ആഗോള വിപണികളിൽ ജെല്ലികെട്ട്, ആരവമടങ്ങാതെ ദലാൽ തെരുവ്, സൂചികകൾ പുതിയ ഉയരങ്ങളിലേക്ക്

ആഗോള വിപണികളിലെ റാലിയെത്തുടർന്ന് ഇന്ത്യൻ വിപണി ഇന്ന് (ചൊവ്വാഴ്ച) ഉയർന്ന് തുറക്കുമെന്ന് പ്രതീക്ഷിക്കുന്നു. ഗിഫ്റ്റ് നിഫ്റ്റി ശക്തമായ നിലയിലാണ്.  ഏഷ്യൻ വിപണികൾ ഉയർന്ന തോതിൽ വ്യാപാരം നടത്തുന്നു. യുഎസ് ഓഹരി വിപണി നേട്ടത്തോടെ ക്ലോസ് ചെയ്തു. എസ്  ആൻറ് പി 500 രണ്ടാഴ്ചയ്ക്കുള്ളിലെ ഏറ്റവും ഉയർന്ന നിലയിൽ അവസാനിച്ചു.

ഗിഫ്റ്റ് നിഫ്റ്റി 

ഗിഫ്റ്റ് നിഫ്റ്റി  23,758 ലെവലിൽ വ്യാപാരം നടത്തുന്നു. നിഫ്റ്റി ഫ്യൂച്ചേഴ്‌സിന്റെ മുൻ ക്ലോസിനേക്കാൾ ഏകദേശം 59 പോയിന്റിന്റെ പ്രീമിയം. ഇത് ഇന്ത്യൻ ഓഹരി വിപണി സൂചികകൾക്ക് ഒരു നല്ല തുടക്കത്തെ സൂചിപ്പിക്കുന്നു.

ഏഷ്യൻ വിപണികൾ

യുഎസ് പ്രസിഡന്റ് ഡൊണാൾഡ് ട്രംപിന്റെ പ്രഖ്യാപനത്തെ തുടർന്ന്  മൃദുവായ താരിഫുകൾ ഉണ്ടാകുമെന്ന പ്രതീക്ഷയിൽ ചൊവ്വാഴ്ച ഏഷ്യൻ വിപണികൾ ഉയർന്ന് വ്യാപാരം നടത്തുന്നു.

ജപ്പാന്റെ നിക്കി  1.15% ഉയർന്നു, ടോപ്പിക്സ് സൂചിക 0.50% ഉയർന്നു. ദക്ഷിണ കൊറിയയുടെ കോസ്പി സൂചിക 0.49% ഉയർന്നു. കോസ്ഡാക്ക് 0.30% കൂടി. ഹോങ്കോങ്ങിന്റെ ഹാങ് സെങ് സൂചിക ഫ്യൂച്ചറുകൾ ദുർബലമായ ഓപ്പണിംഗിനെ സൂചിപ്പിക്കുന്നു.

വാൾസ്ട്രീറ്റ്

യുഎസ് വ്യാപാര പങ്കാളികൾക്കെതിരായ താരിഫുകളിൽ ട്രംപ് ഭരണകൂടം കൂടുതൽ ലഘുവായ സമീപനം സ്വീകരിച്ചേക്കുമെന്ന സൂചനകളെത്തുടർന്ന് തിങ്കളാഴ്ച യുഎസ് ഓഹരി വിപണി നേട്ടത്തിൽ വ്യാപാരം അവസാനിപ്പിച്ചു.

ഡൗ ജോൺസ് ഇൻഡസ്ട്രിയൽ ആവറേജ് 1.42% ഉയർന്ന് 42,583.32 ലെത്തി, എസ് ആൻറ്പി  1.76% ഉയർന്ന് 5,767.57 ലെത്തി. നാസ്ഡാക്ക് 2.27% ഉയർന്ന് 18,188.59 ലെത്തി. എൻവിഡിയ ഓഹരി വില 3.15% ഉം അഡ്വാൻസ്ഡ് മൈക്രോ ഡിവൈസസ് ഓഹരികൾ 6.96% ഉം ഉയർന്നു.  ടെസ്‌ല ഓഹരി വില 11.93% ഉയർന്നു.

