രാജ്യത്ത് ഏറ്റവും ഉയര്‍ന്ന തൊഴില്‍ വളര്‍ച്ചയുള്ള നഗരങ്ങള്‍ അറിയുമോ?

രാജ്യത്ത് ഏത് നഗരങ്ങളിലാണ് തൊഴില്‍ ലഭ്യത കൂടുതല്‍ ? ഉദ്യോഗാര്‍ത്ഥികളും തൊഴില്‍ മാറാന്‍ ഉദ്ദേശിക്കുന്നവരും നിരന്തരം അന്വേഷിക്കുന്ന വിഷയമാണിത്. കൂടുതല്‍ അവസരങ്ങള്‍ തുറക്കുന്ന ഇടങ്ങളിലേക്ക് അവര്‍ ഒഴുകുന്നത് സ്വാഭാവികമാണ്. ഇപ്പോള്‍ പുറത്തിറങ്ങിയ ഒരു റിപ്പോര്‍ട്ട് ഈ വിഷയത്തില്‍ കൂടുതല്‍ വെളിച്ചം വീശുന്നു.

ഇന്ത്യയിലെ തൊഴില്‍ വിപണിയെ നയിക്കുന്നത് ഉദയ്പൂര്‍, ഇന്‍ഡോര്‍, ജയ്പൂര്‍ എന്നീ നഗരങ്ങളാണെന്നാണ് പുതിയ റിപ്പോര്‍ട്ട് പറയുന്നത്. റിക്രൂട്ട്‌മെന്റ് പ്ലാറ്റ്‌ഫോമായ നൗക്രിയുടെ റിപ്പോര്‍ട്ട് ഇന്ത്യയിലെ തൊഴില്‍ വിപണി ഈ വര്‍ഷം മികച്ച പ്രതിരോധശേഷി പ്രകടമാക്കിയതായും പറയുന്നു. തൊഴില്‍ അന്തരീക്ഷം വ്യവസായ മാറ്റങ്ങളുമായി പൊരുത്തപ്പെടുകയും വളര്‍ച്ച ലക്ഷ്യമിട്ട് സ്വയം മാറുകയും ചെയ്തു.

വര്‍ഷത്തിന്റെ ആദ്യ പാദത്തില്‍ പ്രതിവര്‍ഷം നിയമനങ്ങളില്‍ 10% ഇടിവ് ഉണ്ടായപ്പോള്‍, രണ്ടാം പാദത്തോടെ വ്യവസായങ്ങള്‍ സ്ഥിരത കൈവരിക്കാന്‍ തുടങ്ങിയെന്നും നിയമന പ്രവണതകളുടെ വിശകലനം വെളിപ്പെടുത്തുന്നു. മൂന്നാം പാദമായപ്പോഴേക്കും, നിയമനത്തില്‍ കുതിച്ചുചാട്ടം പ്രകടമായി.

ചെന്നൈ, ഹൈദരാബാദ്, പൂനെ തുടങ്ങിയ മെട്രോ നഗരങ്ങള്‍ തൊഴില്‍ വീണ്ടെടുക്കല്‍ ശ്രമങ്ങള്‍ക്ക് നേതൃത്വം നല്‍കി. പൂനെ മികച്ച പ്രകടനമാണ് കാഴ്ചവെച്ചത്. ഇവിടെ മൂന്നാം പാദത്തില്‍ ശ്രദ്ധേയമായ 13 ശതമാനം വളര്‍ച്ച കാണിക്കുന്നു. ഈ വളര്‍ച്ചാ പ്രവണത പ്രധാന നഗരങ്ങളില്‍ മാത്രമായി പരിമിതപ്പെടുത്തിയിരുന്നില്ല.

ഇന്‍ഡോര്‍, ഉദയ്പൂര്‍, ഭുവനേശ്വര്‍ തുടങ്ങിയ വളര്‍ന്നുവരുന്ന നഗരങ്ങള്‍ ശ്രദ്ധേയമായ വളര്‍ച്ച രേഖപ്പെടുത്തി. ഉദയ്പൂര്‍ 17ശതമാനവും , ഇന്‍ഡോര്‍ 14ശതമാനവും ഉയര്‍ച്ച നേടി. ജയ്പൂര്‍, പ്രത്യേകിച്ച്, വളര്‍ന്നുവരുന്ന ടെക് ഹബ്ബായി ഉയര്‍ന്നു. ഐടി മേഖലയിലെ നിയമനത്തില്‍ 48% വളര്‍ച്ചയാണ് ഇവിടെ രേഖപ്പെടുത്തിയത്. പരമ്പരാഗത കേന്ദ്രങ്ങള്‍ക്കപ്പുറത്തേക്ക് വളര്‍ച്ച വ്യാപിക്കുകയാണെന്ന് തെളിയിക്കുന്ന ഈ നഗരങ്ങള്‍ തൊഴില്‍ അവസരങ്ങളുടെ പ്രധാന കേന്ദ്രങ്ങളായി മാറുകയാണ്.

