9,784 റെയില്‍വേ പാലങ്ങളുടെ അറ്റകുറ്റപ്പണികള്‍ക്കായി അനുമതി നല്‍കി: അശ്വിനി വൈഷ്ണവ്
- ഇന്ത്യന്‍ റെയില്‍വേയില്‍ റെയില്‍വേ പാലങ്ങള്‍ പരിശോധിക്കുന്നതിനുള്ള സുസ്ഥിരമായ സംവിധാനമുണ്ട്
- എംപിമാര്‍ ലോക്‌സഭയില്‍ ഉന്നയിച്ച ചോദ്യങ്ങള്‍ക്ക് മറുപടി നല്‍കുകയായിരുന്നു മന്ത്രി
- കഴിഞ്ഞ മൂന്ന് വര്‍ഷത്തിനിടെ മഹാരാഷ്ട്രയില്‍ ഒരു റെയില്‍വേ പാലവും തകര്‍ന്നിട്ടില്ലെന്ന് അശ്വിനി വൈഷ്ണവ്
ഏപ്രില്‍ മാസത്തില്‍ 9,784 റെയില്‍വേ പാലങ്ങളുടെ അറ്റകുറ്റപ്പണികള്‍ക്കും ബലപ്പെടുത്തലിനും അല്ലെങ്കില്‍ പുനര്‍നിര്‍മ്മാണത്തിനുമായി ഇന്ത്യന്‍ റെയില്‍വേ അനുമതി നല്‍കിയതായി റെയില്‍വേ മന്ത്രി അശ്വിനി വൈഷ്ണവ് അറിയിച്ചു. മഹാരാഷ്ട്രയിലെ ജീര്‍ണാവസ്ഥയിലുള്ള പഴയ റെയില്‍വേ പാലങ്ങളുടെ അവസ്ഥ ചൂണ്ടിക്കാണിച്ച് ഒമ്പത് എംപിമാര്‍ ഉന്നയിച്ച ചോദ്യങ്ങള്‍ക്ക് വൈഷ്ണവ് ലോക്‌സഭയില്‍ മറുപടി നല്‍കി.
കഴിഞ്ഞ മൂന്ന് വര്‍ഷത്തിനിടെ റെയില്‍വേ പാലങ്ങളുടെ തകര്‍ച്ചയുടെ അവസ്ഥയെക്കുറിച്ചും അതിന്റെ ഫലമായി മരിച്ചവരുടെയും പരിക്കേറ്റവരുടെയും എണ്ണത്തെക്കുറിച്ചും ഈ അംഗങ്ങള്‍ ചൂണ്ടിക്കാട്ടി.
രാജ്യത്തുടനീളമുള്ള എല്ലാ പഴയ റെയില്‍വേ പാലങ്ങളും അറ്റകുറ്റപ്പണികള്‍ ചെയ്യാന്‍ സര്‍ക്കാര്‍ സ്വീകരിച്ച നടപടികളും അവര്‍ ആരാഞ്ഞു.
ഇന്ത്യന്‍ റെയില്‍വേയില്‍ റെയില്‍വേ പാലങ്ങള്‍ പരിശോധിക്കുന്നതിനുള്ള സുസ്ഥിരമായ സംവിധാനമുണ്ട്. എല്ലാ റെയില്‍വേ പാലങ്ങളും വര്‍ഷത്തില്‍ രണ്ടുതവണ പരിശോധിക്കുന്നു, ഒന്ന് മണ്‍സൂണ്‍ ആരംഭിക്കുന്നതിന് മുമ്പും ഒന്ന് മണ്‍സൂണിന് ശേഷം വിശദമായ പരിശോധനയും നടത്തുമെന്ന് റെയില്‍വേ മന്ത്രി പറഞ്ഞു.
കഴിഞ്ഞ മൂന്ന് വര്‍ഷത്തിനിടെ മഹാരാഷ്ട്രയില്‍ ഒരു റെയില്‍വേ പാലവും തകര്‍ന്നിട്ടില്ലെന്നും എല്ലാ റെയില്‍വേ പാലങ്ങളും അനുവദനീയമായ വേഗതയില്‍ ട്രെയിന്‍ ഗതാഗതത്തിന് സുരക്ഷിതമാണെന്നും മന്ത്രി വ്യക്തമാക്കി.9,784 റെയില്‍വേ പാലങ്ങളുടെ അറ്റകുറ്റപ്പണികള്‍ക്കായി ഏപ്രിലില്‍ അനുമതി നല്‍കിയതായി അശ്വിനി വൈഷ്ണവ്