തെലങ്കാനയിലെ ഐടി കയറ്റുമതി; കുതിച്ചുയര്‍ന്നത് 11ശതമാനം
- 2024 സാമ്പത്തിക വര്‍ഷത്തില്‍ ഐടി മേഖലയില്‍ 40,000-ത്തിലധികം തൊഴിലവസരങ്ങള്‍
- തൊഴിലവസരങ്ങളില്‍ 4.5 ശതമാനം വര്‍ധനവ്
- ഇന്ത്യയുടെ എഐ തലസ്ഥാനമാകാന്‍ ഹൈദരാബാദ്
;
തെലങ്കാനയുടെ ഇന്‍ഫര്‍മേഷന്‍ ടെക്നോളജി മേഖലയിലെ മൊത്തം കയറ്റുമതി കഴിഞ്ഞ സാമ്പത്തിക വര്‍ഷത്തില്‍ 2,68,233 കോടി രൂപയിലെത്തി. മുന്‍ വര്‍ഷത്തെ അപേക്ഷിച്ച് 11.2 ശതമാനം വര്‍ധനവാണ് ഈ മേഖലയില്‍ രേഖപ്പെടുത്തിയത്. ഈ വളര്‍ച്ചാ നിരക്ക് ദേശീയ ശരാശരി വളര്‍ച്ചയായ 3.3 ശതമാനത്തെ ഗണ്യമായി മറികടക്കുന്നു.
2024 സാമ്പത്തിക വര്‍ഷത്തില്‍ 9.46 ലക്ഷത്തിലധികം പ്രൊഫഷണലുകളെ ഈ മേഖല പിന്തുണയ്ക്കുന്നു. 2024 സാമ്പത്തിക വര്‍ഷത്തില്‍ 40,000-ത്തിലധികം തൊഴിലവസരങ്ങളാണ് മേഖല സൃഷ്ടിച്ചത്. തൊഴിലവസരങ്ങളില്‍ 4.5 ശതമാനം വര്‍ധനവാണ് ഉണ്ടായത്.
രാജ്യത്ത് അതിവേഗം വളരുന്ന സംസ്ഥാനങ്ങളിലൊന്നാണ് തെലങ്കാന. ആര്‍ട്ടിഫിഷ്യല്‍ ഇന്റലിജന്‍സ് (എഐ), സെമികണ്ടക്ടര്‍ ഡിസൈന്‍, സൈബര്‍ സുരക്ഷ, ഡാറ്റാ സയന്‍സ് തുടങ്ങിയ ഉയര്‍ന്ന മൂല്യമുള്ള, അത്യാധുനിക സാങ്കേതികവിദ്യകളില്‍ ശ്രദ്ധ കേന്ദ്രീകരിച്ച് ഈ വേഗത നിലനിര്‍ത്താന്‍ സംസ്ഥാനം ആഗ്രഹിക്കുന്നു.
ഗ്ലോബല്‍ കേപ്പബിലിറ്റി സെന്ററുകള്‍ (ജിസിസി), എക്സലന്‍സ് സെന്ററുകള്‍ , ഗ്ലോബല്‍ ബിസിനസ് സപ്പോര്‍ട്ട് സെന്ററുകള്‍ (ജിബിഎസ്സി) എന്നിവ വികസിപ്പിക്കുന്നത് സംസ്ഥാനത്തിന്റെ പദ്ധതികളില്‍പ്പെടുന്നു.
200-ലധികം മുന്‍നിര ജിസിസികള്‍ ഇതിനകം ഹൈദരാബാദില്‍ പ്രവര്‍ത്തിക്കുന്നു. വരും വര്‍ഷങ്ങളില്‍ ഈ എണ്ണം ഇരട്ടിയാക്കാനുള്ള പാതയിലാണ് തെലങ്കാന. സാങ്കേതിക കണ്ടുപിടിത്തങ്ങള്‍ക്കും പുരോഗതിക്കുമുള്ള ഒരു പ്രധാന കേന്ദ്രമെന്ന നിലയില്‍ അതിന്റെ സ്ഥാനം വളരെ വലുതാണ്.
'ദേശീയ വെല്ലുവിളികള്‍ക്കിടയിലും ഐടി/ഐടിഇഎസ് കയറ്റുമതിയിലെ തെലങ്കാനയുടെ അസാധാരണ വളര്‍ച്ച, സാങ്കേതികവിദ്യയുടെയും നവീകരണത്തിന്റെയും മുന്‍നിര കേന്ദ്രമാകാനുള്ള ഞങ്ങളുടെ പ്രതിബദ്ധതയെ എടുത്തുകാണിക്കുന്നു. ഗ്ലോബല്‍ എഐ ഉച്ചകോടിക്ക് ആതിഥേയത്വം വഹിക്കാന്‍ ഞങ്ങള്‍ തയ്യാറെടുക്കുമ്പോള്‍, ഹൈദരാബാദ് ഇന്ത്യയുടെ എഐ തലസ്ഥാനമാകാനുള്ള അടിത്തറ പാകുകയാണ്, ''ഐടി മന്ത്രി ഡി ശ്രീധര്‍ ബാബു പറഞ്ഞു.
2024 സെപ്റ്റംബര്‍ 5, 6 തീയതികളില്‍ ഇവിടെ നടക്കാനിരിക്കുന്ന ഗ്ലോബല്‍ എഐ ഉച്ചകോടിയുടെ വെബ്സൈറ്റ് ശ്രീധര്‍ ബാബു ഉദ്ഘാടനം ചെയ്തു. ഭരണ, വ്യവസായ മേഖലകളിലെ ജനസംഖ്യാ തോതിലുള്ള വെല്ലുവിളികളെ നേരിടാന്‍ എഐയെ പ്രയോജനപ്പെടുത്തുകയാണ് ഉച്ചകോടിയിലൂടെ ലക്ഷ്യമിടുന്നത്.
കൂടാതെ, ഓഗസ്റ്റ് 4 നും 11 നും ഇടയിലുള്ള തന്റെ യുഎസ്എ, ദക്ഷിണ കൊറിയ സന്ദര്‍ശനം 16,000 കോടി രൂപയുടെ നിക്ഷേപ ധാരണാപത്രങ്ങള്‍ ഉണ്ടാക്കുമെന്ന് പ്രതീക്ഷിക്കുന്നതായി മന്ത്രി ശ്രീധര്‍ ബാബു വെളിപ്പെടുത്തി.
