പാരിസ്ഥിതിക അനുമതി: ഓറിയെന്റൽ അരോമാറ്റിക്‌സ് ഓഹരി ഉയർന്നു

ഓറിയെന്റൽ അരോമാറ്റിക്‌സിന്റെ ഓഹരികൾ 15.72 ശതമാനം ഉയർന്നു. ഓറിയെന്റൽ അരോമാറ്റിക്സിന്റെ ഉപസ്ഥാപനമായ ഓറിയെന്റൽ അരോമാറ്റിക്സ് ആൻഡ് സൺസ് ലിമിറ്റഡിന് അവരുടെ സ്പെഷ്യലിറ്റി രാസവസ്തുക്കളുടെ നിർമാണ പദ്ധതിക്ക് പാരിസ്ഥിതിക അനുമതി ലഭിച്ചതോടെയാണ് വില ഉയർന്നത്.

ബിഎസ്ഇയിൽ ഇന്ന് 61.85 രൂപ (11.76 ശതമാനം) ഉയർന്ന ഓഹരി 588 രൂപയിലാണ് വ്യാപാരം അവസാനിപ്പിച്ചത്. വ്യാപാരത്തി​ന്റെ ഒരു ഘട്ടത്തിൽ ഓഹരിയുടെ വില 608.90 രൂപ (15.72 ശതമാനം) വരെ ഉയർന്നിരുന്നു.

കർപ്പൂരം, സുഗന്ധദ്രവ്യങ്ങൾ, സുഗന്ധം, രസം എന്നിങ്ങനെ വിവിധതരം പ്രത്യേക രാസവസ്തുക്കളുടെ നിർമാണവും, വില്പനയുമാണ് കമ്പനി ചെയ്യുന്നത്. അ​ഗർബത്തികൾ, മെഴുകുതിരികൾ, സോപ്പുകൾ, ഷാംപൂകൾ, ഹെയർ ഓയിലുകൾ, ഡിറ്റർജന്റുകൾ, ബേക്കറി ഇനങ്ങൾ എന്നിവയിൽ ഇവ വ്യാപകമായി ഉപയോഗിക്കുന്നു.

2022 സാമ്പത്തിക വർഷത്തിലെ മാർച്ച് പാദത്തിൽ കമ്പനിയുടെ
നികുതിക്ക് ശേഷമുള്ള ലാഭം (കൺസോളിഡേറ്റഡ്) 53 ശതമാനം ഇടിഞ്ഞ് 10 കോടി രൂപയായി. കഴിഞ്ഞ വർഷം ഇതേ പാദത്തിൽ ഇത് 22 കോടി രൂപയായിരുന്നു.