പ്രവാസികള്‍ക്ക് തിരിച്ചടി;മസ്‌കറ്റ്-കേരള സര്‍വീസുകള്‍ നിര്‍ത്തലാക്കി എയര്‍ ഇന്ത്യ എക്സ്പ്രസ്
- റദ്ദാക്കിയത് മസ്‌കറ്റില്‍നിന്ന് കേരളത്തിലേക്കും തിരിച്ചുമുളള വിവിധ സര്‍വീസുകള്‍
- എതാനും സര്‍വീസുകള്‍ ലയിപ്പിച്ചതായും എയര്‍ഇന്ത്യ എക്സ്പ്രസ്
- ഓപ്പറേഷണല്‍ കാരണങ്ങളാലാണ് നടപടിയെന്ന് വിശദീകരണം
അവധിയാഘോഷിക്കാന്‍ നാട്ടിലേക്ക് പോകാനിരുന്ന ഒമാനിലെ പ്രവാസികള്‍ക്ക് കനത്ത തിരിച്ചടിയാണ്എയര്‍ ഇന്ത്യ എക്സ്പ്രസ് നല്‍കിയിരിക്കുന്നത്. ഈ മാസം 29 മുതല്‍ ജൂണ്‍ 1 വരെ മസ്‌കറ്റില്‍നിന്ന് കേരളത്തിലേക്കും തിരിച്ചുമുളള വിവിധ സര്‍വീസുകളാണ് റദ്ദാക്കിയത്. ഓപ്പറേഷണല്‍ കാരണങ്ങളാലാണ് നടപടിയെന്നാണ് അധികൃതര്‍ നല്‍കുന്ന വിശദീകരണം. ഏതാനും സര്‍വീസുകളെ പരസ്പരം ലയിപ്പിച്ചതായും എയര്‍ഇന്ത്യ എക്സ്പ്രസ് അറിയിച്ചു.
മെയ് 29നും 31നുമുള്ള കോഴിക്കോട് - മസ്‌കറ്റ് സര്‍വീസുകളും റദ്ദാക്കി. മേയ് 30നും ജൂണ്‍ ഒന്നിനുമുള്ള മസ്‌കറ്റ് - കോഴിക്കോട് സര്‍വീസുകളും മേയ് 31-നുള്ള കണ്ണൂര്‍ -മസ്‌കറ്റ്, മസ്‌കറ്റ് -കണ്ണൂര്‍ സര്‍വീസുകളും 30-ന് തിരുവനന്തപുരത്ത് നിന്ന് മസ്‌കത്തിലേക്കും തിരിച്ചുമുള്ള സര്‍വീസുകളും റദ്ദാക്കിയവയില്‍ ഉള്‍പ്പെടുന്നു. ജൂണ്‍ 8,9 ദിവസങ്ങളില്‍ തിരുവനന്തപുരത്ത് നിന്നും കോഴിക്കോട് നിന്നുമായി മസ്‌കറ്റിലേക്കുളള രണ്ട് സര്‍വീസുകള്‍ തിരുവനന്തപുരത്ത് നിന്ന് കോഴിക്കോട്ടേക്ക് പോയി അവിടെ നിന്ന് മസ്‌കറ്റിലേക്കും തിരിച്ചും എന്ന നിലയില്‍ ലയിപ്പിച്ചതായും അധികൃതര്‍ അറിയിച്ചു.