സെമികണ്ടക്റ്റര്‍ നിര്‍മ്മാണം: മൈക്രോണ്‍ ടെക്‌നോളജിയെ ക്ഷണിച്ച് മോദി
- അപ്ലൈഡ് മെറ്റീരിയല്‍സ്, ജനറല്‍ ഇലക്ട്രിക് കമ്പനികളെയും രാജ്യത്തേക്ക് ക്ഷണിച്ചു
- സെമികണ്ടക്റ്റര്‍ വിപണി 2026ല്‍ 64 ബില്യണ്‍ ഡോളറിലെത്തുമെന്ന് കരുതപ്പെടുന്നു
- വ്യോമയാന, പുനരുപയോഗ ഊര്‍ജ മേഖലയില്‍ കൂടുതല്‍ മികവ് പുലര്‍ത്താന്‍ ഇലക്ട്രിക്കിന് കഴിയും
ഇന്ത്യയില്‍ സെമികണ്ടക്റ്റര്‍ നിര്‍മ്മാണം വര്‍ധിപ്പിക്കുന്നതിനായി യുഎസ് ചിപ്പ് നിര്‍മ്മാതാക്കളായ മൈക്രോണ്‍ ടെക്‌നോളജിയെ പ്രധാനമന്ത്രി നരേന്ദ്ര മോദി ക്ഷണിച്ചു. ഉല്‍പ്പന്നത്തിന്റെ വിതരണശൃംഖലയില്‍ രാജ്യം ഇന്ന് പ്രദാനം ചെയ്യുന്നത് മികച്ച മാര്‍ഗങ്ങളാണ്. ഇത് കമ്പനികള്‍ക്ക് മത്സരാധിഷ്ഠിത നേട്ടങ്ങളാണ്. മൈക്രോണ്‍ ടെക്‌നോളജിയെ ഇന്ത്യയിലേക്ക് ക്ഷണിച്ച വസ്തുത വിദേശകാര്യമന്ത്രാലയവും അറിയിച്ചിട്ടുണ്ട്.
പ്രോസസ് ടെക്‌നോളജി വികസിപ്പിക്കുന്നതിനും നൂതന പാക്കേജിംഗ് കഴിവുകള്‍ക്കുമായി അദ്ദേഹം അപ്ലൈഡ് മെറ്റീരിയലുകളെയും ഇന്ത്യയിലേക്ക് ക്ഷണിച്ചു.
അപ്ലൈഡ് മെറ്റീരിയല്‍സ് പ്രസിഡന്റും സിഇഒയുമായ ഗാരി ഇ ഡിക്കേഴ്സണുമായി നടത്തിയ കൂടിക്കാഴ്ചയില്‍ വിദഗ്ധ തൊഴിലാളികളെ സൃഷ്ടിക്കുന്നതിന് ഇന്ത്യയിലെ അക്കാദമിക് സ്ഥാപനങ്ങളുമായി കമ്പനിയുടെ സഹകരണത്തിന്റെ സാധ്യതകളെക്കുറിച്ച് പ്രധാനമന്ത്രി മോദി ചര്‍ച്ച ചെയ്തു.
ഇന്ത്യയില്‍ കൂടുതല്‍ അവസരങ്ങള്‍ക്കായി കമ്പനി കാത്തിരിക്കുകയാണെന്ന് മൈക്രോണ്‍ ടെക്‌നോളജി സിഇഒ സഞ്ജയ് മെഹ്റോത്ര മോദിയെ സന്ദര്‍ശിച്ച ശേഷം പറഞ്ഞു. ആഗോളതലത്തില്‍ മെമ്മറിയിലും സംഭരണത്തിലും ഏറ്റവും മികവു പുലര്‍ത്തുന്ന കമ്പനിയാണ് മൈക്രോണ്‍.കൂടാതെ ഡാറ്റാ സെന്ററുകള്‍ മുതല്‍ സ്മാര്‍ട്ട്ഫോണുകള്‍ വരെയുള്ള എല്ലാ വിപണികളിലും മൈക്രോണിന്റെ തങ്ങളുടെ ചിപ്പുകള്‍ വിറ്റഴിക്കുന്നു.
