ചെങ്കടല്‍ പ്രശ്നങ്ങള് ഇന്ത്യന്‍ വ്യാപാരത്തെ ബാധിക്കുന്നു
- കപ്പലുകള്‍ കേപ് ഓഫ് ഗുഡ് ഹോപ്പ് വഴി തിരിച്ചുവിടുന്നു
- റൂട്ട്മാറ്റം 14ദിവസത്തെ അധിക യാത്രയ്ക്കും മറ്റ് ചെലവുകള്‍ക്കും കാരണമാകുന്നു
- യൂറോപ്പ്, യുഎസ്, ലാറ്റിന്‍ അമേരിക്ക എന്നിവടങ്ങളിലേക്കുള്ള കയറ്റുമതി പ്രതിസന്ധിയില്‍
ചെങ്കടലില്‍ ഇപ്പോള്‍ വര്‍ധിച്ചുവരുന്ന പ്രശ്നങ്ങള് ഇന്ത്യയുടെ വ്യാപാരത്തെ ബാധിക്കുന്നതായി ഔദ്യോഗികവൃത്തങ്ങള്‍ സ്ഥിരീകരിച്ചു.ഇതിനെത്തുടര്‍ന്ന് ചരക്ക് ചെലവുകളും ഇന്‍ഷുറന്‍സ് പ്രീമിയങ്ങളും ഉയരുകയാണ്. ഷിപ്പര്‍മാര്‍ യുഎസും യൂറോപ്പും പോലുള്ള ലക്ഷ്യസ്ഥാനങ്ങളിലേക്ക് എത്താന്‍ കൂടുതല്‍ ദൂരം സഞ്ചരിക്കേണ്ട സാഹചര്യമാണ് ഉള്ളതെന്ന് ഒരു ഉദ്യോഗസ്ഥന്‍ പറഞ്ഞു.
ചെങ്കടലിനെയും മെഡിറ്ററേനിയന്‍ കടലിനെയും ഇന്ത്യന്‍ മഹാസമുദ്രവുമായി ബന്ധിപ്പിക്കുന്ന നിര്‍ണായക കപ്പല്‍പാതയായ ബാബ്-എല്‍-മണ്ടേബ് കടലിടുക്കിന് ചുറ്റുമുള്ള സ്ഥിതിഗതികള്‍ യെമന്‍ ആസ്ഥാനമായുള്ള ഹൂതി തീവ്രവാദികളുടെ സമീപകാല ആക്രമണങ്ങളെത്തുടര്‍ന്ന് രൂക്ഷമായിട്ടുണ്ട്.
ഈ ആക്രമണങ്ങള്‍ കാരണം, ഷിപ്പര്‍മാര്‍ കേപ് ഓഫ് ഗുഡ് ഹോപ്പ് വഴി ചരക്കുകള്‍ കൊണ്ടുപോകാന്‍ നിര്‍ബന്ധിതരാകുന്നു. ഈ പാത സ്വീകരിക്കുന്നത് ഏകദേശം 14 ദിവസത്തെ കാലതാമസത്തിനും ഉയര്‍ന്ന ചരക്ക്, ഇന്‍ഷുറന്‍സ് ചെലവുകള്‍ക്കും കാരണമാകുന്നു. ഇത് സംബന്ധിച്ച് വാണിജ്യ മന്ത്രാലയത്തില്‍ ചേര്‍ന്ന ഉന്നതതല യോഗത്തില്‍ വിഷയം ചര്‍ച്ച ചെയ്തു. വ്യാപാരികള്‍, ഷിപ്പര്‍മാര്‍, കണ്ടെയ്നര്‍ സ്ഥാപനങ്ങള്‍, ചരക്ക് കൈമാറ്റക്കാര്‍ എന്നിവരുള്‍പ്പെടെയുള്ള ബന്ധപ്പെട്ടവര്‍ യോഗത്തില്‍ പങ്കെടുത്തിരുന്നു.
യൂറോപ്പ്, യുഎസിന്റെ കിഴക്കന്‍ തീരം, ലാറ്റിന്‍ അമേരിക്ക എന്നിവിടങ്ങളിലേക്കുള്ള കയറ്റുമതിയാണ് പ്രധാനമായും പ്രശ്നങ്ങള് നേരിടുന്നത്. ആക്രമണങ്ങള്‍ കാരണം, ഷിപ്പിംഗ് ലൈനുകള്‍ ചെങ്കടലിലൂടെയുള്ള അവരുടെ യാത്ര ഇപ്പോള്‍ കുറച്ചിരിക്കുകയാണ്.
