സൊമാറ്റോ ഓഹരി കുതിപ്പില്‍

സൊമാറ്റോ ഓഹരി എന്‍എസ്ഇയില്‍ ഇന്ന് (ജനുവരി 2) രാവിലെ 9.17 ന് 2.6 ശതമാനത്തോളം മുന്നേറി 127.75 രൂപയിലെത്തി.

2023 ജനുവരി 1 ന് വ്യാപാരം അവസാനിച്ചപ്പോള്‍ 124.50 രൂപയ്ക്കാണ് ക്ലോസ് ചെയ്തത്.

പ്ലാറ്റ്‌ഫോം ഫീസ് മൂന്ന് രൂപയില്‍ നിന്ന് നാല് രൂപയായി സൊമാറ്റോ വര്‍ധിപ്പിക്കുകയാണെന്ന് പ്രഖ്യാപിച്ചിരുന്നു. ഈ റിപ്പോര്‍ട്ട് ഓഹരി മുന്നേറാന്‍ കാരണമായെന്നാണു വിലയിരുത്തുന്നത്.

2023 ഓഗസ്റ്റിലാണ് സൊമാറ്റോ ആദ്യമായി പ്ലാറ്റ്‌ഫോം ഫീസ് ഏര്‍പ്പെടുത്തിയത്. അന്ന് 2 രൂപയാണ് പ്ലാറ്റ്‌ഫോം ഫീസ് ഈടാക്കിയത്. പിന്നീട് ഈ ഫീസ് 3 രൂപയായും വര്‍ധിപ്പിച്ചു. തുടര്‍ന്ന് 2024 ജനുവരി 1 മുതല്‍ തിരഞ്ഞെടുത്ത നഗരങ്ങളിലാണ് പ്ലാറ്റ്‌ഫോം ഫീസ് 3-ല്‍ നിന്നും 4 രൂപയായി വര്‍ധിപ്പിക്കുകയാണെന്ന് പ്രഖ്യാപിച്ചത്.

ഡെലിവറി ഫീസിനു പുറമെ ഈടാക്കുന്ന ഫീസാണു പ്ലാറ്റ്‌ഫോം ഫീസ്.

ഒരു വര്‍ഷം ശരാശരി 85 മുതല്‍ 90 കോടി വരെ ഓര്‍ഡറുകള്‍ സൊമാറ്റോയ്ക്ക് ലഭിക്കുന്നുണ്ടെന്നാണു കണക്ക്.

കഴിഞ്ഞ ആറ് മാസത്തിനിടെ സൊമാറ്റോ സ്‌റ്റോക്ക് 64 ശതമാനത്തിലധികമാണ് ഉയര്‍ന്നത്.