വ്യക്തിഗത വായ്പാ വിഭാഗങ്ങളുടെ ഉയര്‍ന്ന വളര്‍ച്ച ആര്‍ബിഐ നിരീക്ഷിക്കുന്നു

വളരെ ഉയർന്ന വളർച്ച രേഖപ്പെടുത്തുന്ന വ്യക്തിഗത വായ്പാ വിഭാഗങ്ങളെ സൂക്ഷ്മമായി നിരീക്ഷിക്കുകയാണെന്ന് റിസർവ് ബാങ്ക് ഗവര്‍ണര്‍ ശക്തികാന്ത ദാസ്. ധനനയ സമിതി യോഗത്തിനു ശേഷം മാധ്യമങ്ങളെ കണ്ടപ്പോഴാണ് അദ്ദേഹം ഇക്കാര്യം വ്യക്തമാക്കിയത്.

“വളരെ ഉയർന്ന വളർച്ച രേഖപ്പെടുത്തുന്ന ചില വ്യക്തിഗത വായ്പാ വിഭാഗങ്ങളില്‍ പ്രാരംഭ സമ്മർദ്ദത്തിന്റെ ഏതെങ്കിലും ലക്ഷണങ്ങളുണ്ടോയെന്ന് ആർബിഐ സൂക്ഷ്മമായി നിരീക്ഷിക്കുന്നു. ബാങ്കുകളുടെ എൻബിഎഫ്‌സികളോടും അവരുടെ ആന്തരിക നിരീക്ഷണ സംവിധാനങ്ങൾ ശക്തിപ്പെടുത്താനും അപകടസാധ്യതകൾ ഉണ്ടെങ്കിൽ അത് പരിഹരിക്കാനും സ്വന്തം താൽപ്പര്യത്തിനനുസരിച്ച് അനുയോജ്യമായ സുരക്ഷാ സംവിധാനങ്ങൾ ഏർപ്പെടുത്താനും കേന്ദ്ര ബാങ്ക് ശക്തമായി ഉപദേശിക്കും,” ദാസ് പറഞ്ഞു.

ശക്തമായ റിസ്ക് മാനേജ്മെന്റും അണ്ടര്‍ റൈറ്റിംഗ് മാനദണ്ഡങ്ങളും ഉണ്ടാക്കേണ്ടത് കാലഘട്ടത്തിന്റെ ആവശ്യമാണെന്നും ദാസ് തന്റെ എംപിസി പ്രസ്താവനയിൽ എടുത്തുപറഞ്ഞു.

ഏറ്റവും പുതിയ കണക്കുകള്‍ അനുസരിച്ച്, ഇന്ത്യൻ ബാങ്കുകൾ തങ്ങളുടെ വ്യക്തിഗത വായ്പാ പോർട്ട്‌ഫോളിയോയിൽ ആക്രമണോത്സുകമായ വളര്‍ച്ച കാണിക്കുന്നു. ഈ വിഭാഗത്തിലെ ക്രെഡിറ്റ് 30.8 ശതമാനം വർദ്ധിച്ചു. ഈ വിഭാഗത്തിന്റെ മൊത്തം ക്രെഡിറ്റ് 2023 ഓഗസ്റ്റ് അവസാനത്തില്‍ 47.70 ലക്ഷം കോടി രൂപയാണ്, 2022 ഓഗസ്റ്റിൽ ഇത് 36.47 ലക്ഷം കോടി രൂപയായിരുന്നു. 19.4 ശതമാനത്തിന്‍റെ വളര്‍ച്ചയാണ് കഴിഞ്ഞ വര്‍ഷം ഈ ഘട്ടത്തില്‍ വ്യക്തിഗത വായ്പകളില്‍ രേഖപ്പെടുത്തിയിരുന്നത്. 

2023 ഏപ്രിൽ മുതൽ 2023 ഓഗസ്റ്റ് വരെയുള്ള കാലയളവിൽ ഈ മേഖലയിലേക്കുള്ള ക്രെഡിറ്റ് 40.85 ലക്ഷം കോടി രൂപയിൽ നിന്ന് 47.70 ലക്ഷം കോടി രൂപയായി വളർന്നു, അതായത് 16.8 ശതമാനം വർധന. മുന്‍ സാമ്പത്തിക വര്‍ഷത്തിന്‍റെ ആദ്യ പകുതിയില്‍  7 ശതമാനം വളര്‍ച്ചയായിരുന്നു രേഖപ്പെടുത്തിയിരുന്നത്. 

സുരക്ഷിതമല്ലാത്ത വായ്പാ പോർട്ട്‌ഫോളിയോയെക്കുറിച്ച് ജാഗ്രത പുലര്‍ത്തണമെന്ന് ബാങ്കുകൾക്ക് ഇക്കഴിഞ്ഞ ഏപ്രിലില്‍ ആര്‍ബിഐ മുന്നറിയിപ്പ് നൽകിയിരുന്നു. വ്യക്തിഗത വായ്പകൾ, ക്രെഡിറ്റ് കാർഡുകൾ, ചെറുകിട ബിസിനസ് വായ്പകൾ, മൈക്രോഫിനാൻസ് വായ്പകൾ എന്നിവ ഇതിൽ ഉൾപ്പെടുന്നു.