ആനന്ദ് മഹീന്ദ്രയുടെ ബക്കറ്റ് ലിസ്റ്റിലും കൊല്ലങ്കോട്

ആഗോള ടൂറിസം പട്ടികയില്‍ ഉള്‍പ്പെട്ട കൊല്ലങ്കോട് മഹീന്ദ്ര ആന്‍ഡ് മഹീന്ദ്രയുടെ ചെയര്‍ പേഴ്‌സണ്‍ ആനന്ദ് മഹീന്ദ്രയുടെ ബക്കറ്റ് ലിസ്റ്റില്‍ ( ജീവിതത്തിൽ കാണാൻ ഏറ്റവും അധികം ആഗ്രഹിക്കുന്നത്) കേറിയിരിക്കുകയാണ്. ഇത്രമാത്രം സുന്ദരമായ കൊല്ലങ്കോട് കാഴ്ച്ചകളിലേക്കൊന്നു പോയി നോക്കാം.

കേരള-തമിഴ്‌നാട് അതിര്‍ത്തിയോട് ചേര്‍ന്ന് പാലക്കാട് ജില്ലയിലെ നെല്ലിയാമ്പതി മലനിരകളുടെ താഴ് വാരത്ത് സ്ഥിതി ചെയ്യുന്ന ഗ്രാമമാണ് കൊല്ലങ്കോട്. പാലക്കാട് നഗരത്തില്‍ നിന്ന് 26 കിലോമീറ്റര്‍ ദൂരെയാണിത്. പ്രാചീനകാലത്ത് വെങ്ങനാട് എന്നറിയപ്പെട്ടിരുന്ന ഈ പ്രദേശം പിന്നീട് സാമൂതിരിയുടെ സാമന്തന്മാരായിരുന്ന കൊല്ലങ്കോട് രാജകുടുംബത്തിന്റെ അധീനതയിലാകുകയായിരുന്നു.

തൃശൂര്‍-പാലക്കാട് ഹൈവേയിലൂടെ കൊല്ലങ്കോട് എത്തുകയാണെങ്കില്‍, ദക്ഷിണേന്ത്യയിലെ ഏറ്റവും ദൈര്‍ഘ്യമേറിയ ആറുവരിപ്പാത തുരങ്കമായ കുതിരാന്‍ തുരങ്കത്തിലൂടെയാണ് യാത്ര ചെയ്യുന്നത്. രണ്ട് ദിവസമുണ്ടെങ്കില്‍, കുടിലിടം, സീതാര്‍കുണ്ട് വെള്ളച്ചാട്ടം, തേക്കിന്‍ചിറ, ചുള്ളിയാര്‍ അണക്കെട്ട്, ചിങ്ങഞ്ചിറ കറുപ്പസ്വാമി പ്രകൃതി ക്ഷേത്രം, റീലുകളിലൂടെ പ്രശസ്തമായ ചെല്ലപ്പന്‍ ചേട്ടന്റെ ചായക്കട, വാമല ബാല ദണ്ഡയുതപാണി ക്ഷേത്രം, മലമ്പുഴ അണക്കെട്ട്, കൊല്ലങ്കോട്, കവ ഗ്രാമം തുടങ്ങിയ സ്ഥലങ്ങളും സന്ദര്‍ശിക്കാം. ഈ സ്ഥലങ്ങളെല്ലാം 40 കിലോമീറ്റര്‍ ചുറ്റളവിലാണ്. ഈ സ്ഥലങ്ങളിലേക്കുള്ള റോഡുകള്‍ ഇടുങ്ങിയ പാതകളാണെന്ന് ഇവിടെ എത്തുന്നവര്‍ ഓര്‍ക്കണം.

സീതാര്‍കുണ്ട് വെള്ളച്ചാട്ടത്തില്‍ ജാഗ്രത പാലിക്കുക

കുടിലത്തെ പച്ച വിരിച്ച നെല്‍വയലുകള്‍, റാന്തല്‍ വിളക്കുകള്‍, കുടിലുകള്‍ എന്നിവയിലൂടെ കടന്നുപോകുമ്പോള്‍ സീതാര്‍കുണ്ട് വെള്ളച്ചാട്ടത്തിലെത്താം. പോകുന്ന വഴിയില്‍ ദൂരെയുള്ള മലനിരകള്‍ വെള്ളച്ചാട്ടത്തിന്റെ വിദൂര ദൃശ്യം വെളിവാക്കുന്നു. ഒന്നോ രണ്ടോ കിലോമീറ്റര്‍ അകലെ നിന്ന് കാണാവുന്ന മാവിന്തോപ്പില്‍ വാഹനം പാര്‍ക്ക് ചെയ്തതിന് ശേഷം വെള്ളച്ചാട്ടത്തിലേക്ക് നടക്കാം. മഴക്കാലത്ത് അപകടകരമാം വിധം കരകവിഞ്ഞൊഴുകുന്ന ചാലിയാര്‍ പുഴയുടെ ഭാഗമാണ് വെള്ളച്ചാട്ടം. വെള്ളച്ചാട്ടം ആസ്വദിക്കുമ്പോള്‍ ജാഗ്രത പാലിക്കേണ്ടതുമാണ്.

ചുള്ളിയാര്‍ അണക്കെട്ട്

മുതലമട പഞ്ചായത്തിലെ ഗായത്രി നദിയില്‍ സ്ഥിതി ചെയ്യുന്നതാണ് ചുള്ളിയാര്‍ അണക്കെട്ട്, പ്രത്യേകിച്ച് മഴക്കാലത്ത് മനോഹരമായ കാഴ്ചയാണ്. 1960-ല്‍ നിര്‍മ്മിച്ച ഈ അണക്കെട്ടില്‍ നിന്നുള്ള അതിമനോഹരമായ കാഴ്ചകള്‍ സോഷ്യല്‍ മീഡിയയില്‍ സഞ്ചാരികള്‍ പങ്കുവെക്കാറുണ്ട്.

