ടിസിഎസില്‍ ജോലി ഉപേക്ഷിക്കുന്നവരുടെ എണ്ണത്തില്‍ വന്‍ വര്‍ധന

ടിസിഎസില്‍ നിന്ന് ജോലി ഉപേക്ഷിക്കുന്ന ജീവനക്കാരുടെ എണ്ണത്തില്‍ ഗണ്യമായ വര്‍ധന. 13 ശതമാനമാണ് ടിസിഎസിലെ കൊഴിഞ്ഞുപോകല്‍ നിരക്ക്

ഒന്നാം പാദത്തിലും രണ്ടാം പാദത്തിലും കൂടുതല്‍ ജീവനക്കാരെ നിയമിച്ച ടിസിഎസ് മൂന്നാം പാദത്തില്‍ 5,370 ജീവനക്കാരുടെ മൊത്തം ഇടിവ് റിപ്പോര്‍ട്ട് ചെയ്തു. 2024 ഡിസംബര്‍ 31 ലെ കണക്കനുസരിച്ച് കമ്പനിയുടെ മൊത്തം ജീവനക്കാരുടെ എണ്ണം 6,07,354 ഉം കൊഴിഞ്ഞുപോകല്‍ നിരക്ക് 13% ഉം ആയിരുന്നു.

സെപ്റ്റംബര്‍ പാദത്തില്‍ ഐടി സേവന കമ്പനി 5,726 ജീവനക്കാരെയും ഒന്നാം പാദത്തില്‍ 5,452 ജീവനക്കാരെയും കൂട്ടിച്ചേര്‍ത്തു. നടപ്പ് സാമ്പത്തിക വര്‍ഷത്തിന്റെ ആദ്യ പാദത്തിലും രണ്ടാം പാദത്തിലുമായി 11,000 ട്രെയിനികളെയാണ് കമ്പനി നിയമിച്ചത്.

മൂന്നാം പാദത്തില്‍, കമ്പനി 25,000 ത്തിലധികം ജീവനക്കാര്‍ക്ക് സ്ഥാനക്കയറ്റം നല്‍കി. ഇതോടെ ഈ സാമ്പത്തിക വര്‍ഷത്തിലെ ആകെ സ്ഥാനക്കയറ്റം 1,10,000 ത്തിലധികമായി.

ഈ സാമ്പത്തിക വര്‍ഷത്തില്‍ കാമ്പസ് റിക്രൂട്ട്മെന്റിലൂടെ കമ്പനി 40,000 പേരെ നിയമിക്കാനുള്ള പാതയിലാണെന്നും അടുത്ത അവസാന വര്‍ഷത്തില്‍ കൂടുതല്‍ കാമ്പസ് നിയമനങ്ങള്‍ നടത്തുമെന്നും ചീഫ് എച്ച്ആര്‍ ഓഫീസര്‍ മിലിന്ദ് ലക്കാദ് പറഞ്ഞു. ജീവനക്കാരുടെ കൊഴിഞ്ഞുപോക്ക് അവരുടെ മാത്രം തീരുമാനമാണെന്നും മുന്നോട്ട് പോകുമ്പോള്‍, ത്രൈമാസ കൊഴിഞ്ഞുപോക്കില്‍ കുറവുണ്ടാകുമെന്നും അദ്ദേഹം പറഞ്ഞു.ജീവനക്കാരുടെ നൈപുണ്യ വികസനത്തിലും മൊത്തത്തിലുള്ള ക്ഷേമത്തിലും കമ്പനി നിക്ഷേപം തുടരുമെന്ന് അദ്ദേഹം പറഞ്ഞു.