ബാധ്യത കൂടുന്നു; ബംഗ്ലാദേശിന് മുന്നറിയിപ്പുമായി അദാനി പവര്‍
- ഒരു പവര്‍ പ്രോജക്റ്റിന്റെ പേയ്മെന്റുകളില്‍ ബംഗ്ലാദേശിന് 500 മില്യണ്‍ ഡോളര്‍ കുടിശ്ശിക
- കടബാധ്യതകള്‍ വര്‍ധിക്കുമ്പോഴും അദാനി ധാക്കയ്ക്ക് വൈദ്യുതി നല്‍കുന്നുണ്ട്
- എല്ലാ വൈദ്യുത കമ്പനികള്‍ക്കുമായി ധാക്ക നല്‍കാനുള്ളത് 3.7 ബില്യണ്‍ ഡോളര്‍
ബംഗ്ലാദേശിന്റെ ഇടക്കാല സര്‍ക്കാരിന് അദാനി ഗ്രൂപ്പിന്റെ മുന്നറിയിപ്പ്. വിവാദമായ ഒരു പവര്‍ പ്രോജക്റ്റിന്റെ പേയ്മെന്റുകള്‍ സംബന്ധിച്ചാണ് മുന്നറിയിപ്പ്. ബംഗ്ലാദേശ് 500 മില്യണ്‍ ഡോളര്‍ കുടിശ്ശിക വരുത്തിയിട്ടുണ്ട്.
മുന്‍ പ്രധാനമന്ത്രി ഷെയ്ഖ് ഹസീനയുടെ നേതൃത്വത്തില്‍ ഒപ്പുവച്ച കരാറില്‍ 1,600 മെഗാവാട്ട് ഗോഡ്ഡ കല്‍ക്കരി പ്ലാന്റില്‍ നിന്നുള്ള വൈദ്യുതി വിതരണം ഉള്‍പ്പെടുന്നു. വര്‍ധിച്ചുവരുന്ന കുടിശ്ശികയുടെ സുസ്ഥിരമല്ലാത്ത സ്വഭാവത്തെക്കുറിച്ച് അദാനി പവര്‍ ആശങ്ക പ്രകടിപ്പിച്ചു.
''ഞങ്ങള്‍ ബംഗ്ലാദേശ് ഗവണ്‍മെന്റുമായി തുടര്‍ച്ചയായ ചര്‍ച്ചയിലാണ്, ഞങ്ങളുടെ വിതരണ പ്രതിബദ്ധതകളും കടം കൊടുക്കുന്നവരോടും വിതരണക്കാരോടുമുള്ള ബാധ്യതകളും നിറവേറ്റുന്നതില്‍ ഞങ്ങള്‍ നേരിടുന്ന പ്രതിസന്ധികളും ബംഗ്ലാദേശിനെ ബോധ്യപ്പെടുത്തിയിട്ടുണ്ട്'', അദാനി പവര്‍ പറയുന്നു.
കടബാധ്യതകള്‍ വര്‍ധിച്ചുകൊണ്ടിരിക്കുമ്പോഴും, ഗോഡ്ഡ സൗകര്യത്തില്‍ നിന്ന് ബംഗ്ലാദേശിന് വിശ്വസനീയവും മത്സരാധിഷ്ഠിതവുമായ വിലയുള്ള വൈദ്യുതി നല്‍കാനുള്ള പ്രതിബദ്ധത അദാനി പവര്‍ വീണ്ടും ഉറപ്പിച്ചു.
അതേസമയം ബംഗ്ലാദേശിന്റെ മൊത്തം എല്ലാ കമ്പനികള്‍ക്കുമായുള്ള വൈദ്യുതി ബാധ്യതകള്‍ ഇപ്പോള്‍ 3.7 ബില്യണ്‍ ഡോളറിലെത്തി. ഇതില്‍ 492 മില്യണ്‍ ഡോളര്‍ അദാനിക്ക് നല്‍കാനുണ്ട്.
അതേസമയം രാജ്യത്തിന്റെ സാമ്പത്തിക സ്ഥിതി സുസ്ഥിരമാക്കുന്നതിന് ലോകബാങ്കില്‍ നിന്ന് ഉള്‍പ്പെടെയുള്ള അന്താരാഷ്ട്ര വായ്പകള്‍ ഉറപ്പാക്കാന്‍ യൂനസിന്റെ ഭരണകൂടം പ്രവര്‍ത്തിക്കുകയാണ്.
ബംഗ്ലാദേശിലെ തുറമുഖങ്ങള്‍, ഡാറ്റാ സെന്ററുകള്‍, ഊര്‍ജം തുടങ്ങിയ മേഖലകളില്‍ അദാനി ഗ്രൂപ്പിന് വിപുലമായ നിക്ഷേപമുണ്ട്. പ്രധാനമന്ത്രി നരേന്ദ്ര മോദിയുടെ 2015ലെ ധാക്ക സന്ദര്‍ശനത്തിനിടെയാണ് ഗോഡ്ഡ പവര്‍ പ്ലാന്റിനായി ബംഗ്ലാദേശും അദാനിയും തമ്മില്‍ കരാര്‍ ഒപ്പിട്ടത്.
കഴിഞ്ഞ വര്‍ഷം പൂര്‍ണതോതില്‍ പ്രവര്‍ത്തനക്ഷമമായ ഈ പദ്ധതി, ചെലവ് കൂടിയതിന്റെ പേരില്‍ വിമര്‍ശനം ഉയര്‍ന്നിരുന്നു. പ്ലാന്റില്‍ നിന്ന് വൈദ്യുതി ഇറക്കുമതി ചെയ്യുന്നത് ബംഗ്ലാദേശിന് സാമ്പത്തിക ലാഭമല്ലെന്ന് അവര്‍ വാദിച്ചു. എന്നിരുന്നാലും, മറ്റ് കല്‍ക്കരി അധിഷ്ഠിത വൈദ്യുത നിലയങ്ങളെ അപേക്ഷിച്ച് വൈദ്യുതിയുടെ വില 'വളരെ മത്സരാത്മകമാണ്' എന്ന് അദാനി വാദിക്കുന്നു.
വര്‍ധിച്ചുവരുന്ന കടത്തിന് മറുപടിയായി, ഭാവിയിലെ ഇന്‍ഫ്രാസ്ട്രക്ചര്‍ പ്രോജക്ടുകള്‍ക്കായി മത്സരാധിഷ്ഠിത ബിഡ്ഡിംഗ് വീണ്ടും അവതരിപ്പിക്കാനും മുന്‍ ഭരണകൂടത്തിന് കീഴിലുള്ള ഇടപാടുകള്‍ പുനഃപരിശോധിക്കാനും യൂനസിന്റെ സര്‍ക്കാര്‍ പദ്ധതിയിടുന്നു.
ലോകത്തിലെ ഏറ്റവും വലിയ രണ്ടാമത്തെ വസ്ത്ര കയറ്റുമതിക്കാരായ ബംഗ്ലാദേശ്, ആഭ്യന്തര വാതക ശേഖരം കുറയുന്നതിനാല്‍ ഊര്‍ജക്ഷാമം നേരിടുകയാണ്. രാജ്യത്ത് രാഷ്ട്രീയ അശാന്തി തുടരുന്നതിനാല്‍, നിരവധി അന്താരാഷ്ട്ര വസ്ത്ര ബ്രാന്‍ഡുകള്‍ ഉത്പാദനത്തിനായി ഇന്ത്യയിലേക്ക് തിരിഞ്ഞു.