ഇന്ത്യൻ ഓഹരി വിപണി തുടർച്ചയായ അഞ്ചാം ദിവസവും നേട്ടത്തിൽ വ്യാപാരം അവസാനിപ്പിച്ചു. സൂചികകളായ നിഫ്റ്റിയും സെൻസെക്സും ഒരു ശതമാനം നേട്ടം കരസ്ഥമാക്കിയാണ് ഇന്ന് ക്ലോസ് ചെയ്തത്. സെൻസെക്സ് 557.45 പോയിന്റ് അഥവാ 0.73 ശതമാനം ഉയർന്ന് 76,905.51 ൽ ക്ലോസ് ചെയ്തു. നിഫ്റ്റി 159.75 പോയിന്റ് അഥവാ 0.69 ശതമാനം ഉയർന്ന് 23,350.40 ൽ എത്തി. പുതിയ വിദേശ ഫണ്ടുകളുടെ വരവും ബാങ്ക് ഓഹരികളിലെ നേട്ടങ്ങളുമാണ് വിപണിക്ക് ഇന്ന് കരുത്തായത്‌.
സെൻസെസ് ഓഹരികൾ ( Top Gainers, Losers )
സെൻസെക്സ് ഓഹരികളിൽ എൻ‌ടി‌പി‌സി, ബജാജ് ഫിനാൻസ്, കൊട്ടക് മഹീന്ദ്ര ബാങ്ക്, ആക്സിസ് ബാങ്ക്, നെസ്‌ലെ, ലാർസൻ & ട്യൂബ്രോ, ടാറ്റ മോട്ടോഴ്‌സ്, ഐ‌സി‌ഐ‌സി‌ഐ ബാങ്ക്, പവർ ഗ്രിഡ്, സൊമാറ്റോ എന്നിവ നേട്ടമുണ്ടാക്കി. അതേസമയം ഇൻഫോസിസ്, ടാറ്റ സ്റ്റീൽ, മഹീന്ദ്ര & മഹീന്ദ്ര, ടൈറ്റൻ, ബജാജ് ഫിൻ‌സെർവ് എന്നിവ ഇടിവ് നേരിട്ടു.
സെക്ടറൽ സൂചിക
സെക്ടറൽ സൂചികകളിൽ കൺസ്യൂമർ ഡ്യൂറബിൾസ്, മെറ്റൽ എന്നിവ ഒഴികെ മറ്റെല്ലാ മേഖല സൂചികകളും ഇന്ന് നേട്ടത്തിൽ അവസാനിച്ചു. ഓയിൽ ആൻഡ് ഗ്യാസ് , മീഡിയ , ടെലികോം എന്നിവ 2 ശതമാനം വീതം ഉയർന്നു.
ബിഎസ്ഇ മിഡ്ക്യാപ്, സ്മോൾക്യാപ് സൂചികകൾ 1-2 ശതമാനം നേട്ടമുണ്ടാക്കി. ഇന്ത്യ വിക്സ് -0.21 ശതമാനം ഇടിഞ്ഞ് 12.58 ൽ എത്തി.
ആഗോള വിപണികൾ
ഏഷ്യൻ വിപണികളിൽ, സിയോൾ നേട്ടത്തിലും ടോക്കിയോ, ഷാങ്ഹായ്, ഹോങ്കോംഗ് എന്നിവ നഷ്ടത്തിലുമാണ് വ്യാപാരം അവസാനിപ്പിച്ചത്. യൂറോപ്യൻ വിപണികൾ നഷ്ടത്തിലാണ് വ്യാപാരം അവസാനിച്ചത്. വ്യാഴാഴ്ച യുഎസ് വിപണികൾ നേരിയ നഷ്ടത്തിലാണ് വ്യാപാരം അവസാനിപ്പിച്ചത്.
ആഗോള എണ്ണ മാനദണ്ഡമായ ബ്രെന്റ് ക്രൂഡ് ഓയിൽ ബാരലിന് 0.21 ശതമാനം ഇടിഞ്ഞ് 71.85 യുഎസ് ഡോളറിലെത്തി. യുഎസ് ഡോളറിനെതിരെ രൂപയുടെ മൂല്യം 36 പൈസ ഉയർന്ന് 86 ൽ ക്ലോസ് ചെയ്തു.