബി വാര്‍ഷിക റിപ്പോര്‍ട്ടില്‍ വ്യക്തമാക്കിയിരുന്നു
അതേസമയം, എൻബിഎഫ്‌സിയുടെ അറ്റാദായം മുൻവർഷത്തെ 10.07 കോടി രൂപയിൽ നിന്ന് ഇരട്ടിയിലധികം വർധിച്ച് 24.62 കോടി രൂപയായി.
മുമ്പ് ബിഒബി കാർഡ്‌സ് ലിമിറ്റഡ് എന്നറിയപ്പെട്ടിരുന്ന ബിഒബി ഫിനാൻഷ്യൽ സൊല്യൂഷൻസ് ലിമിറ്റഡ്, 1994-ലാണ് ബിഒബി-യുടെ പൂർണ്ണ ഉടമസ്ഥതയിലുള്ള ഒരു നോൺ-ബാങ്കിംഗ് ഫിനാൻഷ്യൽ കമ്പനിയായി സ്ഥാപിതമായത്.