വര്‍ഷത്തിന്റെ അവസാന പകുതിയില്‍ അഹമ്മദാബാദും കുതിച്ചുയര്‍ന്നു, ഓയില്‍ & ഗ്യാസ്, കണ്‍സ്ട്രക്ഷന്‍ / എഞ്ചിനീയറിംഗ്, അക്കൗണ്ടിംഗ് / ഫിനാന്‍സ് തുടങ്ങിയ മേഖലകളില്‍ വന്‍ വളര്‍ച്ച രേഖപ്പെടുത്തി,' നൗക്രിയുടെ റിപ്പോര്‍ട്ട് ചൂണ്ടിക്കാട്ടി.

എഐ, എംഎല്‍ മേഖലകളും തിളങ്ങി. വര്‍ഷത്തില്‍ 14% മുതല്‍ 47% വരെയുള്ള വളര്‍ച്ചാ നിരക്കുകള്‍, സാങ്കേതിക വിദ്യാധിഷ്ഠിത പ്രതിഭകളുടെ വര്‍ദ്ധിച്ചുവരുന്ന ഡിമാന്‍ഡിനെ എടുത്തുകാണിക്കുന്നു. മെഷീന്‍ ലേണിംഗിനെയും ഡാറ്റയെയും ചുറ്റിപ്പറ്റിയുള്ള റോളുകള്‍ വര്‍ഷം മുഴുവനും സ്ഥിരമായി ഡിമാന്‍ഡില്‍ തുടര്‍ന്നു. മൂന്നാം പാദത്തില്‍ ഇവ 102% വളര്‍ച്ചയില്‍ എത്തി.

വിവിധ പാദങ്ങളില്‍ പോസിറ്റീവ് വളര്‍ച്ചാ നിരക്ക് നിലനിര്‍ത്തിക്കൊണ്ട് എഫ്എംസിജി മേഖലയും മുന്നേറുന്നു. 20 ശതമാനം വളര്‍ച്ച ഈ മേഖലയിലുണ്ടായി. അതുപോലെ, ഫാര്‍മ/ബയോടെക്‌മേഖലയും അഭിവൃദ്ധി പ്രാപിച്ചു.

ബാങ്കിംഗ്, ഫിനാന്‍ഷ്യല്‍ സര്‍വീസസ് മേഖല വര്‍ഷം മുഴുവനും മിതമായ വളര്‍ച്ച കൈവരിച്ചപ്പോള്‍, ഇന്‍ഷുറന്‍സ് മേഖല 37% വളര്‍ച്ചയോടെ കുതിച്ചുയര്‍ന്നു.

ഐടി/സോഫ്റ്റ്വെയര്‍ സേവന മേഖല വര്‍ഷം മുഴുവനും ഉയര്‍ച്ച താഴ്ചകള്‍ നേരിട്ടു. ആദ്യ പാദത്തില്‍ -17% കുത്തനെ ഇടിവ് രേഖപ്പെടുത്തി. എന്നിരുന്നാലും, ഈ മേഖല തുടര്‍ന്ന് കുതിച്ചുയരുകയും മൂന്നാം പാദത്തില്‍ 12% വളര്‍ച്ച രേഖപ്പെടുത്തുകയും ചെയ്തു.

നിര്‍മ്മാണ മേഖല മൊത്തത്തില്‍ സ്ഥിരമായ പുരോഗതി പ്രകടമാക്കി, പ്രതിവര്‍ഷം 6% വളര്‍ച്ച കൈവരിച്ചു. ഇതിനുള്ളില്‍, ഓട്ടോ, ഓട്ടോ ആന്‍സിലറി മേഖല ശക്തമായ വീണ്ടെടുക്കല്‍ നടത്തി.

അനുഭവ തലങ്ങള്‍ നോക്കുമ്പോള്‍, മുതിര്‍ന്ന പ്രതിഭകളിലേക്ക് വ്യക്തമായ മാറ്റം ഉണ്ടായിട്ടുണ്ട്. 16 വര്‍ഷത്തിലധികം അനുഭവപരിചയമുള്ള പ്രൊഫഷണലുകള്‍ വര്‍ഷത്തില്‍ ഏറ്റവും കൂടുതല്‍ വളര്‍ച്ച കൈവരിച്ചു. രണ്ടാം പാദത്തില്‍ അത് 32% ആയി ഉയര്‍ന്നു. മറുവശത്ത്, എന്‍ട്രി ലെവല്‍, മിഡ്-കരിയര്‍ നിയമനം കൂടുതല്‍ പ്രവചനാതീതമായിരുന്നുവെന്നും റിപ്പോര്‍ട്ട് പറയുന്നു.