സ്വര്‍ണ വിലയില്‍ ഇന്ന് മാറ്റമില്ല

സംസ്ഥാനത്തെ സ്വര്‍ണ വിലയില്‍ ഇന്ന് മാറ്റമില്ല. ഇന്ന് 22 കാരറ്റ് സ്വര്‍ണം ഗ്രാമിന് 5560 രൂപയാണ്, പവന് 44,480 രൂപ. ഇന്നലെയും ഇതേ വില നിലവാരമായിരുന്നു. ജൂണ്‍ 3ന് 22 കാരറ്റ് സ്വര്‍ണം ഗ്രാമിന് 70 രൂപയുടെ ഇടിവ് പ്രകടമായിരുന്നു. അതിനു ശേഷം  രണ്ട് ദിവസങ്ങളില്‍ മാറ്റമില്ലാതെ തുടര്‍‍ന്ന സ്വര്‍ണവില ഇന്നലെ വീണ്ടും 30 രൂപ വര്‍ധിക്കുകയായിരുന്നു. 

യുഎസ് ഫെഡ് റിസര്‍വ് നിരക്ക് വർധിപ്പിക്കുന്നത് സംബന്ധിച്ച അനിശ്ചിതത്വവും റിസര്‍വ് ബാങ്കിന്‍റെ ധനനയ അവലോകന യോഗം നടക്കുന്നതും നിക്ഷേപകരെ സ്വാധീനിക്കും എന്നതിനാല്‍ സ്വര്‍ണവില അടുത്ത രണ്ട് ദിവസങ്ങളില്‍ വലിയ മാറ്റങ്ങളിലേക്ക് പോകില്ലെന്ന് നേരത്തേ വിപണി വിദഗ്‍ധര്‍ വിലയിരുത്തിയിരുന്നു. നാളെയാണ് ആര്‍ബിഐ ധനനയം പ്രഖ്യാപിക്കുന്നത്. 

ഏപ്രിലിലും മേയ് തുടക്കത്തിലും സ്വര്‍ണവിലയില്‍ വലിയ വര്‍ധന പ്രകടമായിരുന്നു. അതിനു ശേഷം മേയില്‍ ഉടനീളം സംസ്ഥാനത്തെ സ്വര്‍ണവിലയില്‍ ചാഞ്ചാട്ടം പ്രകടമായി. കഴിഞ്ഞ രണ്ടാഴ്ചയായി സ്വർണ വിലയില്‍ ഭൂരിഭാഗം ദിവസങ്ങളിലും ഇടിവാണ് പ്രകടമായത്. 24 കാരറ്റ് സ്വര്‍ണം ഗ്രാമിന്‍റെ വില ഇന്ന് 6065 രൂപയാണ്, പവന് 48,520 രൂപ. ഇതും ഇന്നലത്തെ അതേ വില നിലവാരമാണ്. 

വെള്ളി വിലയിലും സ്വര്‍ണ വിലയ്ക്ക് സമാനമായ പ്രവണതയാണ് ഈ മാസം മിക്ക ദിവസങ്ങളിലും പ്രകടമായിട്ടുള്ളത്. എന്നാല്‍ ഇന്ന് വെള്ളിവിലയില്‍ ഇടിവ് പ്രകടമായിട്ടുണ്ട്. ഇന്ന് വെള്ളി വില ഒരു ഗ്രാമിന് 20 പൈസയുടെ ഇടിവോടെ 77.8 രൂപയിലെത്തി. ഇന്നലെ 30 പൈസയുടെ വര്‍ധന പ്രകടമായിരുന്നു. 8 ഗ്രാം വെള്ളിയുടെ വില ഇന്ന് 622.40 രൂപയാണ്. ഇന്നലത്തെ വിലയില്‍ നിന്ന് 1.60 രൂപയുടെ ഇടിവ്. 

ഡോളറിനെതിരേ ഇന്ന് രൂപയുടെ മൂല്യം മെച്ചപ്പെട്ടു, 1 ഡോളറിന് 82.55 എന്ന നിലയിലാണ് വിനിമയം നടക്കുന്നത്.