വളർച്ചാ അവലോകനം: സിയറ്റ് ഓഹരികൾ 20 ശതമാനം ഉയർന്നു

ടയർ നിർമാതാക്കളായ സിയറ്റി​ന്റെ ഓഹരികൾ ഇന്ന് വിപണിയിൽ 20 ശതമാനം ഉയർന്നു. മാനേജ്‌മെന്റ് നൽകിയ കമ്പനിയുടെ വളർച്ചാ അവലോകനം നിക്ഷേപകർക്കിടയിൽ മികച്ച പ്രതികരണം സൃഷ്ടിച്ചതിനെത്തുടർന്നാണ് വില ഉയർന്നത്.

വാഹന നിർമ്മാതാക്കളിൽ നിന്നുള്ള ഡിമാ​ന്റ് വർധിക്കുന്നതിനാലും, നിലവിലുള്ള ഡിമാൻഡ് വളർച്ച സ്ഥിരമായി തുടരുന്നതിനാലും മികച്ച പുരോ​ഗതിയുണ്ടാകുമെന്ന് മാനേജ്‌മെന്റ് അറിയിച്ചു. എങ്കിലും കമ്പനിയുടെ കയറ്റുമതിയിൽ അല്പം മാന്ദ്യമുണ്ടെന്ന് അവർ കൂട്ടിച്ചേർത്തു. അസംസ്‌കൃത വസ്തുക്കളിലുണ്ടായ വിലക്കുറവി​ന്റെ ഗുണം നടപ്പു സാമ്പത്തിക വർഷത്തിന്റെ മൂന്നാം പാദം മുതൽ പ്രകടമാകുമെന്നാണ് കമ്പനി പ്രതീക്ഷിക്കുന്നത്. കൂടാതെ, വരുമാന (Ebitda) മാർജിൻ 10 മുതൽ 12 ശതമാനം വരെയാകുമെന്നും കമ്പനി പ്രതീക്ഷിക്കുന്നു. നടപ്പു സാമ്പത്തിക വർഷത്തിന്റെ ഒന്നാം പാദത്തിൽ 6 ശതമാനവും, കഴിഞ്ഞ സാമ്പത്തിക വർഷത്തിൽ 7.6 ശതമാനവുമായിരുന്നു വരുമാന മാർജിൻ. ഓഹരി ഇന്ന് 1,385.05 രൂപയിൽ വ്യാപാരം ആരംഭിച്ചു. ഉയർന്ന ഡിമാ​ന്റ് മൂലം 1,661 രൂപയിലാണ് വ്യാപാരം അവസാനിച്ചത്.