ഇന്ത്യ അവിശ്വസനീയമായ വളര്‍ച്ച കൈവരിക്കുന്ന സമയമാണിതെന്ന് പ്രധാനമന്ത്രിയുമായുള്ള കൂടിക്കാഴ്ചക്കുശേഷം ഡിക്കേഴ്‌സണ്‍ പറഞ്ഞു.പ്രധാനമന്ത്രിയുമായും ഇന്ത്യയിലെ എല്ലാവരുമായും ഒരുമിച്ച് മികച്ച വിജയം കൈവരിക്കുന്നതിന് ഒരുമിച്ച് പ്രവര്‍ത്തിക്കാന്‍ തങ്ങള്‍ ആഗ്രഹിക്കുന്നതായും അദ്ദേഹം പറഞ്ഞു.
ഇന്ത്യയിലെ വ്യോമയാന, പുനരുപയോഗ ഊര്‍ജ മേഖലയില്‍ കൂടുതല്‍ പങ്ക് വഹിക്കാന്‍ ജനറല്‍ ഇലക്ട്രിക്കിനെ മോദി ക്ഷണിച്ചു. ജിഇ സിഇഒ എച്ച് ലോറന്‍സ് കള്‍പ്പുമായുള്ള കൂടിക്കാഴ്ചയിലാണ് പ്രധാനമന്ത്രി കമ്പനിയെ ഇന്ത്യയിലേക്ക് ക്ഷണിച്ചത്. ഇന്ത്യയിലെ വ്യോമയാന, പുനരുപയോഗ ഊര്‍ജ മേഖലയില്‍ കൂടുതല്‍ പങ്ക് വഹിക്കാന്‍ കമ്പനിക്കാവും എന്ന്് മോദി പ്രത്യാശ പ്രകടിപ്പിച്ചു.
ഇന്ത്യ അര്‍ദ്ധചാലക വികസനം പ്രോത്സാഹിപ്പിക്കുകയാണ്. അതിനായി ഒരു പ്രൊഡക്ഷന്‍ ലിങ്ക്ഡ് ഇന്‍സെന്റീവ് (പിഎല്‍ഐ) പദ്ധതി പ്രഖ്യാപിക്കുകയും ചെയ്തു.ആഗോള കമ്പനികള്‍ സെമികണ്ടക്റ്റരുകള്‍ക്കുള്ള ലാഭകരമായ നിക്ഷേപ കേന്ദ്രമായി ഇന്ത്യയെ പരിഗണിക്കുന്നുണ്ട്. ഇലക്ട്രോണിക്സ്, അര്‍ദ്ധചാലകങ്ങള്‍ എന്നിവയ്ക്കായി ഏഷ്യയിലെ ഏറ്റവും ആകര്‍ഷകമായ ലക്ഷ്യസ്ഥാനങ്ങളിലൊന്നായി രാജ്യം മാറുമെന്നാണ് പ്രതീക്ഷ.
2021-ല്‍ ഇന്ത്യന്‍ അര്‍ദ്ധചാലക വിപണിയുടെ മൂല്യം 27.2 ബില്യണ്‍ ഡോളറായിരുന്നു. 2026-ല്‍ ഇത് 19 ശതമാനം വളര്‍ന്ന് 64 ബില്യണ്‍ ഡോളറിലെത്തുമെന്ന് പ്രതീക്ഷിക്കുന്നു. എന്നാല്‍ ഈ ചിപ്പുകളൊന്നും ഇതുവരെ ഇന്ത്യയില്‍ നിര്‍മ്മിക്കപ്പെട്ടിട്ടില്ല.
ഫാബ്‌സ് എന്നറിയപ്പെടുന്ന അര്‍ദ്ധചാലക യൂണിറ്റുകള്‍ സജ്ജീകരിക്കുന്നത് വളരെ പ്രാധാന്യമുള്ളതും സങ്കീര്‍ണ്ണവും ചെലവേറിയതുമായ ജോലിയാണ്. ഉയര്‍ന്ന അപകടസാധ്യതയുള്ളതാണിത്.