തുടര്‍ച്ചയായ നാലു ദിവസങ്ങളിലെ വര്‍ധനയ്ക്ക് ശേഷം, ഒരു ദിവസത്തെ ഇടവേള കഴിഞ്ഞ് സംസ്ഥാനത്തെ സ്വര്‍ണവില ഇന്ന് ഇടിവിലേക്ക് നീങ്ങി. ഇന്ന് 22 കാരറ്റ് സ്വര്‍ണം ഗ്രാമിന്‍റെ വില 15 രൂപയുടെ ഇടിവോടെ 5505 രൂപയാണ്. പവന് 44,040 രൂപ, 120 രൂപയുടെ ഇടിവ്. ഇന്നലെ വിലയില്‍ മാറ്റമുണ്ടായിരുന്നില്ല.
ഇന്ന് 24 കാരറ്റ് സ്വര്‍ണം ഗ്രാമിന്‍റെ വില 18 രൂപയുടെ ഇടിവോടെ, 6,005 രൂപയിലെത്തി. പവന് 48040 രൂപ, 144 രൂപയുടെ ഇടിവ്.
ആഗോള തലത്തിലും സ്വര്‍ണ വില ഇടിവിലാണ്. ഫെഡ് റിസര്‍വ് യോഗത്തിന്‍റെ പ്രഖ്യാപനങ്ങള്‍ നിക്ഷേപകര്‍ വിശകലനം ചെയ്യുകയാണ് . ഔണ്‍സിന് 1924-1932 ഡോളര്‍ എന്ന തലത്തിലാണ് വ്യാപാരം പുരോഗമിക്കുന്നത്.
മാര്‍ച്ച് അവസാനം മുതല്‍ മേയ് രണ്ടാം വാരം വരെയുള്ള കാലയളവില്‍ സ്വര്‍ണം വലിയ കുതിപ്പിന്‍റെ പാതയിലായിരുന്നു. എന്നാല്‍ തുടര്‍ന്നങ്ങോട്ട് വിലയില്‍ തുടര്‍ച്ചയായ ചാഞ്ചാട്ടവും ക്രമേണ ഇടിവും ഉണ്ടാകുകയായിരുന്നു. ജൂണില്‍ വെറും 7 ദിവസങ്ങളില്‍ മാത്രമാണ് സ്വര്‍ണ വിലയില്‍ വര്‍ധന രേഖപ്പെടുത്തിയത്. ജൂലൈയിലും ഓഗസ്റ്റിലും പൊതുവേ ചാഞ്ചാട്ടമാണ് വിലയില്‍ കണ്ടത്.
സംസ്ഥാനത്തെ വെള്ളിവിലയില്‍ ഇന്ന് മാറ്റമില്ല. ഒരു ഗ്രാം വെള്ളിയുടെ വില ഇന്ന് 78 രൂപയാണ്. എട്ട് ഗ്രാം വെള്ളിക്ക് 624 രൂപ. ഇന്ന് രൂപക്കെതിരേ ഡോളര്‍ ദുര്‍ബലമായി, 1 ഡോളറിന് 83.09 രൂപ എന്ന നിലയാണ് കറന്‍സി വിനിമയം നടക്കുന്നത്.