ഇന്ത്യൻ  വിപണി 

ഇന്ത്യൻ ഓഹരി വിപണി തുടർച്ചയായ ആറാം ദിവസവും നേട്ടത്തിൽ വ്യാപാരം അവസാനിപ്പിച്ചു. സൂചികകളായ നിഫ്റ്റിയും സെൻസെക്സും ഒരു ശതമാനം നേട്ടം കരസ്ഥമാക്കിയാണ്  ക്ലോസ് ചെയ്തത്. സെൻസെക്സ് 1,078.87 പോയിന്റ് അഥവാ 1.40 ശതമാനം ഉയർന്ന് 77,984.38 ൽ ക്ലോസ് ചെയ്തു. നിഫ്റ്റി 307.95 പോയിന്റ് അഥവാ 1.32 ശതമാനം ഉയർന്ന് 23,658.35 ലെത്തി. സെൻസെക്സ് ഓഹരികളിൽ എൻ‌ടി‌പി‌സി, കൊട്ടക് മഹീന്ദ്ര ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ, ടെക് മഹീന്ദ്ര, പവർ ഗ്രിഡ്, ബജാജ് ഫിൻ‌സെർവ്, ആക്സിസ് ബാങ്ക്, എച്ച്‌സി‌എൽ ടെക്, റിലയൻസ് ഇൻഡസ്ട്രീസ്, ബജാജ് ഫിനാൻസ് എന്നിവയാണ് ഏറ്റവും കൂടുതൽ നേട്ടമുണ്ടാക്കിയത്. ടൈറ്റൻ, ഇൻഡസ്ഇൻഡ് ബാങ്ക്, സൊമാറ്റോ, മഹീന്ദ്ര ആൻഡ് മഹീന്ദ്ര, ഭാരതി എയർടെൽ, നെസ്‌ലെ, ഇൻഫോസിസ് എന്നി ഓഹരികൾ ഇടിവ് നേരിട്ടു.എല്ലാ സെക്ടറൽ സൂചികകളും  നേട്ടത്തിലാണ് വ്യാപാരം പൂർത്തിയാക്കിയത്. പ്രൈവറ്റ് ബാങ്ക്, ക്യാപിറ്റൽ ഗുഡ്സ് , ഓയിൽ ആൻഡ് ഗ്യാസ്, പവർ,റിയലിറ്റി,ടെലികോം എന്നിവ 1-2 ശതമാനം വരെ നേട്ടം രേഖപ്പെടുത്തി. ബിഎസ്ഇ മിഡ്ക്യാപ്, സ്മോൾക്യാപ് സൂചികകൾ 1.5 ശതമാനം നേട്ടമുണ്ടാക്കി.

പിന്തുണയും പ്രതിരോധവും

നിഫ്റ്റി 

പിവറ്റ് പോയിന്റുകളെ അടിസ്ഥാനമാക്കിയുള്ള പ്രതിരോധം: 23,705, 23,770, 23,876

 പിന്തുണ: 23,495, 23,430, 23,325

ബാങ്ക് നിഫ്റ്റി

പിവറ്റ് പോയിന്റുകളെ അടിസ്ഥാനമാക്കിയുള്ള പ്രതിരോധം: 51,818, 52,055, 52,439

പിന്തുണ: 51,050, 50,813, 50,429

പുട്ട്-കോൾ അനുപാതം

മാർക്കറ്റിന്റെ മാനസികാവസ്ഥയെ സൂചിപ്പിക്കുന്ന നിഫ്റ്റി പുട്ട്-കോൾ അനുപാതം (PCR), മാർച്ച് 24 ന് 1.22 ആയി ഉയർന്നു. 

ഇന്ത്യ വിക്സ്

ഇന്ത്യ വിക്സ്, ഒറ്റ സെഷനിൽ 8.95 ശതമാനം ഉയർന്ന് 13.7 ആയി.

