കിറ്റെക്സിന്റെ ലാഭ തേരോട്ടത്തിനു വിരാമം; 5 വർഷത്തിൽ ആദ്യമായ് ത്രൈമാസ നഷ്ടം
- തെലങ്കാന പദ്ധതിയിൽ കിറ്റെക്സിന്റെ നിക്ഷേപം 280 കോടി രൂപയാണ്.
- തെലങ്കാനയിലെ കിറ്റെക്സ് അപ്പാരൽ പാർക്ക്‌സിൽ 100 കോടി രൂപ കൂടി നിക്ഷേപിക്കാൻ തീരുമാനിച്ചു.
kitex in telangana project
കൊച്ചി:കൊച്ചി ആസ്ഥാനമായുള്ള മുൻനിര കയറ്റുമതി അധിഷ്‌ഠിത കമ്പനിയായ കിറ്റെക്സ് ഗാർമെന്റ്‌സ് ലിമിറ്റഡ് (കെജിഎൽ) ഈ സാമ്പത്തിക വർഷത്തിന്റെ (FY23) മൂന്നാം പാദത്തിൽ സ്റ്റാൻഡ് എലോൺ അടിസ്ഥാനത്തിൽ 6.64 കോടി രൂപയുടെ അറ്റ നഷ്ടം രേഖപ്പെടുത്തി. ഏകദേശം 20 പാദങ്ങളിലെ ആദ്യ നഷ്ടമാണിത്. .
2022 സെപ്റ്റംബർ 30 ന് അവസാനിച്ച മുൻ പാദത്തിൽ 25.07 കോടി രൂപയുടെ അറ്റാദായവും മുൻ വർഷം ഇതേ പാദത്തിൽ 34.71 കോടി രൂപ ലാഭവും കമ്പനി രേഖപ്പെടുത്തിയിരുന്നു.
കെഎപിഎല്ലിൽ ഓഹരി പങ്കാളിത്തം
അതിനിടെ, കിറ്റെക്സ് ഗാർമെന്റ്‌സ് ലിമിറ്റഡ് (കെജിഎൽ) തങ്ങളുടെ പ്രൊമോട്ടർ ഗ്രൂപ്പ് കമ്പനിയായ കിറ്റെക്സ് ചിൽഡ്രൻസ്‌വെയർ ലിമിറ്റഡിനൊപ്പം (കെ‌സി‌എൽ) തെലങ്കാനയിൽ സ്ഥാപിക്കുന്ന കിറ്റെക്സ് അപ്പാരൽ പാർക്ക്‌സ് ലിമിറ്റഡിൽ (കെഎപിഎൽ) 100 കോടി രൂപ കൂടി നിക്ഷേപിക്കാൻ തീരുമാനിച്ചതായി അറിയിച്ചു. .
ഇതോടെ തെലങ്കാന സംരംഭത്തിൽ കെജിഎൽ നടത്തുന്ന മൊത്തം നിക്ഷേപം 280 കോടി രൂപ വരെയാകും..
കെജിഎൽ-ന്റെ മൂന്നാം പാദ പ്രകടനത്തിലേക്ക് വരുമ്പോൾ, ഈ പാദത്തിൽ കമ്പനിയുടെ വരുമാനം വാർഷികാടിസ്ഥാനത്തിൽ 202.91 കോടി രൂപയിൽ നിന്ന് വെറും 68.21 കോടി രൂപയായി ഇടിഞ്ഞു; ഇത് നഷ്ടത്തിലേക്ക് നയിച്ചു. .
എല്ലാ ബിസിനസുകളും ആഗോളതലത്തിൽ മാന്ദ്യം നേരിടുന്നുണ്ടെന്നും പല പ്രമുഖ ബിസിനസ്സ് സ്ഥാപനങ്ങളുടെയും വിറ്റുവരവ് ഗണ്യമായി കുറഞ്ഞിട്ടുണ്ടെന്നും കെജിഎൽ ഒരു ഔദ്യോഗിക കുറിപ്പിൽ പ്രസ്താവിച്ചു.
കൂടാതെ, എല്ലാ പ്രമുഖ റീട്ടെയിലർമാരും കൂടുതൽ മാന്ദ്യം പ്രതീക്ഷിച്ച് 70-90 ശതമാനം വരെ കിഴിവ് നൽകി വമ്പൻ വിലക്കുറവിൽ സാധനങ്ങൾ വിറ്റഴിക്കുകയാണെന്നും കമ്പനി കൂട്ടിച്ചേർത്തു.
മൊത്തവ്യാപാര, ചില്ലറ വിൽപ്പന മേഖലയിലുള്ള മുൻനിര ആഗോള കമ്പനികളിൽ പലതും വിറ്റുവരവിൽ നേരിയ വർധനവ് കാണിക്കുമ്പോൾ, ഭൂരിഭാഗം പേരുടെയും ലാഭം ഗണ്യമായി കുറഞ്ഞിട്ടുണ്ടെന്നും കുറിപ്പിൽ പറയുന്നു.
എല്ലാ ചില്ലറ വ്യാപാരികളും ആകർഷകമായ കിഴിവുകൾ വാഗ്ദാനം ചെയ്ത് സമ്മർദ്ദത്തിലാണ് വിൽക്കുന്നത്. അങ്ങനെ, എല്ലാ ബിസിനസ്സ് സ്ഥാപനങ്ങളും ഇൻവെന്ററി കുറയ്ക്കുകയും പ്രതിസന്ധി കൈകാര്യം ചെയ്യാൻ ശ്രമിക്കുകയും ചെയ്യുന്നു.
ടെക്സ്റ്റൈൽസ് ഉൾപ്പെടെ ലോകമെമ്പാടുമുള്ള എല്ലാ വ്യവസായങ്ങളെയും വളരെ മോശമായി ബാധിച്ചതായി കുറിപ്പിൽ പറയുന്നു.
2023-24 ലെ കമ്പനിയുടെ ഓർഡർ ബുക്ക് ആദ്യ പാദത്തിൽ മികച്ച പ്രകടനവും രണ്ടാം പാദത്തിൽ സാധാരണ പ്രകടനവും കൈവരിക്കുമെന്നു സൂചിപ്പിക്കുന്നതായി കമ്പനി പ്രത്യാശ പ്രകടിപ്പിച്ചു..