ആശ്വാസമായി യുഎസിലെ വിലക്കയറ്റ കണക്കും, ഏഷ്യന്‍ വിപണികള്‍ നേട്ടത്തില്‍; ഇന്ന് വിപണി തുറക്കും മുമ്പ് അറിയേണ്ടത്

ഒരു ദിവസത്തെ അവധി കഴിഞ്ഞ് ഇന്ന് ആഭ്യന്തര ഓഹരി വിപണികളില്‍ വ്യാപാരം പുനരാരംഭിക്കാനിരിക്കെ പോസിറ്റിവായ ആഗോള സൂചനകളാണ് മുന്നിലുള്ളത്. തിങ്കളാഴ്ച ബിഎസ്ഇ സെൻസെക്‌സ് 326 പോയിന്റ് ഇടിഞ്ഞ് 64,934ലും നിഫ്റ്റി 82 പോയിന്റ് താഴ്ന്ന് 19,444ലും എത്തിയിരുന്നു.

ഇന്നലെ പുറത്തുവന്ന യുഎസ് വിലക്കയറ്റ കണക്ക് പ്രതീക്ഷിച്ചതിനും താഴെയായത് നിക്ഷേപകര്‍ക്ക് ആശ്വാസമായിട്ടുണ്ട്. ഇനിയും പലിശ നിരക്ക് ഉയര്‍ത്തുന്നതിലേക്ക് യുഎസ് ഫെഡ് റിസര്‍വ് പോകില്ലെന്നും, 22 വര്‍ഷത്തെ ഉയര്‍ന്ന നിലയില്‍ നിന്നും അധികം വൈകാതെ യുഎസിലെ പലിശ നിരക്കുകള്‍ താഴേക്കിറങ്ങുമെന്നുമുള്ള പ്രതീക്ഷകളും ശക്തമായി. 

ഒക്റ്റോബറില്‍ യുഎസിലെ ഉപഭോക്തൃ വില സൂചിക അടിസ്ഥാനമാക്കിയുള്ള പണപ്പെരുപ്പം 3.2 ശതമാനമാണ്. സെപ്റ്റംബറില്‍ ഇത് 3.7 ശതമാനം ആയിരുന്നു. ഭക്ഷ്യ-ഊര്‍ജ്ജ മേഖലകളെ ഒഴിവാക്കി കണക്കാക്കുന്ന മുഖ്യ പണപ്പെരുപ്പവും  4.0 ശതമാനം എന്ന നിരക്കിലേക്ക് കുറഞ്ഞു.

കഴിഞ്ഞ ദിവസങ്ങളില്‍ പുറത്തുവന്ന ഇന്ത്യയുടെ വിലക്കയറ്റ കണക്കുകളും ആശ്വാസകരമാണ്. ഉപഭോക്തൃ വില സൂചിക (സി‌പി‌ഐ) അടിസ്ഥാനമാക്കിയുള്ള പണപ്പെരുപ്പം ഒക്‌ടോബറിൽ 4.87 ശതമാനമായി കുറഞ്ഞു, അഞ്ച് മാസത്തെ ഏറ്റവും കുറഞ്ഞ വിലക്കയറ്റ കണക്കാണിത്. മൊത്തവില പണപ്പെരുപ്പം തുടര്‍ച്ചയായ ഏഴാം മാസവും നെഗറ്റിവ് തലത്തിലാണ്. 

നിഫ്റ്റിയുടെ പ്രതിരോധവും പിന്തുണയും

നിഫ്റ്റി 19,421-ലും തുടർന്ന് 19,402-ലും 19,371-ലും സപ്പോര്‍ട്ട് നേടിയേക്കാം എന്നാണ് വിലയിരുത്തപ്പെടുന്നത്. ഉയർച്ചയുടെ സാഹചര്യത്തില്‍ 19,481 പെട്ടെന്നുള്ള പ്രതിരോധം ആകാം, തുടർന്ന് 19,500ഉം 19,531ഉം.

