വിപണികള്‍ നേട്ടത്തില്‍, ഐടിയും റിയല്‍റ്റിയും നഷ്ടത്തില്‍

ആഗോള വിപണികളിലെ സമ്മിശ്ര പ്രവണതകൾക്കിടയിൽ ബെഞ്ച്മാർക്ക് സൂചികകളായ സെൻസെക്സും നിഫ്റ്റിയും ചൊവ്വാഴ്ച ആദ്യ വ്യാപാരത്തിൽ ഇടിഞ്ഞു. പിന്നീട് ചാഞ്ചാട്ടം പ്രകടമാക്കിയെങ്കിലും ഇപ്പോള്‍ വിപണികള്‍ നേട്ടത്തിലാണ്. സെൻസെക്‌സ് തുടക്ക വ്യാപാരത്തില്‍ 116.42 പോയിൻ്റ് ഉയർന്ന് 71,188.91 പോയിൻ്റിലെത്തി.നിഫ്റ്റി 14.80 പോയിൻ്റ് ഉയർന്ന് 21,630.85 പോയിൻ്റിലെത്തി.

സെൻസെക്‌സ് പാക്കിൽ ടാറ്റ സ്റ്റീൽ, ജെഎസ്‌ഡബ്ല്യു സ്റ്റീൽ, പവ്‌ഗ്രിഡ്, വിപ്രോ തുടങ്ങിയ ഓഹരികൾ നഷ്ടത്തിലായപ്പോൾ ഐസിഐസിഐ ബാങ്ക്, എൻടിപിസി, ഐടിസി, കൊട്ടക് ബാങ്ക് എന്നിവ പച്ചയിലാണ് വ്യാപാരം നടത്തുന്നത്. വലിയ നേട്ടം ബാങ്കിംഗ് ഓഹരികളിലാണ് രേഖപ്പെടുത്തുന്നത്. 

മിഡ്‌ക്യാപ്, സ്‌മോൾക്യാപ് ഓഹരികൾ അമിതമായ മൂല്യമുള്ളതിനാൽ കുത്തനെ ഇടിവ് രേഖപ്പെടുത്താൻ സാധ്യതയുണ്ടെന്ന് ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെൻ്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു. “ പൊതുമേഖലാ ബാങ്കുകളെപ്പോലെ ഈ വിഭാഗത്തിൽ ന്യായമായ മൂല്യമുള്ള ഓഹരികൾ വാങ്ങാൻ തിരുത്തൽ അവസരമൊരുക്കും,” അദ്ദേഹം അഭിപ്രായപ്പെട്ടു.

ഏഷ്യയിൽ ടോക്കിയോയുടെ നിക്കി 225, ചൈനയുടെ ഷാങ്ഹായ് കോമ്പോസിറ്റ് എന്നിവ പോസിറ്റീവ് ടെറിട്ടറിയിൽ വ്യാപാരം നടത്തുമ്പോൾ ഹോങ്കോങ്ങിൻ്റെ ഹാംഗ് സെങ് ചുവപ്പിലാണ്. തിങ്കളാഴ്ച, യുഎസ് വിപണി പൊതുവില്‍ നെഗറ്റിവ് ആയാണ് അവസാനിച്ചത്. 

ആഗോള എണ്ണ മാനദണ്ഡമായ ബ്രെൻ്റ് ക്രൂഡ് ചൊവ്വാഴ്ച ബാരലിന് 0.09 ശതമാനം ഉയർന്ന് 82.07 ഡോളറിലെത്തി.

തിങ്കളാഴ്ച സെൻസെക്‌സ് 523 പോയിൻ്റ് അഥവാ 0.73 ശതമാനം താഴ്ന്ന് 71,072.49 പോയിൻ്റിലും നിഫ്റ്റി 166.45 പോയിൻ്റ് അഥവാ 0.76 ശതമാനം ഇടിഞ്ഞ് 21,616.05 പോയിൻ്റിലും ക്ലോസ് ചെയ്തു. എക്‌സ്‌ചേഞ്ച് ഡാറ്റ പ്രകാരം 126.60 കോടി രൂപയുടെ ഇക്വിറ്റികൾ വാങ്ങി വിദേശ സ്ഥാപന നിക്ഷേപകർ (എഫ്ഐഐകൾ) തിങ്കളാഴ്ച അറ്റവാങ്ങലുകാരായി മാറി.