നിക്ഷേപകര്‍ പരിഗണിച്ചത് സ്‍മാള്‍ ക്യാപ് ഫണ്ടുകളെ: ജൂണ്‍ പാദത്തിലെ നിക്ഷേപം 11,000 കോടി രൂപ
- മാര്‍ച്ച് പാദത്തില്‍ 6,932 കോടി രൂപയുടെ നിക്ഷേപം
- ലാര്‍ജ് ക്യാപുകളില്‍ പുറത്തേക്കൊഴുക്ക്
- ഈ പ്രവണത ഹ്രസ്വകാലയളവില്‍ തുടരും
ഏപ്രിൽ-ജൂൺ പാദത്തിൽ, 11,000 കോടി രൂപയുടെ അറ്റ നിക്ഷേപവുമായി സ്മോൾ ക്യാപ്സിൽ ശ്രദ്ധ കേന്ദ്രീകരിക്കുന്ന മ്യൂച്വൽ ഫണ്ടുകൾ മുന്നേറി. ലാര്‍ജ് ക്യാപ്സ് മേഖലയില്‍ പ്രവര്‍ത്തിക്കുന്ന ഫണ്ട് മാനേജർമാർ സമ്മര്‍ദം നേരിടുന്ന സാഹചര്യത്തില്‍ കൂടിയാണിത്. ഈ പ്രവണത ഹ്രസ്വകാലത്തേക്ക് തുടരുമെന്നാണ് അനലിസ്റ്റുകള്‍ പ്രതീക്ഷിക്കുന്നത്. 3,360 കോടി രൂപയുടെ പുറത്തേക്കുള്ള ഒഴുക്കാണ് ലാര്‍ജ് ക്യാപുകളുടെ കാര്യത്തില്‍ ഉണ്ടായതെന്ന് അസോസിയേഷൻ ഓഫ് മ്യൂച്വൽ ഫണ്ട്സ് ഇൻ ഇന്ത്യ (ആംഫി) യുടെ കണക്കുകൾ വ്യക്തമാക്കുന്നു.
മാർച്ചിൽ അവസാനിച്ച ത്രൈമാസത്തിലും സ്മോൾ ക്യാപ് ഫണ്ടുകൾ 6,932 കോടി രൂപയുടെ നിക്ഷേപം രേഖപ്പെടുത്തിയിരുന്നു.
"സമീപ മാസങ്ങളിൽ സ്മോൾ ക്യാപ് സ്റ്റോക്കുകളുടെ പ്രകടനം അസാധാരണമാണ്. ഇതിന്റെ വിശദീകരണം പ്രധാനമായും സ്മോൾ ക്യാപ് കമ്പനികളും വലിയ ക്യാപ് കമ്പനികളും തമ്മിലുള്ള മൂല്യനിർണ്ണയ വിടവിലാണ്. വിപണികൾ ചെലവേറിയതാകുകയും എന്നാല്‍ ഫണ്ടുകള്‍ ഓഹരികളെ തേടിയെത്തുകയും ചെയ്യുമ്പോള്‍ ഇത് എപ്പോഴും സംഭവിക്കുന്നു, ”എയുഎം ക്യാപിറ്റൽ മാർക്കറ്റിലെ നാഷണൽ ഹെഡ്-വെൽത്ത് മുകേഷ് കൊച്ചാർ പറഞ്ഞു.
കഴിഞ്ഞ ഒരു വർഷത്തെ കണക്കെടുത്താല്‍ 30-37 ശതമാനവും മൂന്ന് വർഷത്തെ കണക്കില്‍ 40-44 ശതമാനവും അഞ്ച് വർഷത്തെ കണക്കില്‍ 18-21 ശതമാനവും സംയുക്ത വാർഷിക വളർച്ചാ നിരക്കാണ് (സിഎജിആർ) മ്യൂച്വൽ ഫണ്ട് സ്‌പേസിലെ സ്മോൾ ക്യാപ് വിഭാഗം പ്രകടമാക്കിയിട്ടുള്ളത്.
2017 ലെ 8,580 കോടി രൂപയിൽ നിന്ന് ഇപ്പോൾ 16,400 കോടി രൂപയായി സ്‍മാള്‍ ക്യാപ് സ്പേസ് വളര്‍ന്നു. കൂടാതെ, സ്മോൾ ക്യാപ് കമ്പനികളുടെ വിപണി മൂലധനത്തിലെ വർധന ഈ ഓഹരികളുമായി ബന്ധപ്പെട്ട അപകട സാധ്യതകള്‍ കുറയ്ക്കുകയും ചെയ്തു