തെറ്റിദ്ധരിപ്പിക്കുന്ന പരസ്യങ്ങള്‍; രൂക്ഷ വിമര്‍ശനവുമായി സുപ്രീം കോടതി
- 2023 നവംബറിലും സുപ്രീം കോടതി പതഞ്ജലി ആയുര്‍വേദിനോട് ആധുനിക വൈദ്യശാസ്ത്ര സമ്പ്രദായത്തിനെതിരെ തെറ്റിദ്ധരിപ്പിക്കുന്ന അവകാശവാദങ്ങളും പരസ്യങ്ങളും നിര്‍ത്താന്‍ ആവശ്യപ്പെട്ടിരുന്നു
- തുടര്‍ച്ചയായുള്ള നിയമ ലംഘനങ്ങള്‍ കോടതി വളരെ ഗൗരവമായി കാണുമെന്നും ഒരു കോടി രൂപ വരെ ചെലവ് ചുമത്തുന്നത് പരിഗണിക്കുമെന്നും മുന്നറിയിപ്പ് നല്‍കി.
- പ്രമേഹം, രക്തസമ്മര്‍ദ്ദം, ആസ്ത്മ, സന്ധിവാതം, ഗ്ലോക്കോമ എന്നിവയ്ക്ക് ശാശ്വതമായ പ്രതിവിധി പതഞ്ജലിയിലുണ്ടെന്നാണ് ഇവര്‍ പലപ്പോഴായി പരസ്യം നല്‍കിയത്.
തെറ്റിദ്ധരിപ്പിക്കുന്ന പരസ്യ പ്രചരണത്തിന്റെ പേരില്‍ പതഞ്ജലി ആയുര്‍വേദിന്റെ സഹസ്ഥാപകന്‍ ബാബ രാംദേവും മാനേജിംഗ് ഡയറക്ടര്‍ ബാലകൃഷ്ണയും സുപ്രീംകോടതിയില്‍ ഹാജരാകും. ഇരുവര്‍ക്കുമെതിരെയുള്ള കോടതിയലക്ഷ്യ നോട്ടിസിന് മറുപടി നല്‍കാത്തതിനെ തുടര്‍ന്ന് മാര്‍ച്ച് 21 നാണ് നേരിട്ട് ഹാജരാകാന്‍ സുപ്രീം കോടതിയില്‍ അറിയിച്ചത്.
തെറ്റിദ്ധാരണ പരത്തുന്ന പരസ്യങ്ങള്‍ സംപ്രേക്ഷണം ചെയതതിനെ തുടര്‍ന്ന് ബാബാ രാംദേവും ബാലകൃഷ്ണയും സുപ്രീം കോടതിയോട് മാപ്പ് പറഞ്ഞിരുന്നു. ആധുനിക വൈദ്യശാസ്ത്രത്തെ തുരങ്കം വയ്ക്കുന്നതും രോഗങ്ങള്‍ ഭേദമാകുമെന്ന് അവകാശപ്പെടുന്നതുമായ പരസ്യങ്ങള്‍ പാടില്ലെന്ന ഉത്തരവുകള്‍ അവഗണിച്ചതിന് കോടതിയലക്ഷ്യ നടപടി സ്വീകരിക്കാതിരുന്നതില്‍ സുപ്രീംകോടതി നീരസം പ്രകടിപ്പിച്ചിരുന്നു.
പതഞ്ജലി ആയുര്‍വേദിന്റെ ഔഷധഗുണങ്ങളെക്കുറിച്ച് തെറ്റായതും തെറ്റിദ്ധരിപ്പിക്കുന്നതുമായ പരസ്യങ്ങള്‍ തുടര്‍ച്ചയായി പ്രചരിപ്പിച്ചതില്‍ സുപ്രീം കോടതി ഫെബ്രുവരിയില്‍ അതൃപ്തി പ്രകടിപ്പിച്ചിരുന്നു. 1954ലെ ഡ്രഗ്സ് ആന്‍ഡ് മാജിക് റെമഡീസ് (ഒബ്ജക്ഷനബിള്‍ പരസ്യങ്ങള്‍) നിയമത്തിലെ സെക്ഷന്‍ മൂന്ന്, നാല് എന്നിവയുടെ ലംഘനമാണ് രാംദേവും ബാലകൃഷ്ണയും പ്രഥമദൃഷ്ട്യാ കാണുന്നതെന്നും ജഡ്ജിമാര്‍ അഭിപ്രായപ്പെട്ടു.
പ്രിന്റ്, ഇലക്ട്രോണിക് പ്ലാറ്റ്ഫോമുകള്‍ ഉള്‍പ്പെടെയുള്ള മാധ്യമങ്ങളില്‍ ഏതെങ്കിലും മരുന്ന് സംവിധാനത്തിനെതിരെ എന്തെങ്കിലും പ്രസ്താവനകള്‍ നടത്തുന്നതിനെതിരെ സുപ്രീം കോടതി നേരത്തെ കമ്പനിക്ക് മുന്നറിയിപ്പ് നല്‍കിയിരുന്നു. കൂടാതെ, 1954-ലെ ഡ്രഗ്സ് ആന്‍ഡ് മാജിക് റെമഡീസ് (ഒബ്ജക്ഷനബിള്‍ അഡ്വര്‍ടൈസ്മെന്റ്) നിയമത്തില്‍ വ്യക്തമാക്കിയിട്ടുള്ള അസുഖങ്ങളും വൈകല്യങ്ങളും ചികിത്സിക്കുന്നതിന് വേണ്ടിയുള്ള ഉല്‍പ്പന്നങ്ങള്‍ പരസ്യം ചെയ്യുന്നതില്‍ നിന്നും വിപണനം ചെയ്യുന്നതില്‍ നിന്നും പതഞ്ജലി ആയുര്‍വേദത്തെ വിലക്കിയിട്ടുണ്ട്.