ആഗോള വിപണികളില്‍ ഇന്ന്

യുഎസ് സ്റ്റോക്ക് ഫ്യൂച്ചറുകൾ ചൊവ്വാഴ്ച രാത്രി വ്യാപാരത്തില്‍ ഉയർന്നു. എസ് & പി 500  ബന്ധമുള്ള ഫ്യൂച്ചറുകൾ 0.1 ശതമാനം ഉയർന്നു. ഡൗ ജോൺസ് ഇൻഡസ്ട്രിയൽ ആവറേജ് ഫ്യൂച്ചറുകളും നാസ്ഡാക്ക് 100 ഫ്യൂച്ചറുകളും 0.1 ശതമാനം വീതം ഉയർന്നു. പതിവ് വ്യാപാരത്തില്‍ എസ് & പി 500 1.9 ശതമാനം ഉയർന്നപ്പോൾ നാസ്ഡാക്ക് കോമ്പോസിറ്റ് 2.4 ശതമാനം ഉയർന്നു. രണ്ട് സൂചികകൾക്കും ഏപ്രിലിന് ശേഷമുള്ള ഏറ്റവും മികച്ച ദിവസമാണ് ഇത്. ഡൗ ഏകദേശം  1.4 ശതമാനം മുന്നേറി.

ഏഷ്യ പസഫിക് വിപണികള്‍ പൊതുവില്‍ നേട്ടത്തിലാണ് ഇന്നത്തെ വ്യാപാരം ആരംഭിച്ചിട്ടുള്ളത്. ചൈനയുടെ ഷാങ്ഹായ്, ജപ്പാന്റെ നിക്കിയും ടോപിക്സും, ദക്ഷിണ കൊറിയയുടെ കോസ്‌പിയും കോസ്‌ഡാക്കും, ഹോങ്കോങ്ങിന്റെ ഹാംഗ് സെംഗ്, ഓസ്‌ട്രേലിയയുടെ എസ്&പി/എഎസ്എക്സ് 200 എന്നിവ പച്ചയിലാണ് വ്യാപാരം നടത്തുന്നത്. യൂറോപ്യന്‍ വിപണികളും പൊതുവേ നേട്ടത്തിലാണ് ചൊവ്വാഴ്ചത്തെ വ്യാപാരം അവസാനിപ്പിച്ചത്. 

ഗിഫ്റ്റ് നിഫ്റ്റിയില്‍ 15 പോയിന്‍റ് ഇടിവോടെയാണ് വ്യാപാരം ആരംഭിച്ചിട്ടുള്ളത്. വിശാലമായ ആഭ്യന്തര വിപണി സൂചികകളുടെയും തുടക്കം നെഗറ്റിവാകാം എന്ന സൂചനയാണ് ഡെറിവേറ്റിവ് വിപണി നല്‍കുന്നത്

ഇന്ന് ശ്രദ്ധ നേടുന്ന ഓഹരികള്‍

എഎസ്കെ ഓട്ടോമോട്ടീവ്: ഈ ഓട്ടോ ആൻ‌സിലറി കമ്പനിയുടെ ഇക്വിറ്റി ഓഹരികള്‍ ഇന്ന് വിപണികളില്‍ ലിസ്റ്റ് ചെയ്യും. ഇഷ്യൂ വില ഒരു ഓഹരിക്ക് 282 രൂപയായി നിശ്ചയിച്ചിരിക്കുന്നു. നവംബർ 10 ആയിരുന്നു ഓഹരികൾ അനുവദിച്ച തീയതി.

ഗ്രാസിം ഇൻഡസ്ട്രീസ്: ഈ ആദിത്യ ബിർള ഗ്രൂപ്പ് കമ്പനിയുടെ സ്റ്റാൻഡ് എലോണ്‍ ലാഭം രണ്ടാം പാദത്തില്‍ 17.6 ശതമാനം വാര്‍ഷിക ഇടിവ് രേഖപ്പെടുത്തി 795 കോടി രൂപയായി. കെമിക്കൽ ബിസിനസ് കുറഞ്ഞതും വിസ്കോസിലെ  വളർച്ചാ മാന്ദ്യവും കാരണം വരുമാനം  4.5 ശതമാനം ഇടിഞ്ഞ് 6,442 കോടി രൂപയായി.

ഐ‌ഡി‌എഫ്‌സി ഫസ്റ്റ് ബാങ്ക്: ഐ‌ഡി‌എഫ്‌സി, ഐ‌ഡി‌എഫ്‌സി ഫിനാൻഷ്യൽ ഹോൾഡിംഗ് കമ്പനി എന്നിവയെ ഐഡിഎഫ്‍സി ഫസ്‍റ്റ് ബാങ്കുമായി ലയിപ്പിക്കുന്നതിനുള്ള പദ്ധതിക്ക് പെൻഷൻ ഫണ്ട് റെഗുലേറ്ററി ആൻഡ് ഡെവലപ്‌മെന്റ് അതോറിറ്റിയിൽ നിന്ന് (പിഎഫ്ആർഡിഎ) തത്വത്തിലുള്ള അംഗീകാരം ലഭിച്ചതായി ബാങ്ക് അറിയിച്ചു.

