യുഎഇയിൽ ഇന്ധന വില ഉയരുമോ?

യുഎഇ ഡ്രൈവര്‍മാര്‍ ഏപ്രില്‍ 1 മുതല്‍ പെട്രോള്‍ പമ്പുകളില്‍ കൂടുതല്‍ പണം നല്‍കേണ്ടിവരുമോ?മാര്‍ച്ച് 31 ഞായറാഴ്ച യുഎഇ ഇന്ധനവില കമ്മറ്റിയുടെ ഏറ്റവും പുതിയ ഇന്ധനവില പ്രഖ്യാപനത്തിന് മുന്നോടിയായാണ് പലരും ഈ ചോദ്യം ചോദിക്കുന്നത്. ലോകമെമ്പാടും എണ്ണ വില വര്‍ദ്ധിച്ചുകൊണ്ടിരിക്കുകയാണ്. ലോകമെമ്പാടുമുള്ള സെന്‍ട്രല്‍ ബാങ്കുകള്‍ പലിശനിരക്ക് കുറയ്ക്കാന്‍ ശ്രമിക്കുന്നത് കടുത്ത തലവേദന സൃഷ്ടിക്കുകയാണ്.

ഈ വര്‍ഷം ബ്രെന്റ് ക്രൂഡിന്റെ വില ഏകദേശം 11 ശതമാനം ഉയര്‍ന്നു. അതേസമയം WTI (വെസ്റ്റ് ടെക്‌സസ് ഇന്റര്‍മീഡിയറ്റ്) 12 ശതമാനത്തിലധികം ഉയര്‍ന്നു. ചെങ്കടലിലെ വെല്ലുവിളികളും റഷ്യ ഉള്‍പ്പെടെയുള്ള ഒപെക് + പോലുള്ള രാജ്യങ്ങളില്‍ നിന്നുള്ള എണ്ണ ഉല്‍പ്പാദനം വെട്ടിക്കുറച്ചതും ഈ വര്‍ഷം വിലയില്‍ ഉയര്‍ന്ന സമ്മര്‍ദ്ദം ചെലുത്തിയിട്ടുണ്ട്. യുഎഇയില്‍, 2024-ല്‍ ഇതുവരെ സ്പെഷ്യല്‍ 95, സൂപ്പര്‍ 98, ഇപ്ലസ് 91 എന്നിവയുടെ ഇന്ധനവില മാസാമാസം ക്രമാനുഗതമായി വര്‍ദ്ധിച്ചു. ഫെബ്രുവരിയില്‍ നേരിയ വിലയിടിവിന് ശേഷം മാര്‍ച്ചില്‍ ഡീസല്‍ വിലയും വീണ്ടും ഉയര്‍ന്നിരുന്നു.

സൂപ്പര്‍ 98, സ്‌പെഷ്യല്‍ 95, ഇ-പ്ലസ് 91 എന്നിവ ലീറ്ററിന് 3.03 ദിര്‍ഹം, 2.92 ദിര്‍ഹം, 2.85 എന്നിങ്ങനെ വിറ്റഴിച്ചതോടെ 2024 മാര്‍ച്ചില്‍ യുഎഇയില്‍ പെട്രോള്‍ വില രണ്ടാം മാസവും ഉയര്‍ന്നു. ഡബ്ല്യുടിഐ ക്രൂഡ് ഔണ്‍സിന് 2.24 ശതമാനം ഉയര്‍ന്ന് 83.17 ഡോളറിലാണ് വ്യാപാരം നടക്കുന്നത്. ബ്രെന്റ് 1.86 ശതമാനം ഉയര്‍ന്ന് 87.0 ഡോളറിലെത്തി.

മുന്‍ മാസത്തെ 81.3 ഡോളറുമായി താരതമ്യം ചെയ്യുമ്പോള്‍ 2024 മാര്‍ച്ചില്‍ ബ്രെന്റ് ബാരലിന് ശരാശരി 84.25 ഡോളറായിരുന്നു. മാര്‍ച്ചിലെ ശരാശരി വിലയിലെ ഈ 3 ഡോളര്‍ വര്‍ദ്ധനവ് ഏപ്രിലിലെ വിലകളില്‍ പ്രതിഫലിക്കാന്‍ സാധ്യതയുണ്ട്. അത് ശനിയാഴ്ചയോ ഞായറാഴ്ചയോ പ്രഖ്യാപിക്കും. യുഎഇയിലെ താമസക്കാരും ബിസിനസ്സുകളും തങ്ങളുടെ ഇന്ധന ബജറ്റ് തയ്യാറാക്കാന്‍ പ്രതിമാസ പെട്രോള്‍, ഡീസല്‍ നിരക്കുകള്‍ക്കായി കാത്തിരിക്കുന്നു.