കേരള ബാങ്കിനെ തരം താഴ്ത്തി
- ബാങ്കിന് വ്യക്തിഗതവായ്പാ വിതരണത്തില്‍ പരിധി ഏര്‍പ്പെടുത്തി
- കേരള ബാങ്കിന്റെ നിഷ്‌ക്രിയ ആസ്തി 11% കവിഞ്ഞു
- സര്‍ക്കാര്‍ ഏജന്‍സികളുടെ കുടിശിക ബാങ്കിന് തിരിച്ചടിയായി
കേരള ബാങ്കിനെ ആര്‍ബിഐ തരംതാഴ്ത്തി. നിയന്ത്രണ അതോറിറ്റിയായ നബാര്‍ഡിന്റെ റിപ്പോര്‍ട്ടിനെ തുടര്‍ന്നാണ് ആര്‍ബിഐ നടപടി. സി സിഭാഗത്തിലേക്കാണ് ബാങ്കിനെ മാറ്റിയത്. ബാങ്കിന് ഇതോടൊപ്പം വായ്പാ വിതരണത്തിന് നിയന്ത്രണങ്ങള്‍ ഏര്‍പ്പെടുത്തുകയും ചെയ്തു.
പുതിയ ക്ലാസിഫിക്കേഷന്‍ പ്രകാരം കേരള ബാങ്ക് ശാഖകള്‍ക്ക് 25 ലക്ഷം രൂപയ്ക്ക് മുകളില്‍ വ്യക്തിഗത വായ്പ നല്‍കാന്‍ കഴിയില്ല. ഉപഭോക്താക്കള്‍ക്ക് നല്‍കിയ വായ്പകള്‍ ഘട്ടം ഘട്ടമായി വീണ്ടെടുക്കാനും ആര്‍ബിഐ ശുപാര്‍ശ ചെയ്തു.
ആര്‍ബിഐ നടപടിയെ തുടര്‍ന്ന് വായ്പ വിതരണം സംബന്ധിച്ച് ബാങ്ക് ശാഖകള്‍ക്ക് കത്തയച്ചു. 25 ലക്ഷത്തിന് മുകളില്‍ വായ്പ നല്‍കിയ ശാഖകള്‍ ഘട്ടം ഘട്ടമായി തുക തിരിച്ചുപിടിക്കണമെന്നും കത്തില്‍ പറയുന്നു. കേരള ബാങ്കിന്റെ ഭൂരിഭാഗം ഗുണഭോക്താക്കളും വ്യക്തിഗത വായ്പകള്‍ എടുത്തവരാണ് എന്നതിനാല്‍ ആര്‍ബിഐ നിര്‍ദ്ദേശം കേരള ബാങ്കിന് കനത്ത തിരിച്ചടിയാണ്. മൂലധന ആവശ്യകതയും നിഷ്‌ക്രിയ ആസ്തിയും (എന്‍പിഎ) പരിഗണിച്ചാണ് നബാര്‍ഡ് കേരള ബാങ്കിന്റെ റാങ്ക് നിശ്ചയിച്ചത്.
ബാങ്കിന്റെ ഭരണസമിതിയില്‍ രാഷ്ട്രീയ നിയമനങ്ങള്‍ നടത്തിയതാണ് ബാങ്കിന് തിരിച്ചടി നേരിട്ടത്.
നബാര്‍ഡ് റിപ്പോര്‍ട്ട് പ്രകാരം, കേരള ബാങ്കിന്റെ നിഷ്‌ക്രിയ ആസ്തി 11% കവിഞ്ഞു. കാര്യങ്ങള്‍ കൂടുതല്‍ വഷളാക്കിക്കൊണ്ട്, നിരവധി സര്‍ക്കാര്‍ ഏജന്‍സികളും കുടിശ്ശിക അടയ്ക്കുന്നതില്‍ വീഴ്ച വരുത്തി, ഇത് കേരള ബാങ്കിന് വലിയ നഷ്ടമുണ്ടാക്കി.
എന്നാല്‍ തരംതാഴ്ത്തിയെന്ന വാര്‍ത്ത അടിസ്ഥാനരഹിതമാണെന്ന് കേരള ബാങ്ക് ഉദ്യോഗസ്ഥര്‍ പറയുന്നു. എല്ലാ വര്‍ഷവും നബാര്‍ഡ് ഒരു ഓഡിറ്റ് റിപ്പോര്‍ട്ടുമായി വരുകയും ബാങ്കിന് ഒരു ഇന്‍സ്‌പെക്ഷന്‍ റേറ്റിംഗ് നല്‍കുകയും ചെയ്യുന്നു, അത് രഹസ്യാത്മക ആശയവിനിമയമാണ്.
കേരള ബാങ്കിനെ 'സി' വിഭാഗത്തിലേക്ക് തരംതാഴ്ത്തിയതില്‍ ആര്‍ബിഐക്ക് പങ്കില്ല. വ്യക്തിഗത വായ്പകള്‍ക്ക് മാത്രമാണ് ഡൗണ്‍ഗ്രേഡ് ബാധകം. 25 ലക്ഷം രൂപ വായ്പ അനുവദിക്കുന്ന പുതിയ നിര്‍ദേശം സഹകരണ സംഘങ്ങള്‍ക്കും കാര്‍ഷിക വായ്പകള്‍ക്കും ബാധകമല്ല.