ബയോകോൺ: നേത്ര ചികിത്സയ്ക്ക് ഉപയോഗിക്കുന്ന യെസഫിലി എന്ന മരുന്ന് വിപണനം ചെയ്യുന്നതിനായി ഉപകമ്പനിയായ ബയോകോൺ ബയോളജിക്‌സിന് യുകെയിലെ മെഡിസിൻസ് ആൻഡ് ഹെൽത്ത്‌കെയർ പ്രൊഡക്‌ട്‌സ് റെഗുലേറ്ററി ഏജൻസിയിൽ നിന്ന് അനുമതി ലഭിച്ചു. 

റെയിൽ വികാസ് നിഗം: ധാരാക്കോ മാരംജിരി സെക്ഷനിലെ മൂന്നാം ലൈനുമായി ബന്ധപ്പെട്ട നിർമ്മാണ പ്രവർത്തനങ്ങൾ, സ്‍റ്റോണ്‍ ബല്ലാസ്‍റ്റ് വിതരണം, ട്രാക്ക് ലിങ്കിംഗ്, സൈഡ് ഡ്രെയിൻ നിലനിർത്തൽ എന്നിവയ്ക്കായുള്ള സമ്മതപത്രം സെൻട്രൽ റെയിൽവേയിൽ നിന്ന് കമ്പനിക്ക് ലഭിച്ചു. 311.18 കോടി രൂപയാണ് പദ്ധതിച്ചെലവ്.

ക്രൂഡ് ഓയിലും സ്വര്‍ണവും

ഡിമാൻഡ് വളർച്ചാ പ്രവചനങ്ങൾ അന്താരാഷ്ട്ര ഊർജ ഏജൻസി ഉയർത്തിയതിനെത്തുടർന്ന് ചൊവ്വാഴ്ച എണ്ണവില കരുത്തുനേടി. . ജനുവരിയിലെ ബ്രെന്റ് ക്രൂഡ് കരാറുകൾ ബാരലിന് 1.06 ഡോളർ അഥവാ 1.28 ശതമാനം ഉയർന്ന് 83.58 ഡോളറിലും ഡിസംബറിലെ വെസ്റ്റ് ടെക്സസ് ഇന്റർമീഡിയറ്റ് കരാറുകൾ 1.02 ഡോളർ അഥവാ 1.30 ശതമാനം വർധിച്ച് ബാരലിന് 79.28 ഡോളറിലും എത്തി.

ഡോളറും ട്രഷറി യീൽഡും താഴേക്കിറങ്ങിയതിനാല്‍ ചൊവ്വാഴ്ച സ്വർണവില 1 ശതമാനം ഉയർന്നു. സ്പോട്ട് ഗോൾഡ് ഔൺസിന് 1 ശതമാനം ഉയർന്ന് 1,964.29 ഡോളറിലെത്തി. യുഎസ് ഗോള്‍ഡ് ഫ്യൂച്ചറുകൾ 0.9 ശതമാനം ഉയർന്ന് 1,968.30 ഡോളറിലെത്തി.

വിദേശ നിക്ഷേപങ്ങളുടെ ഗതി

തിങ്കളാഴ്ച വിദേശ നിക്ഷേപക സ്ഥാപനങ്ങള്‍ 1,244.44 കോടി രൂപയുടെ അറ്റവില്‍പ്പന ഓഹരികളില്‍ നടത്തിയപ്പോള്‍ ആഭ്യന്തര നിക്ഷേപക സ്ഥാപനങ്ങള്‍ 830.40 കോടി രൂപയുടെ വാങ്ങല്‍ നടത്തിയതായി നാഷണൽ സ്റ്റോക്ക് എക്സ്ചേഞ്ചിൽ നിന്നുള്ള താൽക്കാലിക കണക്കുകൾ വ്യക്തമാക്കുന്നു.

മുന്‍ ദിവസങ്ങളിലെ പ്രീ-മാര്‍ക്കറ്റ് അവലോകനങ്ങള്‍

നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

വിപണി തുറക്കും മുന്‍പുള്ള മൈഫിന്‍ ടിവിയിലെ ലൈവ് അവലോകനം കാണാം