'കപ്പലുകള്‍ക്ക് എന്ത് സംഭവിക്കുമെന്ന് അവര്‍ക്ക് ഉറപ്പില്ലാത്തതിനാല്‍ ഇന്‍ഷുറന്‍സ് ചെലവുകളും വര്‍ധിച്ചു. ചില ചരക്കുകള്‍ നീണ്ട പാതയിലൂടെ കടന്നുപോയി. ചില കപ്പലുകളും സര്‍ക്കാര്‍ നല്‍കുന്ന എസ്‌കോര്‍ട്ട് ചെയ്യുന്നു,' ഉദ്യോഗസ്ഥര്‍ കൂട്ടിച്ചേര്‍ത്തു.
കയറ്റുമതിക്കാരുടെ അഭിപ്രായത്തില്‍, ചരക്ക് നിരക്ക് ഉയരുന്നതിനാല്‍, ചിലര്‍ തങ്ങളുടെ ചരക്ക് കയറ്റുമതി മാറ്റിവയ്ക്കുന്നു. കൂടാതെ, അനിശ്ചിതത്വം കണ്ടെയ്‌നറുകളുടെ ക്ഷാമത്തിലേക്കും നയിച്ചേക്കാം.
ചരക്കുകൂലിയിലെ വര്‍ധനവ് റൂട്ട് അനുസരിച്ച് വ്യത്യാസപ്പെടുന്നു. അടിസ്ഥാന ചരക്ക് നിരക്കുകള്‍ കൂടാതെ, റിസ്‌ക് സര്‍ചാര്‍ജ്, പീക്ക് സീസണ്‍ സര്‍ചാര്‍ജ് എന്നിവയും ഉയര്‍ന്നു.
കയറ്റുമതിക്ക് പുറമെ, ഇറക്കുമതിയിലെ തടസ്സവും മുന്നോട്ടുള്ള പ്രശ്നങ്ങള് സൃഷ്ടിക്കും. ഒരു മാസത്തേക്കുള്ള ഇന്‍വെന്ററി ഉണ്ടെന്നും അതിന് ശേഷം സ്ഥിതി മെച്ചപ്പെട്ടില്ലെങ്കില്‍ പ്രശ്നങ്ങള് നേരിടാന്‍ തുടങ്ങുമെന്നും ഇറക്കുമതിക്കാര്‍ പറയുന്നു.
ഓരോ വര്‍ഷവും ഏകദേശം 100 ബില്യണ്‍ യുഎസ് ഡോളറിന്റെ ഇന്ത്യന്‍ കയറ്റുമതി ചെങ്കടല്‍ വഴി കടന്നുപോകുന്നുണ്ടെന്ന് വിദഗ്ധര്‍ സൂചിപ്പിക്കുന്നു. മര്‍ച്ചന്റ് ഷിപ്പിംഗിനെതിരായ ആക്രമണങ്ങള്‍ നിലച്ചാലും സ്ഥിതിഗതികള്‍ പൂര്‍ണ്ണമായും സാധാരണ നിലയിലാകാന്‍ കുറച്ച് സമയമെടുക്കും.
ഏകദേശം 60 കപ്പലുകളാണ് സൂയസ് വഴി ദിനംപ്രതി കടന്നുപോകുന്നത്. ബാബ്-എല്‍-മണ്ടേബ് കടലിടുക്ക്, സൂയസ് കനാല്‍, ചെങ്കടല്‍ എന്നിവയുടെ വ്യാപാര പാത കേപ് ഓഫ് ഗുഡ് ഹോപ്പ് റൂട്ടിനേക്കാള്‍ ചെറുതും വേഗതയുള്ളതുമാണ്, ഇത് മിക്ക ഷിപ്പിംഗ് കമ്പനികള്‍ക്കും ഇഷ്ടപ്പെട്ട ഓപ്ഷനാക്കി മാറ്റുന്നു.
മുംബൈ, ജെഎന്‍പിടി, അല്ലെങ്കില്‍ ചെന്നൈ തുടങ്ങിയ പ്രധാന ഇന്ത്യന്‍ തുറമുഖങ്ങളില്‍ നിന്ന് ആരംഭിക്കുന്ന പാത, അറബിക്കടലിലൂടെ പടിഞ്ഞാറോട്ട് പോയി, ചെങ്കടലില്‍ പ്രവേശിച്ച്, സൂയസ് കനാല്‍ വഴി മെഡിറ്ററേനിയന്‍ കടലിലേക്ക് നാവിഗേറ്റ് ചെയ്യുന്നു.
അവിടെ നിന്ന് കപ്പലുകള്‍ക്ക് അവരുടെ ലക്ഷ്യസ്ഥാനമനുസരിച്ച് വിവിധ യൂറോപ്യന്‍ തുറമുഖങ്ങളില്‍ എത്തിച്ചേരാനാകും.