ഇന്ത്യയിലെ വില്‍പ്പനയില്‍ ആപ്പിള്‍ 35ശതമാനം വളര്‍ച്ച നേടും
- 2023 സാമ്പത്തിക വര്‍ഷത്തില്‍ ആപ്പിളിന്റെ ഇന്ത്യന്‍ വരുമാനം 49,332 കോടി ആയിരുന്നു
- കണക്കുകളെക്കുറിച്ച് ആപ്പിള്‍ ഔദ്യോഗികമായി പ്രതികരിച്ചിട്ടില്ല
- 2024ല്‍ ഇന്ത്യയില്‍ നിന്നുള്ള കയറ്റുമതി 10 ബില്യണ്‍ ഡോളര്‍ കവിഞ്ഞു
2023-24ല്‍ ആപ്പിള്‍ ഇങ്ക് അതിന്റെ ഇന്ത്യന്‍ വരുമാനത്തില്‍ 35 ശതമാനം വളര്‍ച്ച നേടുമെന്ന് റിപ്പോര്‍ട്ടുകള്‍. ഏകദേശം 67,000 കോടി രൂപയുടെ (8 ബില്യണ്‍ ഡോളറിലധികം) വരുമാനം കമ്പനി നേടുമെന്നാണ് വിലയിരുത്തല്‍.
ഔദ്യോഗിക സാമ്പത്തിക ഫയലിംഗ് സെപ്റ്റംബര്‍-ഒക്ടോബര്‍ മാസങ്ങളില്‍ കുപെര്‍ട്ടിനോ ആസ്ഥാനമായുള്ള ടെക് ഭീമന്‍, കമ്പനികളുടെ രജിസ്ട്രാര്‍ക്ക് (ആര്‍ഒസി) സമര്‍പ്പിക്കുമെന്ന് പ്രതീക്ഷിക്കുന്നു.
സാമ്പത്തിക വര്‍ഷം 2023-ല്‍ ആപ്പിള്‍ അതിന്റെ ഇന്ത്യന്‍ വരുമാനം 49,332 കോടി ആയി റിപ്പോര്‍ട്ട് ചെയ്തു. ഇത് 2022 സാമ്പത്തിക വര്‍ഷത്തിലെ 33,381 കോടി രൂപയില്‍ നിന്ന് 48 ശതമാനം വര്‍ധനവ് രേഖപ്പെടുത്തുന്നു.
കൂടാതെ ഈ കാലയളവില്‍ 2230 കോടി രൂപയാണ് കമ്പനി ഇന്ത്യയില്‍ ലാഭം കൈവരിച്ചത്. ഇത് 2022 ലെ 1,263 കോടി രൂപയുടെ ലാഭത്തില്‍ നിന്ന് 76.5 ശതമാനം വര്‍ധനവാണ്. എന്നിരുന്നാലും, സാമ്പത്തിക വര്‍ഷം 2024 ലെ ആപ്പിളിന്റെ ഇന്ത്യന്‍ വരുമാന കണക്ക് കണ്ടെത്താനായില്ല.
ഈ നമ്പറുകളെക്കുറിച്ച് ആപ്പിള്‍ പ്രതികരിച്ചിട്ടില്ല. ഈ രാജ്യത്ത് ശക്തമായ വളര്‍ച്ചയുണ്ടായിട്ടും, ആപ്പിളിന്റെ മൊത്തത്തിലുള്ള ആഗോള വില്‍പ്പനയില്‍ ഇന്ത്യയുടെ പങ്ക് മിതമായി തുടര്‍ന്നു. 2023 ലെ മൊത്തം വിറ്റുവരവിന്റെ 1.5 ശതമാനം മാത്രമാണിത്. ഈ കണക്ക് 2024 സാമ്പത്തിക വര്‍ഷത്തില്‍ 2 ശതമാനത്തിലേറെയായി വര്‍ധിക്കുമെന്ന് പ്രതീക്ഷിക്കുന്നു.
എന്നിരുന്നാലും, ആപ്പിള്‍ ചൈനയില്‍ നിന്ന് കൂടുതല്‍ ഐഫോണ്‍ ഉല്‍പ്പാദനം മാറ്റിയതിനാല്‍ ഇന്ത്യ ഒരു സുപ്രധാന കേന്ദ്രമായി ഉയരുകയാണ്. 2024ല്‍ ഇന്ത്യയില്‍ നിന്നുള്ള കയറ്റുമതി 10 ബില്യണ്‍ ഡോളര്‍ കവിഞ്ഞതിനാല്‍, ആപ്പിളിന്റെ ഐഫോണ്‍ ഉല്‍പ്പാദന മൂല്യത്തിന്റെ ഏകദേശം 14 ശതമാനമാണ്.
റിപ്പോര്‍ട്ടുകള്‍ പ്രകാരം, ആപ്പിളിന്റെ പ്രൊഡക്ഷന്‍-ലിങ്ക്ഡ് ഇന്‍സെന്റീവ് (പിഎല്‍ഐ) പദ്ധതിയുടെ അവസാന വര്‍ഷത്തില്‍ ടാറ്റ ഇലക്ട്രോണിക്സ്, പെഗാട്രോണ്‍, ഫോക്സ്‌കോണ്‍ എന്നീ മൂന്ന് വെണ്ടര്‍മാരെ പ്രയോജനപ്പെടുത്തി ഈ വിഹിതം 26 സാമ്പത്തിക വര്‍ഷത്തിന്റെ അവസാനത്തോടെ 23-25 ശതമാനമായി ഉയര്‍ത്താന്‍ ലക്ഷ്യമിടുന്നു.
ഈ വെണ്ടര്‍മാരുടെ കൂട്ടായ പ്രകടനം പിഎല്‍ഐ സ്‌കീമിന് കീഴിലുള്ള ആപ്പിളിന്റെ ലക്ഷ്യങ്ങളെ മറികടന്നു. ഉദാഹരണത്തിന്, കഴിഞ്ഞ മൂന്ന് വര്‍ഷത്തിനിടെ ഇന്ത്യയില്‍ അസംബിള്‍ ചെയ്ത ഐഫോണുകളുടെ മൊത്തത്തിലുള്ള ഉല്‍പ്പാദന മൂല്യം 1,94,800 കോടി രൂപയിലെത്തി, ഇത് ലക്ഷ്യമായ 133,493 കോടി രൂപയേക്കാള്‍ വളരെ കൂടുതലാണ്. അതുപോലെ, മൂന്ന് വര്‍ഷത്തിനിടെ ഇന്ത്യയില്‍ നിന്നുള്ള കയറ്റുമതി 140,280 കോടി രൂപയുടെ മൂല്യം കൈവരിച്ചു.