ആഡംബര ഭവനങ്ങള്‍ക്ക് ഉയര്‍ന്ന ഡിമാന്‍ഡ്

രാജ്യത്ത് ആഡംബര ഹൗസിംഗ് പ്രോപ്പര്‍ട്ടികള്‍ക്കുള്ള ഡിമാന്‍ഡ് ശക്തമാകുന്നു. റിയല്‍റ്റി പ്രമുഖരായ ഡിഎല്‍എഫിന്റെ ബുക്കിംഗ് ഈ സാമ്പത്തിക വര്‍ഷത്തിന്റെ ആദ്യ പാദത്തില്‍ മൂന്നിരട്ടി വര്‍ധിച്ച് 6,404 കോടി രൂപയായത് ഇതിന് ഉദാഹരണമാണ്.

കഴിഞ്ഞ വര്‍ഷം ഇതേ കാലയളവില്‍ 2,040 കോടി രൂപയുടെ വസ്തുവകകളായിരുന്നു കമ്പനി വിറ്റഴിച്ചത്.

2024-25 സാമ്പത്തിക വര്‍ഷം മുഴുവനും 17,000 കോടി രൂപയുടെ വില്‍പ്പന ബുക്കിംഗുകള്‍ നേടുന്നതിനാണ് ഡിഎല്‍എഫ് ലക്ഷ്യമിടുന്നത്. മുന്‍ വര്‍ഷത്തില്‍ ഇത് ഏകദേശം 15,000 കോടി രൂപയായിരുന്നു.

ഏപ്രില്‍-ജൂണ്‍ പാദത്തില്‍ കമ്പനിയുടെ സെയില്‍സ് ബുക്കിംഗുകള്‍ ഗുരുഗ്രാമിലെ സെക്ടര്‍ 76/77ലെ ആഡംബര പദ്ധതിയായ 'ഡിഎല്‍എഫ് പ്രിവാന വെസ്റ്റ്' വഴി 5,600 കോടി രൂപയുടെ വില്‍പ്പന നടത്തി. ഗുരുഗ്രാമിലെ ഡിഎല്‍എഫ് 5-ലെ സൂപ്പര്‍ ആഡംബര ഭവന പദ്ധതിയായ 'ദി കാമെലിയാസ്' 4 യൂണിറ്റുകള്‍ 251 കോടി രൂപയ്ക്ക് വിറ്റു.

ഈ സാമ്പത്തിക വര്‍ഷത്തിന്റെ ആദ്യ പാദത്തില്‍ ഏകീകൃത ലാഭം 23 ശതമാനം വര്‍ധിച്ച് 645.61 കോടി രൂപയായതായി ഡിഎല്‍എഫ് റിപ്പോര്‍ട്ട് ചെയ്തു. മുന്‍ വര്‍ഷം ഇതേ കാലയളവില്‍ 527 കോടി രൂപയായിരുന്നു അറ്റാദായം.

ഈ സാമ്പത്തിക വര്‍ഷം ഏപ്രില്‍-ജൂണ്‍ കാലയളവില്‍ മൊത്തവരുമാനം മുന്‍വര്‍ഷത്തെ ഇതേ കാലയളവില്‍ 1,521.71 കോടി രൂപയില്‍ നിന്ന് 1,729.82 കോടി രൂപയായി ഉയര്‍ന്നു.

ഗുരുഗ്രാം, മുംബൈ, ഗോവ, ചണ്ഡീഗഡ് ട്രൈസിറ്റി എന്നിവയുള്‍പ്പെടെ വിവിധ സെഗ്മെന്റുകളിലും ഭൂമിശാസ്ത്രത്തിലും ഉടനീളം ഈ സാമ്പത്തിക വര്‍ഷത്തില്‍ 9 ദശലക്ഷം ചതുരശ്ര അടി വിസ്തീര്‍ണമുള്ള പുതിയ ഉല്‍പന്നങ്ങളുടെ ശക്തമായ ലോഞ്ച് പൈപ്പ്ലൈന്‍ ആസൂത്രണം ചെയ്തിട്ടുണ്ടെന്നും കമ്പനി അറിയിച്ചു.

ഡിഎല്‍എഫിന്റെ വാടക വിഭാഗമായ ഡിഎല്‍എഫ് സൈബര്‍ സിറ്റി ഡെവലപ്പേഴ്സ് ലിമിറ്റഡിന്റെ വരുമാനം 1,553 കോടി രൂപയായി. 10 ശതമാനം വളര്‍ച്ചയാണ് ഇത് പ്രതിഫലിപ്പിക്കുന്നത്. അതേസമയം ത്രൈമാസത്തിലെ ഏകീകൃത ലാഭം 470 കോടി രൂപയായി.