വിദേശ സ്ഥാപന നിക്ഷേപകർ

തിങ്കളാഴ്ച വിദേശ സ്ഥാപന നിക്ഷേപകർ (എഫ്‌ഐഐ)  3,055.76 കോടി രൂപയുടെ ഇന്ത്യൻ ഓഹരികൾ വാങ്ങി. ആഭ്യന്തര സ്ഥാപന നിക്ഷേപകർ (ഡിഐഐ) 98.54 കോടി രൂപയുടെ ഓഹരികൾ വാങ്ങി.

രൂപ

വിദേശ ബാങ്കുകളിൽ നിന്നുള്ള തുടർച്ചയായ ഡോളർ വിൽപ്പന പ്രാദേശിക യൂണിറ്റിനെ സഹായിച്ചതോടെ തിങ്കളാഴ്ച ഇന്ത്യൻ രൂപയുടെ മൂല്യം ഉയർന്നു.  യുഎസ് ഡോളറിനെതിരെ 0.4% ഉയർന്ന് 85.6350 എന്ന നിലയിലാണ് ഇന്നലെ വ്യാപാരം അവസാനിപ്പിച്ചത്.

സ്വർണ്ണ വില

ട്രംപ് താരിഫ് ആശങ്കകൾ ലഘൂകരിച്ചതിന് ശേഷം സ്വർണ്ണ വില കുറഞ്ഞു. സ്‌പോട്ട് ഗോൾഡ് ഔൺസിന് 0.1% ഇടിഞ്ഞ് 3,010.72 ഡോളറിലെത്തി. യുഎസ് ഗോൾഡ് ഫ്യൂച്ചറുകൾ 3,015.10 ഡോളറിൽ സ്ഥിരത പുലർത്തി.

ഇന്ന് ശ്രദ്ധിക്കേണ്ട ഓഹരികൾ

എച്ച്സിഎൽ ടെക്നോളജീസ്

ടെക്നോളജി കമ്പനി വെസ്റ്റേൺ യൂണിയനുമായി  പങ്കാളിത്തം പ്രഖ്യാപിച്ചു. രണ്ട് കമ്പനികളും ഹൈദരാബാദിൽ ഒരു അഡ്വാൻസ്ഡ് ടെക്നോളജി സെന്റർ സ്ഥാപിക്കും. ഇത് വെസ്റ്റേൺ യൂണിയന്റെ ആഗോള സാങ്കേതിക ശേഷികൾ കൂടുതൽ മെച്ചപ്പെടുത്തുകയും  പുതിയ അവസരങ്ങൾ സൃഷ്ടിക്കുകയും ചെയ്യും.

സെൻട്രൽ ബാങ്ക് ഓഫ് ഇന്ത്യ

പൊതുമേഖലാ ബാങ്ക്  മാർച്ച് 24 ന് അതിന്റെ ക്വാളിഫൈഡ് ഇൻസ്റ്റിറ്റ്യൂഷൻസ് പ്ലേസ്‌മെന്റ് (QIP) തുറന്നു. ഒരു ഓഹരിക്ക് 42.62 രൂപയുടെ അടിസ്ഥാന വില ബോർഡ് അംഗീകരിച്ചു.

പഞ്ചാബ്  ആൻറ് സിന്ധ് ബാങ്ക്

മാർച്ച് 24 ന് ബാങ്ക് അതിന്റെ ക്യുഐപി ആരംഭിച്ചു. ഒരു ഓഹരിക്ക് 40.38 രൂപയുടെ അടിസ്ഥാന വില ബോർഡ് അംഗീകരിച്ചു.

റെയിൽ വികാസ് നിഗം

115.79 കോടി രൂപയുടെ സെൻട്രൽ റെയിൽവേ പദ്ധതിക്ക് ഏറ്റവും കുറഞ്ഞ ലേലക്കാരായി കമ്പനി ഉയർന്നുവന്നു. 

ബ്രിഗേഡ് എന്റർപ്രൈസസ്

0.6 ദശലക്ഷം ചതുരശ്ര അടി വിസ്തീർണ്ണവും ഏകദേശം 950 കോടി രൂപയുടെ മൊത്ത വികസന മൂല്യവുമുള്ള ഒരു റെസിഡൻഷ്യൽ പ്രോജക്റ്റിന്റെ വികസനത്തിനായി റിയൽ എസ്റ്റേറ്റ് കമ്പനി കിഴക്കൻ ബെംഗളൂരുവിൽ 4.4 ഏക്കർ ഭൂമി ഏറ്റെടുത്തു.

