തിരുവനന്തപുരം: 2022-23ൽ മികച്ച നേട്ടം കൈവരിച്ചതായി കേരള ഫീഡ്‌സ് ലിമിറ്റഡ് (കെഎഫ്എൽ) അറിയിച്ചു. മൊത്തം വിൽപ്പന വിറ്റുവരവ് മുൻ വർഷത്തെ 577 കോടി രൂപയിൽ നിന്ന് 621 കോടി രൂപയായി ഉയർന്നു.
ഉയർന്ന ഗുണമേന്മയുള്ള കന്നുകാലി, കോഴി, മുയൽ തീറ്റകൾ
കർഷകർക്ക് താങ്ങാനാവുന്ന വിലയിൽ ആവശ്യത്തിന് വിതരണം ചെയ്തുകൊണ്ട് ഈ കാലയളവിൽ കേരളത്തിലെ മൃഗസംരക്ഷണ മേഖലയുടെ വളർച്ചയിൽ നിർണായക പങ്കുവഹിച്ചതായി സംസ്ഥാന പൊതുമേഖലാ സ്ഥാപനമായ കെഎഫ്എൽ ഒരു പ്രസ്താവനയിൽ പറഞ്ഞു.
കേരള ഫീഡ്‌സ് മിടുക്കി, കേരള ഫീഡ്‌സ് എലൈറ്റ്, ഡയറി റിച്ച് പ്ലസ്, കറമൈൻ മിനറൽ മിക്സ്ചർ, മിൽക്ക് ബൂസ്റ്റർ തുടങ്ങിയ ഉൽപ്പന്നങ്ങൾക്ക് വിപണിയിൽ നല്ല സ്വീകാര്യത ലഭിച്ചതായി കമ്പനി അവകാശപ്പെട്ടു.
കൃത വസ്തുക്കളുടെ വില കുതിച്ചുയരുമ്പോഴും, കെഎഫ്എൽ കർഷകർക്ക് ഉയർന്ന ഗുണമേന്മയുള്ള കാലിത്തീറ്റ സബ്‌സിഡി നിരക്കിൽ ലഭ്യമാക്കി. ഈ വർഷം സബ്‌സിഡികൾ വഴി 42 കോടി രൂപയുടെ ആനുകൂല്യങ്ങൾ കമ്പനി കൈമാറ്റം ചെയ്തു.
കമ്പനിയുടെ വരുമാനത്തിന്റെ 80 ശതമാനവും പൊതുവിപണിയിൽ ഉൽപന്നങ്ങൾ വിറ്റഴിക്കുന്നതിലൂടെയും ബാക്കി 20 ശതമാനം മൃഗസംരക്ഷണം, തദ്ദേശ സ്വയംഭരണ വകുപ്പുകൾ എന്നിവയിലൂടെയും നേടിയെടുത്തു.
കേരള സർക്കാരിന്റെ എല്ലാ വകുപ്പുകളുടെയും ആവശ്യങ്ങൾ നിറവേറ്റുന്നതിനായി ഉയർന്ന ഗുണമേന്മയുള്ള കാലിത്തീറ്റകൾ ആവശ്യമായ അളവിൽ ലഭ്യമാക്കാൻ കെഎഫ്എൽ തയ്യാറാണെന്ന് കെഎഫ്എൽ ചെയർമാൻ കെ ശ്രീകുമാർ പറഞ്ഞു.
കെ എഫ് എൽന്റെ സുരക്ഷിതമായ പാൽ, ആരോഗ്യമുള്ള പശു എന്ന നിലപാട് കേരളത്തിലെ ക്ഷീരകർഷകർ പൂർണ്ണമായും അംഗീകരിച്ചു. ഇത് തീർച്ചയായും മൃഗങ്ങളുടെ പാലുൽപാദനക്ഷമത മെച്ചപ്പെടുത്തുമെന്നും അതുവഴി കേരളത്തിലെ ക്ഷീരകർഷകച്ചെലവ് കുറയ്ക്കുമെന്നും കെഎഫ്എൽ മാനേജിംഗ് ഡയറക്ടർ ഡോ.ബി.ശ്രീകുമാർ പറഞ്ഞു.
പാലുൽപ്പാദനക്ഷമത വർധിപ്പിക്കുകയും കാർഷിക ചെലവ് കുറയ്ക്കുകയും ചെയ്യുന്നത് കേരളത്തിലെ യുവസംരംഭകർക്ക് ഗുണം ചെയ്യുമെന്നും അദ്ദേഹം കൂട്ടിച്ചേർത്തു.
2023-24 വർഷത്തേക്ക്, മറ്റ് സംസ്ഥാനങ്ങളിൽ നിന്ന് കുറഞ്ഞ വിലയ്ക്ക് അസംസ്‌കൃത വസ്തുക്കൾ സംഭരിച്ച് കർഷകർക്ക് താങ്ങാവുന്ന വിലയ്ക്ക് എത്തിക്കുന്നതിനുള്ള കാലിത്തീറ്റയാക്കി മാറ്റുന്നതിന് സർക്കാരിന്റെ സാമ്പത്തിക പിന്തുണയോടെ നടപ്പിലാക്കാൻ കെഎഫ്എൽ ഒരു പദ്ധതി തയ്യാറാക്കിയിട്ടുണ്ടെന്ന് ഡോ. ശ്രീകുമാർ പറഞ്ഞു.