ചിങ്ങഞ്ചിറ കറുപ്പുസ്വാമി പ്രകൃതി ക്ഷേത്രം

അടുത്തതായി ചിങ്ങഞ്ചിറ കറുപ്പുസ്വാമി പ്രകൃതി ക്ഷേത്രത്തിലേക്ക് പോകാം. ഒരു വലിയ ആല്‍മരത്തിനുള്ളിലാണ് ഇത് സ്ഥിതി ചെയ്യുന്നത്. ഇവിടെ ദൈവാനുഗ്രഹം തേടി ആടിനെയും കോഴികളെയും നേര്‍ച്ച വഴിപാടായി കൊണ്ടുവരുന്നു. സിനിമകള്‍ക്കും ആല്‍ബങ്ങള്‍ക്കും മറ്റും വേണ്ടിയുള്ള ഒരു ജനപ്രിയ ഷൂട്ടിംഗ് സ്‌പോട്ട് കൂടിയാണിത്.

ചെല്ലപ്പന്‍ ചേട്ടന്റെ ചായക്കട

ഏറെ പഴക്കമുള്ള ഈ ചായക്കട പല മലയാള സിനിമകളുടെയും ഭാഗമാണ്. റേഡിയോയില്‍ പ്ലേ ചെയ്ത 60 കളിലെ മലയാളം പാട്ടുകളും, ലളിതമായ ചായയും ലഘുഭക്ഷണങ്ങളും, ഇരിപ്പിട ക്രമീകരണങ്ങളും അതിലേറെയും ഉള്ള അന്തരീക്ഷം, ലളിതമായ സമയം ആസ്വദിക്കാന്‍ ഇവിടെ സാധിക്കും, ഓര്‍മ്മകളെ വര്‍ഷങ്ങള്‍ പിന്നിട്ടേക്കു നയിക്കുന്ന ചായക്കട.

വാമല

ഹൃദയം, കുഞ്ഞിരാമായണം, ദീപസ്തംഭം മഹാശ്ചര്യം തുടങ്ങിയ ജനപ്രിയ ചിത്രങ്ങളുടെ പ്രധാന രംഗങ്ങള്‍ പകര്‍ത്തിയ വാമല സുബ്രഹ്‌മണ്യസ്വാമി ക്ഷേത്രവും അതിനു മുന്നിലുള്ള ചെകുത്താന്റെ മരവും (പാല മരം) സോഷ്യല്‍ മീഡിയയില്‍ വൈറലായിരുന്നു.

ഒരു വശത്ത് പരന്നുകിടക്കുന്ന നെല്‍വയലുകളും മറുവശത്ത് മലമുകളിലെ വാമല ക്ഷേത്രവും. പര്‍വതത്തിന് താഴെ നിന്ന് നോക്കിയാല്‍ ക്ഷേത്രം ഒരു ചെറിയ പൊട്ടായി കാണാം. കൊടുമുടി കയറുന്നവര്‍ ആദ്യം എത്തുന്നത് ചെകുത്താന്റെ മരത്തിന്റെ ചുവട്ടിലാണ്. വാമലയില്‍ നിന്ന് അകലെ നെല്ലിയാമ്പതി മലനിരകളും താഴെയുള്ള താഴ്വരയും കാണാം.

 മലമ്പുഴ അണക്കെട്ടും റോപ്പ് വേയും

മലമ്പുഴ അണക്കെട്ടും റോപ്പ് വേയും ഉച്ചയ്ക്ക് രണ്ട് മണിക്ക് ശേഷം മാത്രമേ തുറക്കൂ. അണക്കെട്ടിന്റെ ആകാശക്കാഴ്ച കാഴ്ച സുന്ദരമാണ്. റോപ്പ്വേ സവാരിക്ക് ശേഷം, ഡാമിന്റെ പിന്‍ഭാഗത്തേക്ക് പോകുന്ന പാതയിലൂടെ നിങ്ങള്‍ക്ക് ഡ്രൈവ് ചെയ്യാന്‍ ശ്രമിക്കാം. ഒരു വശത്ത് അണക്കെട്ടിന്റെ ഭംഗിയും മറുവശത്ത് തുരുമ്പിച്ചതും നീണ്ടുനില്‍ക്കുന്നതുമായ പാറകള്‍ കാണാം. ഇവിടെ വെള്ളത്തിലിറങ്ങുന്നത് സുരക്ഷിതമല്ലെങ്കിലും റോഡിനോട് ചേര്‍ന്നുള്ള പാറകളില്‍ ഇരുന്നുകൊണ്ട് കാഴ്ചകള്‍ ആസ്വദിക്കാം.

കവ

ഒടിയന്‍ അടക്കമുള്ള നിരവധി സിനിമകള്‍ ചിത്രീകരിച്ചത് കരിമ്പനകള്‍ ധാരാളമുള്ളതും കൂറ്റന്‍ മലകളാല്‍ നിറഞ്ഞതുമായ കവയിലാണ്. കവയെ കേരളത്തിലേക്കുള്ള മഴയുടെ കവാടം എന്ന് വിളിക്കാറുണ്ട്. കൂടാതെ മനോഹരമായ ചിത്രങ്ങള്‍ക്കും ധാരാളം ട്രെക്കിംഗ് പാതകളും സ്ഥലങ്ങളുമുണ്ട്.