വിപ്രോ

 ടെക്നോളജി സർവീസസ് ആൻഡ് കൺസൾട്ടിംഗ് കമ്പനി ഏജന്റ്ഫോഴ്‌സിനായി AI- അധിഷ്ഠിത സ്വയംഭരണ ഏജന്റുമാരെ പ്രഖ്യാപിച്ചു.

ടിടികെ പ്രസ്റ്റീജ്

മാർച്ച് 24 മുതൽ കമ്പനിയുടെ നോൺ-എക്‌സിക്യൂട്ടീവ് ചെയർമാൻ, ഡയറക്ടർ സ്ഥാനങ്ങൾ ടിടി ജഗന്നാഥൻ ഒഴിയാൻ തീരുമാനിച്ചു. മാർച്ച് 25 മുതൽ ടിടി ജഗന്നാഥന് പകരക്കാരനായി കമ്പനിയുടെ നോൺ-എക്‌സിക്യൂട്ടീവ് ചെയർമാനായി ടിടി രഘുനാഥൻ സ്ഥാനമേൽക്കും. നിലവിൽ ടിടി രഘുനാഥൻ കമ്പനിയുടെ വൈസ് ചെയർമാനും നോൺ-എക്‌സിക്യൂട്ടീവ് ഡയറക്ടറുമാണ്.

സ്റ്റെർലിംഗ് ആൻഡ് വിൽസൺ റിന്യൂവബിൾ എനർജി

മാർച്ച് 24 മുതൽ അജിത് പ്രതാപ് സിംഗ് കമ്പനിയിൽ ചീഫ് ഫിനാൻഷ്യൽ ഓഫീസറായി ചേർന്നു.  സന്ദീപ് മാത്യു കമ്പനിയുടെ ഇടക്കാല സിഎഫ്‌ഒ സ്ഥാനം രാജിവച്ചു.

ഈസി ട്രിപ്പ് പ്ലാനേഴ്‌സ്

ഇന്ത്യയുടെ ചാർട്ടർ വ്യോമയാന മേഖലയിലെ പ്രമുഖ കമ്പനിയായ ബിഗ് ചാർട്ടറിൽ 49% ഓഹരികൾ ഏറ്റെടുക്കുന്നതിന് കമ്പനിക്ക് ബോർഡ് അംഗീകാരം ലഭിച്ചു. 

ഹ്യുണ്ടായ് മോട്ടോർ ഇന്ത്യ

ഇന്ത്യയിൽ ഒരു ടൂളിംഗ് സെന്റർ സ്ഥാപിക്കുന്നതിനും പ്രവർത്തിപ്പിക്കുന്നതിനുമായി 694 കോടി രൂപ വരെയുള്ള നിക്ഷേപത്തിന് ബോർഡ് അംഗീകാരം നൽകി.

ചോളമണ്ഡലം ഇൻവെസ്റ്റ്‌മെന്റ് ആൻഡ് ഫിനാൻസ് കമ്പനി

വെള്ളയൻ സുബ്ബയ്യയെ മുഴുവൻ സമയ ഡയറക്ടറായി നിയമിക്കുന്നതിന് ബോർഡ് അംഗീകാരം നൽകി.

യുണൈറ്റഡ് സ്പിരിറ്റ്സ്

ഇടക്കാല ലാഭവിഹിതം പ്രഖ്യാപിക്കുന്നത് പരിഗണിക്കാൻ മാർച്ച് 27 ന് ബോർഡ് യോഗം ചേരും.

എസ്‌ബി‌ഐ ലൈഫ് ഇൻഷുറൻസ് കമ്പനി

431 കോടി രൂപയുടെ നികുതിയും പലിശയും ആവശ്യപ്പെട്ട് ആദായനികുതി വകുപ്പിൽ നിന്ന് കമ്പനിക്ക് ഒരു ആദായനികുതി ഉത്തരവ് ലഭിച്ചു.